Корхнихть: «Шуфтсь кирди юронзон мархта, а ломанць—семьянц». Сембе пинкнень семьясь ульсь ломанти кеме нежекс, надияма вастокс. И пяк пичефти, кда тя или тона туфталонкса шабась лядонды семьяфтома. Вдь ся лямбонясь, конань макссесазь теенза тядянза-алянза, мезьсовок аф полафтови. Пара, мес ётксонк мушендовихть стама ломатть, конат анокт максомс кельгомаснон, эряфонь вийснон аф аньцек эсь шабаснонды, но и уроскятненди.
Иван Семёнович и Светлана Александровна Малькиттне эряйхть Ковылкина аймаконь Малав велеса. Синь простой ломатть, кода корхнихть, тяштть менельста аф кунцихть. Семьясна велеса лувондови трудонь кельгикс и сталмода аф пеликс. Кода и сембе, Малькиттне кирдихть жуватат, путнихть пере, покодихть.
—Минь тонадоме велень эряфти. Васенда кудонь тефнень тисаськ, а меле ни эряскоттама работама. Косонга стак аф ащат, шарат и шарат, сизема аф содат. Но минь аф талакоткшнетяма, вдь касыхть лездыеньке—кафта стиреньке Ольга и Юлия. Иденьке—прянь шнафтома вастоньке. Синь кафцьке роднойхть, кельгомнят. Аньцек оцюнять шачфтоськ минць, а ёмланять сявоськ идень кудста,—азонды Светлана Малькина.
Мокшавась шачемас коре Старошайговскяй районцта. Лиссь рьвакс Малавонь цёранди. Марсот 26 киза ни. Аньцек ламос ашезь шаченда иднясна—мянь 13 киза. И вов Шкабавазсь кандсь кудозост паваз. Васенце шабаняснон лемдезь Ольгакс. Стирнясь кассь и кармась вешема дугання или сазорня. Мирттне-рьвятне састь мяльс сявомс семьязост идня идень кудста. Синь арьсекшнесть тянь лангса ламос. Аськолкссь пяк ответственнаель. Шабась вдь аф налхкш, мяльце мольсь и ёрдайть. Тя эрек ломань, кона аф аньцек щама-каряма, андома-тряма, но и мума седиезонза киня-яння, марстонь кяль. И, конешна, сон кельгома. Кельгома сявф шабась эсь идняцень коряс аф сяда кальдявста. Юлясь васенце шистокиге педезь-педсь Светлана Александровнань и Иван Семёновичень седис. Тяни афи шарьхкодьсак, кона шабась синценне, а кона сявф идень кудста, кафцьконь фкя лаца кельгсазь и ужяльдьсазь.
Юляти 4 кизонятольхть, мзярда сон сувась Малькиттнень семьязост. А тяни ни сон якай школав, аделазе 2 классть и венеми Ольга аканц мельге, тяряфни тяфта жа лезнемс тядянцты и алянцты. Ольгать шнамс ули мезенкса. Стирняти аньцек 13 киза, а кудъёткса шары ни оцю ломань лаца. И жувата мельге якай, и куд урядай, и пиди-пани. Светлана Александровна тонафтсыне стирнятнень семботи, мезть маштсы сонць. Аф юкснесазь кунардонь пингонь койхнень. Иланди тядят-стирьхть тиендихть поза, пицихть суронь пачат. А нинге марса морсихть мокшень морот.
Сонць Светлана Александровна морси велень ансамбльса. Ули мокшень щамоц и стирензовок мокшекс наряжафт. Ольга и Юлия морсихть школьнай концертса, якайхть райононь фестивальхненди и лия эрь кодама мероприятиятияс. Кудса корхтайхть мокшекс. И хуш Юля инголи мокшекс ашезь шарьхкоде, тяни ни лочазь лочай. «Афкуксонь мокшаваня касы»,—пеедезь азозе павазу тядясь.
Малькиттне кемайхть, седиень лямбонясь, конань синь казендьсазь идняснонды, лезды теест кемоста стямс пильге лангс, арамс цебярь ломанькс и аф пелезь молемс эряфть эзга, аф ваномок стакатненьсталмотнень лангс.
И.ФАДЕЕВА.