Пееди—и ломанть ваймос арай сяда пара

Тячи азонттама Моску ошень «Азорава» ансамблень участницать Елена Куфтиновать колга, кона нинге шабакс кельгозе мораманц и фалу примсесь участия художественнай самодеятельностьса.
Вов кода мокшавась азонды эсь колганза.
—Шачень Ковылкинскяй райононь Валгапеле велеса. Школать шумордамдонза меле поступань Зубово-Полянскяй педагогическяй училищав, коса фалу улень васенцетнень ёткса пуромкснень ётафтомста. Училищаса башка мяль шарфнень хореографияти. Тонафнемать аделамдонза меле, а тя ульсь 1987 кизоня, распределенияс коре кучемазь работама начальнай классонь учителькс Ежовскяй средняй школав. Школаса вятень хореографическяй кружокт. Кизода меле ётань работама Валгапели. Воспитателелень. Якань морсема велень клубу, сяс улень ламоц концерттнень эса участницакс».
Сяда тов Елена Куфтинова лиссь рьвакс. Работась идень садса.
Меле эряфонь кинза-янонза пачфтезь мокшавать Москуву. И тосовок сон мусь ялгат—мокшень кялень кельги-ванфты ломатть. Арась содафокс «Тяштеня» мокшэрзянь ансамбльть мархта. Коллективть эста вятезе мокшавась Анна Сургаева. Сяда тов тя ансамбльсь «сувась» «Азорава» фольклорнай ансамбльти.
«Азораваса» Елена Куфтинова—концертнай сембе номерхнень хореографсна.
Асу, весяла, пара вайме—тяфта корхтайхть колганза сят, кит сонь содасазь. Пееди ломанть мархта васедемста—и сянь ваймос арай сяда пара.