ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса лувондови колмогемоньшка эряй и пяледа ламосна каннихть «Петров» фамилия. Аф карман лятфнемост кунардонь пинкнень, аньцек азса, што нинге аф кунара Арга велеса эрясь-ащесь А.А.Петров. Велень школати сон макссь ведьгемоньшка киза. Шабатненди тонафтсь мокшень, рузонь кяль и литература. Александр Алексеевич—мокшень кялень, мокшэрзянь литературань кельгиель, велень коень-обуцянь ванфтыель. Сон цебярь ялгаль и «Мокшень правдати». Кда панчсаськ войнада мельдень кизонь эсь кяльсонк лисенди газетать, мусаськ эсонза педагогическяй трудонь ветеранть рецензиянзон, зарисовканзон, школать, велеть эряфонц колга сёрматфонзон. Александр Алексеевич кельгома рьванц, Елена Ивановнань мархта касфтсть вейхкса итть. Мокшалять пяк мялецоль, штоба иденза лядольхть эряма Аргав. Тяфта и лиссь.
Цёрац, Владимир Александрович, нолдась крхка ункст Арга вели. Рьванц, Татьяна Тимофеевнань мархта сембе эряфснон максозь Аргань школати. Ужяленди, тяни вели ашезь ляда фкявок ученик. Вов ни лама киза сёлкф велень основной общеобразовательнай школась. Петрофнень стирьсна, Надежда Владимировна, якай покодема Атерь велень 2№ средняй общеобразовательнай школав. А мирдец, В.А.Малькин, трудендай Торбеевскяй райононь Татаронь Ювнянь основной общеобразовательнай школаса физикань учителькс.
Арга велеса эряй и А.А.Петрова. Сон аделазе М.Е.Евсевьевонь лемса МГПИ-нь (тяни МГПУ) филологическяй факультетонь мокшэрзянь отделениять. Аргань школаса вятсь мокшень кялень и мокшэрзянь литературань, немецкяй кялень, пениянь урокт, ульсь старшай пионервожатайкс. Касфтсь кафта стирьхть. Наталья Васильевна и Марина Васильевна—военнайхть.
Тяка велеса эряй Петрофнень нинге фкя сазорсна, З.А.Павлушкина. Сон школати макссь 40 киза. Вятсь историянь, географиянь, пениянь, трудонь, физкультурань урокт. Касфтсь колма цёрат. Андрей и Александр покодихть УФСИН-ца. Николай—омба масторонь кялень учитель, трудендай Москуса железнодорожнай колледжса. Касыхть кота уноксна.
Мзярда пуромкшни Аргав Петрофнень марнек семьясна, марьти аш коза прамс. Лувондови 150-шка ломань. Нят: синць сиретне, идьсна, уноксна, уноконь идьсна. Сняра эздост, што сембе афи лятфтавихть. И пцтай сембонь высшай образованиясна. А инь ёмлатне лац тонафнихть школаса.
Илья ВЕШКИН.