ПОЭТТЬ ВЛАДИМИР КОРЧЕГАНОВОНЬ ТВОРЧЕСТВАНЦ УЛИ КОДА МУМС ИНТЕРНЕТСОВОК

Интернетсь пяк кемоста сувась эряфозонк. Ломаттне вельденза тяшнихть фкя-фкянди сёрмат или нюрьхкяня текстт-месть, сотцесазь кулятнень, ванондыхть кинофильмат.
Тяда башка, интернетса содаф YouTube видеохостингсь, конань вельде пользовательхненди ули кода ваномс, пачфнемс и няфнемс видеот.
Эрти можна ванондомс видеозаписьнень, макссемс теест оценка, азондомс колгаст мяльхнень-арьсематнень и стак тов. Тяда башка, ули кода путнемс тя видеохостингти эсь видеозаписьнень, конатнень сяда тов кармайхть ванондомост лия пользовательхне.
Тяфта тиендихть творческяй содаф ламоц ломаттне. Тяконь лувксса и мокшэрзянь масторса эряйхне.
Вов ни несколька киза YouTube видеохостингса эсь каналонц вятьсы Мордовия Республикань Заслуженнай писательсь, МР-нь культурань Заслуженнай работниксь, трудонь ветеранць, СССР-нь Писателень союзонь членць, Г.Р.Державинонь лемса АРСИИ-нь Академиянь действительнай членць, «Мокшень правдать» кунардонь ялгац, мокшалясь-патриотсь Владимир КОРЧЕГАНОВ.
Владимир Николаевич—рузонь и мокшень кяльса стихотворениянь и прозаическяй произведениянь автор. Книганза нолявсть Москуса, Саранскяйса, а башка тяштьфонза—Россиянь ламоц газетатнень и журналхнень эса.
Стихонзон мархта поэтсь аф весть сяськондсь ламоц фестивальхнень эса, арсесь лауреатокс.
Кирдемок мяльса козя творчестванц, Владимир Николаевиченди ули мезе няфтемс и пачфтемс YouTube-са «Владимир Корчеганов» каналса. Ламотне ванондсазь видеоматериалть и фотографиятнень, шнашендсазь синь, азондсазь эсь мяльснон.
Каналса улихть аф аньцек стихотвореният, но и авторскяй морот, конатнень Владимир Корчеганов морсесыне сонць. Тяда башка, мокшалясь кой-кона видеотнень эса снимандаф мокшень панарса щафста. Мордовияса ламотне сонь содасазь кода родной кялень, коень-обуцянь патриотонь. Тяни национальнайти кельгоманц колга ули кода кулемс и няемс сембонди. Тянь мархта поэтсь максси цебярь кепотькс и лия мокшетненди.
«Владимир Корчеганов» каналса материалть ламошканц ули кода явфтомс несколька пяльксова. Тяда башка, мекольдень видеозаписнень эзда няеви, што поэтсь ушедсь макссема иттненди лемтьф стихотворениянзон. Синьге курокста музь эсь ваныснон, тусть мяльс.
Вов мезе тяштсть ваныхне эсь комментарийсост: «Поэзиясь—мирть инкса тюремаса! Владимир Николаевич Корчеганов тяштсь стихотворения тя эрявикс темас коре», «Оцю спасиба Владимир Николаевиченди патриотизмать инкса! Шумбраши и лама киза эрямс асу поэтти!»
Каналть ваныенза и подписчиконза касыхть шиста шис. Сембоц ни эздост комозьшка тёжянь ломатть. А тя корхтай сянь колга, што Мордовиянь Заслуженнай поэтть творчестванцты оцю вешфкссь лама вастова. И, улема, Владимир .Корчеганов васенцекс ушедсь YouTube-са эсь каналонц вятема. И тя тевоц удалась! Кода мумс каналть? Тянь тиемац тёждя. YouTube-ть вешендемань «вальмянясонза» тяштема: Владимир Корчеганов и люпштама вешендемань знаконять. И сембе—ванондода пара мяльса!
Татьяна АЛЬШИНА.