28 майста Россияса отмечсеви Пограничниконь шись. Тя шиня 1918 кизоня кемокстафоль РСФСР-ть границанзон ванфтомаснон коряс СНК-ть декретоц. Эста и тифоль пограничнай охранать Главнай управленияц. СССР-нь Пограничниконь шись кемокстафоль 1958 кизоня. Россияса Пограничниконь шись—28 майсь—азфоль 1994 кизонь 23 майста Россиянь Президентть Указонц мархта.
Россиянь пограничнай службать «юронза» тушендыхть кунардонь пинкненди. Кочевникнень мархта тюремась кошярязень рузонь княжестватнень тиендемс владенияснон маласа ломанень вии застават, а стане жа границать ваксса крепостть.
XIV векть омбоце пялестонза рузонь территориятнень лангс татархнень сидестонь врьгятнемаснон сюнеда Москувонь княжествать маласа ушедсть путневома ванфты отрятт и станицат, конат кучсесть ластя ваныхть. Сяда меле эвондасть пограничнай виияфтф линият.
1571 кизоня эвондась «Станичнай службать колга Уложениясь». 1574 кизоня путфоль сторожевой и станичнай службать лангса марстонь начальник. Внешняй торговлять касоманкса 1754 кизоня тиевсть пограничнай таможнят. Границать ванфнезь драгунскяй полкне, конат ащесть форпосттнень лангса, и таможеннай объездчикне.
1782 кизоня императрицать Екатерина II Указонц коряс, границать ванфтоманц и пограничнай контрольть мольфтеманц инкса тифоль «таможеннай цензурань и стражань» институт.
1827 кизоня вийс сувась «Пограничнай таможеннай стражать устройстванц колга положениясь», кона ульсь Россиянь Финансонь министерствать внешняй торговлянь Департаментонц подчиненияса. 1893 кизонь октябрьста пограничнай стражась лихтьфоль Внешняй торговлянь департаментста Финансонь министерствать пограничнай стражанц башка корпусокс (ОКПС).
1918 кизонь 30 мартста РСФСР-нь финансонь Наркоматть видеса тифоль пограничнай охранань Главнай Управлениясь, 1919 кизоня сон максфоль Торговлянь и промышленностень Наркоматти.
1991 кизонь декабрьста СССР-нь КГБ-ть реорганизациядонза меле пограничнай войскатнень Главнай Управленияснон вастс тифоль СССР-ть государственнай границанц ванфтоманц коряс Комитет. 1992 кизонь октябрьста Пограничнай войскатне сувафтфтольхть Безопасностень министерствать составс. 1993 кизонь 30 декабрьста тифоль Федеральнай пограничнай службась—Российскяй Федерациянь Пограничнай войскатнень Главнай командованиясна кода исполнительнай властень федеральнай самостоятельнай орган (ФПС—Главкомат). 1994 кизонь декабрьста ФПС-ти—Главкоматти максфоль лия лем—Российскяй Федерациянь Федеральнай пограничнай служба (Россиянь ФПС), 2003 кизоста сявомок Пограничнай службась—Россиянь ФСБ-ть структураса.