«Поиск» Мордовскяй республиканскяй патриотическяй объединениять исполнительнай директоронц тевонзон тиендисна Никита Мосевнин: «Од ломаттненди патриотизмась и историческяй мялямть ванфтомац—тя вий, кона эряй седисост!»

«Поиск» Мордовскяй республиканскяй патриотическяй объединенияти нильгемоньда лама киза. Содаф сон аф аньцек республикасонк, но и лия региоттнень эса. И, конешна, лемоц сембе пингс сотф пуроптыенц Николай Кручинкинонь мархта. Ужяленди, Николай Андреевич меля тусь эряфста. Но «идец»—«Поиск» объединениясь, конанди сон макссь аф фкя кемотть киза, эряй. Улихть тя тевть поладыенза, сяда тов вятиенза и виияфтыенза.
Ня шитнень васьфнеме «Поиск» Мордовскяй республиканскяй патриотическяй объединениять исполнительнай директоронц тевонзон тиендиснон Никита Мосевнинонь мархта. Сон оцю мяльса отвечась кизефксоньконь лангс.

—Никита Александрович, аф эльбядян, кда азса, што Мордовияса аш стама ломань, кона ашезь куленде «Поиск» патриотическяй объединениять колга. Азонтт аф лама сонь историянц эзда.
—«Поисксь» ушедозе эсь кинц 1975 кизонь 25 мартста. Большеберезниковскяй райононь Гузынскяй школаса «Сияжар» историко-краеведческяй кружокть видеса од учительсь Николай Кручинкин пуроптсь якстерь следопытонь штаб. Школаса тонафнихне оцю мяльса сотцезь шачема крайть историянц, кочксесть экспонатт, документт музеи, сёрматкшнезь войнань ветераттнень лятфнемаснон, вешендезь сятнень, кит воявасть мархтост.
1983 кизонь 9 майста панчфоль велень историко-краеведческяй музейсь, а 18 майста якстерь следопыттнень штабснонды максфоль «Поиск» лемсь и сон арась отрядкс, кона ащесь несколька группаста. Эвондасть мялень салай тефт. Мольфтевсь Гузынцы велень «Память» книгать и Великай Отечественнай войнань Летописнень тиемаснон лангса работась. Эзост сувасть тя велень ломаттнень—войнань участникнень биографиясна, боевой кисна-янцна. 1987 кизоста сявомок «Поисксь» ушедсь тонафнемонза Великай Отечественнай войнать пингста Мордовияса 326-це Рославльскяй Краснознамённай стрелковай дивизиять историянц и сонь героензон судьбаснон.
—Мзярда ульсь «Поискть» васенце экспедицияц и коза якасть поисковикне?
—Отрядсь васенцеда якась экспедицияс 1988 кизонь июньцта. Смоленскяй областень Рославльскяй районца поисковикне васенцеда няезь тюремань васттнень. Окопнень, траншеятнень, воронкатнень, гильзатнень, осколкатнень ульсь кода ваномс эсь сельмоса. Меле ульсть и лия экспедицият Смоленскяй, Калужскяй, Тверской, Ростовскяй, Псковскяй, Тульскяй, Волгоградскяй и лия областтненди, Краснодарскяй краи.
Кизоста кизос отрядсь кочксесь вийхть, кемокснесь, колганза ушедсть содама лия региононь поисковай отряттне. Муфтольхть боецонь ляткст, медальотт, конатнень эзда аф кржась лувфтольхть, лама мезе лия. Содафоль аф фкя тёжянь земляконь судьба.
—Никита Александрович, мезе азат «Поискть» тячиень шинц колга?
—«Поиск» Мордовскяй республиканскяй патриотическяй объединениясь стаки аськоляй вешендемань киге. Эзонза сувси пяк лама отряд, конат работайхть школатнень, колледшнень и вуснень мархта. Сембоц миньцонк тяни 1440 поисковик. Работась мольфтеви Мордовиянь сембе райоттнень эса. Поисковай тевти полаткшни коль сяда лама стирь и цёра, сяс пуропневихть од отрятт.
—Лиякс азомс, «Поиск» объединениясь—тя фкя кеме оцю шуфта, конань лама тараттонза и лувкссна коль касы?
—Тя тяфта. Республикань поисковай сембе отряттне сувсихть «Поиск» объединенияти.
—Коса ётасть мекольце экспедициятне?
—Меля поисковикне ульсть Ростовскяй, Калужскяй областтнень эса. Стане жа якатама поездкас гранттнень вельде сатф ярмакнень лангс. Лиякс азомс, организаторкс экспедицияти уленттяма минць.
—Тон, Никита Александрович, объединенияти исполнительнай директоркс кочкафат аф кунара, но вешендемань тевть мархта эряфцень сотыть лама кизода инголе. Азонтт лувиеньконди эсь колгат.
—Тяниень пингть тонафнян М.Е.Евсевьевонь лемса МГПУ-нь филологическяй факультетса нилеце курсса. Кочкайне рузонь кяльть и историять. Шачень Саранскяйса, меле тядязень мархта ётаме эряма Ромодановав, коса кефкие киза тонафнень 3№ школаса. Оцю мялезе улемс кода историянь, стане и рузонь кялень и литературань учителькс. Киза пяле мархта работань Саранск ошень 22№ школаса педагогокс-организаторкс. Тяни од ломаттнень мархта работать коряс специалистан Од ломанень республиканскяй Гражданско-патриотическяй центраса.
—Кода и мзярда сать «Поиску»?
—Объединениять колга васенцеда кулень 1-це класса тонафнемста. Тядязе кизефтемань ули-аш мялезе сёрматфтомс пря поисковикнень ёткс. Люкштядине прязень. Молень поисковай отрядть руководителенцты Иван Селиверстовонди и мярьгонь: «Иван Алексеевич, ёран тяштьфтемс пря поисковай отряду». Сон мярьгсь, што сави несколька киза учемс. 5-6-це класснень эса тонафнемста ушедсь сявондемон пуромксненди, а нинге тонафтомань тимуровскяй тефненди. Сяда тов тянди семботи поладсть велопробекне, мялямонь маршне, Мужествань урокне, памятникнень ваксса арушинь тиемась. Якаме Ромодановскяй районть эзга.
2018 кизоня васенцеда улень Международнай экспедицияса, коза пуромкшнесь 600-та лама ломань. Сембе работасть эсь участкаснон лангса. Нинге тоса ульсь Юнай поисковиконь школа.
Мзярда васенцеда молень вири—ся шиня мезевок ашень му. Сяда тов Николай Кручинкин прважамазь ся вастти, коса муфоль самолёт. Тевсь ульсь августста. Самолётсь ваяфоль сёвонти, эрявсь шувомс ламос. Тяфта и муськ фкя лётчикть лятксонзон. Ванфтовсь комбинезоноц, косоль комсомольскяй билетоц, содаськ лемонц.
Меле стаки якань экспедицияс. Улень Сахалин островса, лия вастса. Тяни аф арьсеса эряфозень «Поиск» объединенияфтома.
—Азондомста несколькаксть лятфтайть Николай Кручинкинонь лемонц. Ужяленди, Николай Андреевич тяни аш шиса. Но тевоц, конанди лемдезе эряфонц, эряй. И, надиятама, кармай эряма сяда тов.
—Николай Андреевич фалу кармай эряма мялямсонк. Сон ульсь оцю букваста Ломанькс. Содазь аф аньцек Мордовияса, но и марнек Россияса. Азса тяфта, «Поискть» мархта сотф тевоц эряй и кармай эряма. Ётксонк лама од ломаньда, конатнень ваймоса сон занци башка васта. Стирьхненди и цёратненди патриотизмать и мялямть колга валхне—аф шава васта, тя вий, кона эряй седисост!
—Тя кизефкссь эсьотям эвондась: мезе тиньцонт тиендеви од ломаттнень патриотическяйста воспитандаманксост?
—Оцю работа мольфттяма школатнень эса. Ётафнетяма тонафнихнень мархта васедемат, конат пяк тушендыхть стирнятнень и цёранятнень мяльс.
Мархтонк каннетяма фотографият, няфнетяма видеороликт. Тейнек макссихть кизефкст. Сидеста школаста тонафнихне синць арьсекшнихть проектт, лисендихть сяськикс, а меле ётафнесазь эряфс.
—Од ломанць сась мяльс сувамс «Поиск» объединенияти. Кода тянь тиемс?
—Кенкшеньке панжадот эрти, кинь мялец арамс поисковикокс. Примасаськ стирьхнень и цёратнень 14 кизоста сявомок. Но и сяда ёмлатненди ули мезьса занямс пряснон. Нинге весть лятфтаса: соткст кирттяма республикань муниципальнай сембе райоттнень и ламоц школатнень мархта. Пачфтеда тейнек и семботь марса ванцаськ. Кепотьксонди, ули кода якамс Юнай поисковиконь школати.
—Кодапт планонте маластонь пингонди?
—Стаки карматама мольфтема тевоньконь и тиендема семботь, штоба лувксоньке касоль. Приматама участия Сяськомань Шити лемтьф пуромкснень эса. Учсамазь кафта экспедицият. Фкясь—Калужскяй области, коса Великай Отечественнай войнать пингста мольсть вии тюремат. Проектозень коряс арьсекшневи молемс нинге фкя экспедицияс. Сембоц тядденди арьсеф ниле экспедицият.
—Лятфтать проектцень колга. Мезти сон лемтьф?
—Проектозень лемоц «Дела и Люди 326-ой дивизии». Сон лемтьф 1941 кизоня Мордовияса 326-це стрелковай дивизиять историянцты и боевой кинцты. Вельденза арьсекшневи ванфтомс мокшэрзянь масторса шачфнень—воиттнень подвигснон колга мялямть. Проектсь явф 4 этапова. Васенцеть пингста тонафневи 326-це стрелковай дивизиять боевой киц и тиеви тя архивнай документтнень мархта работать вельде. Тяда башка, аноклави военно-историческяй экспедициять ётафтоманц коряс историческяй отчёт. Омбоцесь—«Поисковиконь школать» ётафтомац, экспедициянь участникнень Великай Отечественнай войнать пингста тюремань васттнень и военнай историянь памятникнень тонафнемаснонды тонафтомасна тяниень пингонь археологическяй исследованиятнень мяльса кирдезь. Тя проектть вельде арьсекшнетяма молемс поисковай экспедицияс Калужскяй областень Барятинскяй райононь Харинка вели. Самай тоса 1942 кизоня 326-це Мордовскяй дивизиясь лоткафтозе немецкяй танковай клинть (Вирбельвинд операциясь). Тя ульсь 1942 кизоня. Ужяленди, шудесь лама вер. Дивизияньконь ламоц солдатонза тянемс апак мукт и лемсна апак содакт. Тисаськ семботь, штоба вешемс синь тя проектть вельде. Нилеце этапсь—арьсекшнетяма ётафтомс Мялямонь урокт и няфтемс вастста вастс ётафневи выставочнай экспозицият 326-це стрелковай дивизияса воявай Мордовияса шачфнень подвигснон колга образовательнай учреждениятнень эса.
Меля тя проектсь сатсь ярмакт сонь эряфс ётафтоманксонза, мезть и тисаськ. Оцю спасиба сембонди, кит тейнек лездсть проектть сёрмадомаса.
«Поиск» объединениять лемста и эсь эздон сембонди азан поздравлениянь валхт Сяськомань Шить мархта!
—Оцю спасиба, Никита Александрович, мялень салай корхнеманкса!
Татьяна АЛЬШИНА.

Последние новости

В Мордовии развивается система оказания первичной медико-санитарной помощи

В Мордовии в рамках национального проекта «Здравоохранение» развивается система...

Благодаря нацпроекту в Мордовии растет число самозанятых

Сегодня в России более 10 млн граждан зарегистрировали самозанятость....

В рамках нацпроекта самозанятых Мордовии бесплатно научат nail-мастерству

Министерство экономики, торговли и предпринимательства РМ совместно с Центром...

В селе Константиновка Ромодановского района ремонтируют дорогу

В Мордовии в рамках национального проекта «Безопасные качественные дороги»...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система оказания первичной медико-санитарной помощи

В Мордовии в рамках национального проекта «Здравоохранение» развивается система оказания первичной медико-санитарной помощи. Она включает в себя профилактику, диагностику и лечение заболеваний, а также...

Благодаря нацпроекту в Мордовии растет число самозанятых

Сегодня в России более 10 млн граждан зарегистрировали самозанятость. В Мордовии такой статус оформили свыше 25 тыс. человек. Свою деятельность они осуществляют в рамках...

В рамках нацпроекта самозанятых Мордовии бесплатно научат nail-мастерству

Министерство экономики, торговли и предпринимательства РМ совместно с Центром «Мой бизнес» оказываетпомощь предпринимателям Мордовии, предоставляя различные меры государственной поддержки бизнесу республики. Так, в рамках национального...