Пожарть сяда тёждя инголдамс, а аф матомс!

1 апрельста Саранскяйса, Мордовия Республикань Пресс-центраса, ётафтовсь «Регионца пожароопаснай обстановкась. Перьфпялень пожархнень и коське касыкснень плхтамаснон мархта ситуациять колга» темас пресс-конференция.
Массовай информациянь средствань представительхнень мархта васьфнесть Мордовия Республикань Гражданскяй оборонань тефнень и чрезвычайнай ситуациятнень коряс Государственнай комитетть председателец Андрей Наумов, Мордовия Республикать эзга Россиянь МЧС-ть Главнай Управлениянц начальникоц Сергей Репин, Мордовия Республикань вирень, охотничьяй хозяйствань и природопользованиянь министрть аф лама пингс тевонзон тиендисна Иван Новиков.
Лувиеньконди азсаськ, што 1 апрельста сявомок Мордовияса тевс сувафтф противопожарнай башка режим.
Сергей Репинонь валонзон коряс, ломаттне кода плхнесть коське тише, стане и плхнихть. Сяс МЧС-сь инголенди арьсезень сембе ся тефнень, конат тиемат, арьсесь ландшафтнай пожархнень матомаснон коряс план.
Лятфтасаськ: тяддеть ушетксста сявомок матф сядода лама пожар, конат лиссть коське тишеть паломанц инкса.
Андрей Наумов пачфтезе, што противопожарнай башка режимсь ладяф 1 апрельста сявомок 30 сентябрти молемс. Кда эрявксты, сонь ули кода кувалгофтомс. Тяфта миньцонк ульсь меля.
Арьсефт сембе ся мероприятиятне, конат тиемат режимть мяльс сявозь. Тяда башка, пингстонза административнай санкциятне касыхть несколькаксть.
Пожархнень матоманкса ули личнай состав, эрявикс техника, но пожарть сяда тёждя инголдамс, а аф матомс. Сяс киндивок аф ащема тянь эзда ширеса. И кда шабрась крьвястсь толмар, аф ётама ваксканза, а лац-ряц азондома сонь пельксонц колга. Ульсть случайхть, мзярда палондсть ульцят…
Иван Новиков лятфтась вирень оцю пожарть колга, кона лиссь мелянь сёксенда Рузаевскяй районца машина кить и населённай пунктть маласа. Эста толса фатяфоль 145 гектар вирь. Марстонь вийса толсь сяськфоль. Мольфтеви мониторинг, тяконь лувксса и патрулированиять вельде, пожарда пелькс ситуациять мельге.
Пресс-конференцияса ванфтольхть эрявикс кизефкст. И синь лангозост башка мяль шарфтома эрти эздонк!
Татьяна Владимирова.