1945 кизонь 6 майста советскяй войскатне ушедозь Пражскяй операциять, конань пингста воляс нолдафоль Прагась и сявфоль пленц «Центр» армиятнень группасна.
1945 кизонь Пражскяй операциясь—1-це, 2-це и 4-це Украинскяй фронттнень войскаснон наступательнай операциясна, кона ётафтфоль 1945 кизонь 6-11 майста Чехословакиять территорияса немецкяй военнай группировкать машфтоманкса.
Войнань мекольце шитнень У.Черчилль и Европаса британскяй войскатнень командующайсна Б.Монтгомери башка мяль шарфнесть советскяй армияда инголи Берлинть, Венать и Прагать западнай союзникнень мархта фатямань вариантонцты. Западнай фронтса немецне пцтай лоткасть пряснон араламда, а майть ушедомс Чехословакияса и Севернай Австрияса советскяй войскатнень каршес ащесть «Центр» и «Австрия» армиятнень группасна. Кой-конатнень вийсна—900 тёжяньда лама ломань, 10 тёжянть малава орудия и миномёт, 2200-та лама танка и штурмовой орудия, 1000-ть малава самолёт.
Сяда меле, кода 1945 кизонь 30 апрельста Гитлер шавозе эсь прянц, фашистскяй Германиять од правительстванц мяленц коряс, «Центр» армиять группанзонды эрявсь кирдемс западнай и центральнай Чехиять райононзон сянкса, штоба улель пинге потамс западу американскяй войскада инголе. Советскяй командованиясь арьсесь несколькаксть эрьхтемс 1-це, 2-це и 4-це Украинскяй фронттнень вельде (1 миллионда лама ломань, 23 тёжяньда лама орудия и миномёт, 1800-ть малава танка и САУ и 4 тёжяньда лама самолёт) Прагать лангс моли направлениятнень эзга, штоба кружамс и явфтомс пяльксонь пялькс врагть основной виензон.
8 майста германскяй командованиясь путозе кяденц безоговорочнай капитуляциять колга актть алу, но «Центр» армиять группанза коль мольфтсть тюрема. Араламок Прагань эряйхнень, 1-це Украинскяй фронтть 3-це и 4-це танковай армиянза 8-9 майста веть тисть 80 вайгяльбень «аськолкс» и 9 майста шобдава сувасть Прагав. Тяка шиня Прагати маладсть 2-це и 4-це Украинскяй фронттнень передовой пялькссна. 10-11 майста противникть войсканзон основной виенза ушедсть макссема пря пленц, а сембоц операциять пингста сявфоль 860 тёжянь фашистскяй солдат и офицер. Тяка пингть войсканьке васедсть 3-це американскяй армиять мархта, шумордамок тянь мархта Чехословакиять территорияса немецкяй войскатнень машфтомаснон коряс тюрематнень.
Странать воляс нолдаманкса сембоц шавовсь 140 тёжянь советскяй воин. Тя ульсь Омбоце мировой войнать пингста советскяй войскатнень мекольце операциясна Европаса.