12 июльсь—Отечествать военнай историяса мяляфтови дата. Тя шиня 1943 кизоня Прохоровка велеть маласа ульсь советскяй и германскяй армиятнень ёткса танковай инь оцю тюремась Омбоце Мировой войнать пингста.
Танкань соединениятненди командиркс тя тюремать пингста ульсь генералсь-лейтенантсь Павел Ротмистров советскяй ширде и СС-нь группенфюрерсь Пауль Хауссер немецнень ширде. Фкявок ширети ашезь удала сатомс 12 июленди арьсефть: немецненди ашезь фатяв Прохоровкась, ашезь сязев советскяй войскатнень оборонасна, а советскяй войскатненди ашезь удала сявомс противникть группировканц.
КОДА МОЛЬФТЕВСЬ ТЮРЕМАСЬ
Советскяй Центральнай фронтса 1943 кизонь 5 июльста немецненди ашезь удала сувамс войсканьконь обороназост, а Курскяй дугать южнай ширесонза тефне мольсть сяда стакаста. Тяса васенце шиня противниксь сувафтсь тюремати пцтай 700 танка и штурмовой орудия, конатнень ширеснон кирдезень авиациясь. Советскяй командованиясь сась мяльс тиемс каршек эрьхтема врагть группировканц ланга. Воронежскяй фронтсь виияфтфоль Ставкать вельде (5-це гвардейскяй танковай и 45-це гвардейскяй армиятнень и танкань кафта корпуснень мархта). 12 июльста Прохоровкать маласа ульсь Омбоце Мировой войнань инь оцю тюремась, коса кафцьке ширде пуромкшнесь 1200 танка и самоходнай орудия.
Советскяй танкань войскатне ёрасть мольфтемс маластонь тюрема («бронясь—броняти»), сяс мес Т-34-ть 76 миллиметрань орудияц ляцеви 800 метрас, а лия танкатнень нинге сядовок кржас, эста кода «Тигратнень» и «Фердинанттнень» 88 миллиметрань пушкасна ляцендезь бронемашинатнень 2000 метра вастста. Пяк малакс улемста танкистоньконь оцюфтольхть юмафкссна.
Кафцьке ширетне Прохоровкать маласа юмафтсть пяк лама. Советскяй войскатне юмафтсть 500 танка 800-ста. Немецне—300 танка 400-ста. Теест тя ульсь оцю зиянкс. Тяни немецнень инь вии группировкасна вийфтомоль. Г’енералсь Г.Гудериан, кона эста вермахтонь танкань войскань генерал- инспектороль, тяштсь: «Бронетанкань войскатне, конат кочкафтольхть-пуроптфтольхгь пяк стакаста, лама ломанень и техникань юмафтомать сюнеда, лама пингс лиссть стройста… и Восточнай фронтса сетьме шит ашельхть ни».
Тя шиня противниксь башка мяль шарфтсь оборонати. 13-15 июльста немецкяй войскатне мольфтезь атакаснон аньцек 5-це гвардейскяй танковай и 69-це армиятнень пяльксснон каршес Прохоровкать эзда южнай ширеса. 16 июльста немецне ушедсть потама тоза, косотольхть инголи.