Республикань Оцюнять эрь кизонь Посланияц
15 ноябрьста Саранскяйса, Культурань республиканскяй Дворецса, ётась Мордовия Республикань сисемце созывонь Государственнай Собраниять нильгемонь кафтувоце сессияц. Пингстонза Мордовия Республикань Оцюнясь Артём Здунов пшкядсь эрь кизонь Посланиянц мархта Мордовия Республикань Государственнай Собранияти.
Панжезе и вятезе сессиять Мордовия Республикань Государственнай Собраниять Председателец Владимир Чибиркин.
Мордовия Республикань Государственнай Собраниять Председателец макссь вал республикань Оцюняти Артём Здуновонди.
Артём Алексеевич ушедозе корхтаманц кафта кяльса—эрзяннеса и рузоннеса.
—Тячи корхтамась кармай молема республиканьконь стратегическяй касоманц-виияманц инь эрявикс направлениянзон колга. Ванцаськ, кода пяшкотькшнесаськ Президентоньконь поручениянзон, и эряфс ётафнесаськ задачатнень, конатнень сон путозень Посланияса,—мярьгсь сон.
Васенда Артём Алексеевич шарфтсь мяль специальнай военнай операцияти.
—Россияти судьбань тии ня шитнень сембе работатама странаньконь главнай задачанц—Родинаньконь аралафшинц и Сяськомать обеспечендамаснон лангса. Тёжятть Мордовиянь эряйсь фронтсот—тюремань паксясот, доброволецонь отряттнень, фронтть маласа госпитальхнень, гуманитарнай лезксть мархта колоннатнень, волонтёронь сообществатнень и границать ваксса региоттнень эсот. Кой-кит максозь инь питнить—эсь эряфснон,—мярьгсь республикань Оцюнясь.
Сяда тов азфоль кашт аф молезь ащемань минута сятнень лемс, кит тяни ашет ётксонк. Нят мезьдовок аф пели офицерхне, командирхне и боецне. Но синь сембе пингс мархтонк, фкя стройса.
Аш кода аф азомс гражданскяй ответственностень марямань кепотьксть. Россиянь Геройсь Григорий Слугин, кона казьф Зрнянь Тяштьса (куломдонза меле), арьсесь строямс ки Ардатовскяй райононь Баева родной велесонза. Посланиять пингста пачфтьфоль, што Россиянь Геройть порученияц пяшкотьф.
Григорий Слугин башка мяль шарфнесь гиревой спортти и арьсесь тя дисциплинать коряс Мордовиянь чемпионатть эреклафтоманц колга. Артём Здунов мярьгсь, што сай кизоста сявомок чемпионатсь ули эреклафтф и лемдеви Россиянь Геройть Григорий Слугинонь колга мялямти и сембе воиноньконди!
Корхтамок экономикать колга, Артём Алексеевич азозе, што главнай задачать пяшкодеманц лангса работай марнек Россиясь, марнек Мордовиясь. Сяськомать маласькофнесазь педагокне и врачне, артисттне и культурань работникне, ветераноньке, патриотическяй и од ломанень организациятне, священнослужительхне, волонтёрхне и доброволецне, строительхне, эрсь эздонк.
Промышленнай производствань индекссь касы пцтай 10 процентта—минь ПФО-нь региоттнень ёткса вете инголи молихнень ётксотама. Кемоста касыхть ёмла и средняй бизнессь. МСП-нь субъекттнень лувкссна кассь пцтай 10 процентта, самозанятайхнень—42-да лама процентта. Цебярьхть потребительскяй рынкать сатфксонза. 7-да лама процентта кассь розничнай мишендемань-рамамань оборотсь, оптовай мишендеманнесь-рамаманнесь—16-да лама процента.
Тядде Мордовияса тиф экономическяй башка зона. «Лисма» заводть ингольдень площадензон лангса эсь производстваснон анокт ладямс 5 промышленнай резидентт. Синь сувафтыхть проекттненди 7 миллиартта лама цалковай инвестиция и тиихть 900 рабочай од васта.
Тячи промышленниконьке активнайста нолясазь тевс промышленностень касфтомань и виияфтомань федеральнай и региональнай фонттнень ширень кирдемаснон. Тянь вельде тяфтама оцю предприятиятне, кода «Рузхиммашсь», «Лидерсь-Компаундсь», «ЭМ-Кабельсь» и лиятне мекольдень кафта кизотнень няевиста касфтозь промышленнай эсь потенциалснон.
Башка мяль—гособоронзаказть пяшкодеманцты. Аньцек тяддень мекольце 8 кофнень сон кассь пцтай 70 процентта. Тя оцю цифрась, эшкссонза ащи оцю ответственность.
Велень хозяйстваса республикать агропромышленнай комплексоц 10 кизот ни няфни кеме касома. Тядде удалась кочкамс 1,5 миллион тонна сёра, 1 миллионда лама тонна сахарнай якстеряпс.
Мордовиясь кирнесыне продукциянь основной виттнень нолямаснон коряс инголи моли васенце васттнень.
АПК-са эряфс ётафтови 13 оцю инвестпроект, конатнень марстонь питнесна 30 миллиард цалковай.
Республикань Оцюнясь пачфтсь экологиять, вирень хозяйствать, ЖКХ-ть, спортть мархта сотф тефнень, сатфкснень и задачатнень колга.
Республиканьке сяда тов кармай строяма од микрорайотт, примай участия жилищнай и ипотечнай сембе программатнень эса.
Корхтамок кинь хозяйствать квалма, Артём Здунов азозе, што сай кизоть эряви петемс 200-та лама вайгяльбе региональнай и межмуниципальнай значениянь ки. Ушедомс работатнень капиталоёмкай кафта од объекттнень коряс.
Россиянь Президентть ширень кирдеманц вельде касфнесаськ финансонь сфераса управлениянь качествать. Мекольдень кемонь кизоста Россиянь Финансонь министерствась васенцеда лувозе Мордовияса региональнай финанснень мархта управлениять надлежащайкс. Ниле кизоста республиканскяй бюджетть доходнай базац кассь 1,7-крда, тя 17 миллиартта лама цалковай.
Федеральнай ширень кирдемать вельде касы-виияй здравоохранениясь. Сай кизоть Президентоньконь ширень кирдеманц вельде ушедови онкодиспансеронь од зданиять строямац. Тядде шумордави 6 медицинскяй учреждениятнень капитальнайста петемасна.
Мордовиясь стаки ляткшни инголи молихнень ёткса образованияса. Сай кизоть Саранскяйса ушедови 500 вастонди школать строямац (9№ школать вастс).
2025 кизось ули козя культурнай событияса: 10 январьста топоди 95 киза Мордовскяй автономияти; 30 киза Мордовия Республикать Конституциянцты; 155 киза Федот Сычковонь шачема шистонза. 2026 кизоня топоди 150 киза Степан Эрьзянь шачема шистонза.
Артём Здунов 2025 кизоть Мордовия Республикаса азозе Историческяй мялямонь кизокс!
Посланияса ванфтольхть ламоц лия ширетне и задачатне.
Татьяна АЛЬШИНА.