Пяштю идькс пинге

Эряфкшу ломанень лятфнемат

Вальмала тага сялгадсть шабатне. Кулевсть юватькшнемат, анзямат, кати-кие ни аварьгодсь. Мезе лиссь? Ламос арьсемс аф эряви, тага ашезь явов смартфонць или планшетсь. Сялондыхть сянкса, кинь сась пингоц налхксемс. Тяни ламоц иттне ёфси аф шарьхкодьсазь эряфснон тя паршифтома. Сюцесазь оцюфне, сявсазь телефонть—обжавихть. Аф муйхть эстеест тев. Ушедыхть тядяснон-аляснон машнефтема.
—Эх, миньге вдь налхкшенкса спорсекшнеме, улендсь и тюренкшнеме. Аньцек синь эста лиятольхть. Да и минцьке лиятолеме,—лятфни Николай Михайлович Миронов.
Сиреняти тяддень июльста топодсь 86 киза. Сон шачсь-кассь и марнек эряфонц ётафтозе Инсарскяй райононь Навлей велеса. Николай Михайлович рьванц, Екатерина Васильевнань мархта касфтсь вете стирьхть и цёра. Тяни синь 9 уноксна, улихть уноконь идьсна. Атясь эряфоньберьф покодсь колхозса.
Минь васедеме Николай Михайловичень мархта кизонь лямбе илядня, кудонц ваксса. Ванондомок тяниень шабатнень лангс, конат пуромсть аф ичкозе, сон мзолдозня лятфтазе, кода ётась сонцень идькс пингоц.
—Семьяньке минь аф сяшкава ни оцюволь. Мон, ёмла альняказе, тядязе и щавазе. Нилененк эряме куднясонк. Алязе куляфтома юмась войнаса. Аф тёждяль эста эряфсь. Пялес вачедотолеме, лангсонк цебярь щамнят ашельхть, а минь, шабатне, сякокс улеме павазуфт. Оцю кенярдемакс тейнек арсесть Роштуваста суронь пачатне, ваи пяштенятне, конань щавазе и тядязе пицезь шурода весть, сяс мес тозеронь почф эста ашель коста сявомс, и лиясь, мезть лангс тяниень шабатне афи варжакстольхть.
Покодема ушедонь рана, кемонь кизоса. Мзярда ушеткшневсь тишень лядемась и сёронь урядамась, паксяв лисендсть однек-сиренек. Тев мушендовсь тейневок: алашаса усксине фкя капас сёронь пулфнень, конань нушендозь тарвазса оцюфне. Эряви азомс, алашать кильнине монць. Семботь маштыне. Эста велень иттне лама мезе тиенкшнеме минць. Тонаткшнеме фкя-фкянь эзда, ванондоме оцюфнень мельге. Вов тяфта мон и тонадонь карень кодама. Тяда инголе тейнек синь макссекшнезень эздонк аф ичкозе эряй авась. Мзярда цють эзрайгодонь, тейне арась визькс—кода стане, авась кодай карьхть, а тейне деряй аф сафтови. Маладонь теенза, эняльгодонь, штоба тонафтолемань. Сон няфтезе семботь, и мон кярьмодень карень кодамати. Виденц азомс, синь аф ни сяшкава вадявнятольхть, но кудъёткса якамс кондястсть, сяда лама афи эрявсь. Ламоксть петнине калатф карьхненьге, тявок кинди-бди тиендемаль. Аф кунара ёрань лятфтамс тя тевть. И мезевок ашезь лисе, аньцек аф сяс, мес кядьне семботь юкстазь, а мес ашезь ванфтов фкявок эрявикс инструмент. Ужяль. И мезенди синь эрявсть ёрямс, пади, нинге кондястольхть.
Маштоме минь, цёранятне, и соксонь тиема. Молят вирняв, керат ушторня, лаксесак кода эряви, а тоса пси пянакудть ваксса лопафтсак лакай ведьса пенц и мяндьсак. Виденц азомс, ня соксне курькстсть аф сяшкава вишкста заводоннетнень коряс. Ну минь тянкса ашеме пичеде. Сякокс тялонда ши-шишка юмсекшнеме панда пряса. Сокста башка курькснеме цёматаса. Эх, кодама эста весялаль! Тяни шабатнень тялонда ульцяв стака панемасна, а вдь улихть и цебярь конёксна, и сокссна, нурдонясна. А синь шалхкснон пезфтасазь телефонти и аш ни мяльсна оду мезевок тиемс.
Тюрендемс шабакс тейнек тяфта жа сашендовсь. Но аф стане, штоба киньге шавомшка, а налхксемга, отькорьшинь няфтемга. Фкя курнянь цёранятне мольсть омбоце курняннетнень лангс. А нинге тяфта минь панцеськ салайхнень. Эста ашельхть рамаф налхкшеньке, семботь тиендеськ минць. Тоза эрявихть ярмакт. Коста велень шабать зепсонза ярмаконя, кда тядяньковок синь пцтай ашезь няенде. Кельгоськ чакаса налхксеманьконь. Кочксеме колаф кядьгонянь сяда мазы пялькскат, тиендеськ покарявкс и мархтост ни налхксеме. Тяфтама «казнать» сашендовсь лац-ряц пртцемс, сяс мес сидеста салсекшнеськ фкя-фкянь кядьста.
Эста велеряйхне пяк кемасть Шкайти. Хуш церькавсь миньцонок сёлкфоль, оцю иласта яксесть ся велетненди и ошненди, коса ётафневсть службат. Мяляфтса, щавазе пяк сюцекшнемань пионеронь галстукть инкса, ашезь мярьгонде каннемда, кле, тя шяйтанть эзда сембось. Школав, меколанкт, галстукфтома ашемазь ноля, вов и сашендовсь тейне кудста тумстон галстукть путнемс зепозон, а тоса ни ляйнять ваксса, каньфть пачка молемста, сотнекшнемс сялдазозон.
Пяк ламоль мялень салай налхксемадонк. Васенце вастсотольхть кудонь тефне. Сидеста яксекшнень марожень сязендема. Эста сонь шорсезь розь почфть и модамарень шовафкснень мархта. Тяфта панцевсь кшись. Мельганк ванць объезчиксь. Вдь кочксеськ марожть аф коста-коста, а роснень ёткста. И кда ни кунцемазь, сюцекшнемазь паксять тапаманкса. Нльне штрафтка путнесть.
Тяда башка, шабатне шовсесть модамарьхть. Тейне сашендовсь шовсемс кафтонь ведарка. Тёркатне ульсть эсь кядьса тифт, шуфтоннет. Шовафкснень люпшнеськ, эздост лихнеськ крахмалть. Сонь меле оргаляськ кой-мзяра ведьса и косьфнеськ. Крахмалста пицесть лапшат, ксяль и стак тов. А шовафкснень эзда панцекшнесть кши. Модамарьда кржаль. Уматне эста аф оцюфтольхть (15-шка сотка). И аф аньцек модамарь озафнесть, но и сура, штоба улель мезьста иланди пачат панемс, каньф, штоба улель мезьста пракстанди котф кодамс. Эхи ламоль эста тевда! Но минь кода-бди семботь кенерькшнеськ тиемс.
Нинге ся пингть пяк кемоста ванцть вирьхнень мельге вирень ваныхне. Синь няфнезь, кона шуфтсь керома пенгянди-мезенди, а кона кадома. Вирьхне эста аруфтольхть. (Атясь стакаста куфкстась. Сельмосонза эвондась пичедема.) Вирьса ульсть и панкт, и пяштть! А мзяронь аноклакшнеме! Сяльде пяшттнень тялонда каннелеськ ульцяв, каванякшнеськ стирнятнень. Кинь шинжароманза ульсть, кинь пяштенза.
Оцю иласта марнек велесь пуромкшнесь школать ваксс. Морсесть морот, кштишендсть. Стирьхне щашендозь инь мазы щамснон, срму кямоснон. Вов тя пингть бабатне ванондсть эстеест сай пингонь рьвянят. Виденц азомс, рьвянять эзда эста васендакиге вешевсь тазаши. Кда стирсь шуваняняль, мярьгондсть: «Да теенза цюгуннятневок аф кеподевихть». Шарьхкотьф, авать лангса нинге лама эрь-кодама тевда. А сяс прокс лафченякс теенза улемс ёфси ашель кода.
Мялезонза-аф тячиень эряфоц, атясь отвечась:
—Эряфсь тяни лия. Пекце топодьста, кудце лямбе, пенсиять каннесазь эсь пингстонза. Перьфкан шарыхть идне и уноконе. Аньцек мон апак арьсек мрдалень пяштьта пяшксе идькс пингозти, мзярда кизонь ветне лямботольхть, а суронь пачада танцти мастор лангса мезевок ашель.
Марина Стешина.

Последние новости

В Мордовии открылись новые благоустроенные зоны отдыха

В Мордовии в этом году открылось сразу 7 новых...

Благодаря нацпроекту малый и средний бизнес Мордовии получает господдержку

Министерство экономики, торговли и предпринимательства РМ совместно с Центром...

В Ичалковском районе приводят в порядок 14 км дорог

В Ичалковском районе Мордовии по национальному проекту «Безопасные качественные...

Нацпроект помогает бизнесу Мордовии стать узнаваемым и привлекать новых клиентов

Министерство экономики, торговли и предпринимательства РМ совместно с Центром...

Дан старт приемной кампании по программам «Профессионалитета»

В Мордовии начинается приемная кампания в колледжи и техникумы...

Нацпроект помогает семейному бизнесу Турбиных из Мордовии 

Министерство экономики, торговли и предпринимательства РМ совместно с Центром...

В Мордовии модернизируют службу занятости

Мордовия вошла в число пилотных регионов комплексной модернизации службы...

В Мордовии открылись новые благоустроенные зоны отдыха

В Мордовии в этом году открылось сразу 7 новых пляжей. Средства на их благоустройство были предоставлены предпринимателям республики в качестве грантовой поддержки. Работы велись...

Благодаря нацпроекту малый и средний бизнес Мордовии получает господдержку

Министерство экономики, торговли и предпринимательства РМ совместно с Центром «Мой бизнес» оказывает поддержку предпринимателям Мордовии. Так, благодаря реализации национального проекта «Малое и среднее предпринимательство...

В Ичалковском районе приводят в порядок 14 км дорог

В Ичалковском районе Мордовии по национальному проекту «Безопасные качественные дороги» в 2024 году будет капитально отремонтировано порядка 14 км дорог. В мае начались работы на...