Раень» уженя

Кодак поват Свято-Варсонофиевскяй авань монастырть потмос, пингсь эстокиге, мярьгат, лоткси. Мордовиянь фкя инь мазы святой вастсь ащи Зубово-Полянскяй райононь Велязем велеса. Тяза кизоньберьф сашендыхть инжихть аф аньцек республикастонк, но и марнек Россиянь уженятнень эзда. Аф ваномок сянь лангс, што монастырти аньцек 20 киза, сонь колганза содайхть ламотне и сашендыхть тяза ваймонь сетьмошинь вешендема.
Ушеткссь тя монастырти, кода азондсазь Веляземонь эряйхне, путфоль Блаженнай Дарьять азондоманзон эзда. 100 кизода инголе теенза Шкайсь панжезе, што тяса, Пресвятой Богородицать Покровонь лемса срафтф-калафтф церькавть вастса «палозеви штатол модать эзда менельти».
Тяфта и лиссь. Лама вий и ваймонь эрьгя путсь настоятельсь, Велязем велеса шачфсь-касфсь, архимандритсь Алексий, штоба 1992 кизоня церькавть мрдафтолезь Шкайти верондайхненди. Васенда службась вятневсь ульцяса, панжада менельть ала. Пингонь ётазь, церькаву сашендыхнень вийснон и пожертвованияснон лангс озондомань кудсь одкстоптовсь. А 1996 кизоня тя церькавть видеса панжевсь авань монастырь. 2002 кизоня штатол лаца кеподсь Христосонь Воскресениянь соборсь. Вастокс теенза кочкафоль ся аймаксь, коса инголи эрясь Шкаенди аф кемай ломань.
Акшаза крестово-купольнай церькавсь ащи панда пряса, нинге ичкозде няевихть сонь куполонза и 39 метрань сереса колокольняц, коса 8 пайкт. Инь оцють сталмоц мянь 100 пуд. Пайкнень мазыста шавомасна маряви ламоц шабра велетненди.
Приходской эряфса ламось ащи аватнень эзда. Сестринскяй пуромкссь путни аф кржа вийда монастырть касоманцты-кеподеманцты. Тячи Веляземонь церькавса эряй 60 лама послушница. Синь касфнихть перень сёрот, ваныхть монастырень садть мельге. Монастырть сонцень подсобнай хозяйствац. Улихть тракссна, сявасна, учасна, саразсна, мацисна, техникадостка сатомшка. Монастырьса работайхть ламоц велеряйхневок. Тя лезды алятненди лядондомс эсь велесост, семьяснон ваксса, аф якамс Москуву-коза работань вешендема.
Монастырьса аноклакшневихть лекарстват. Переса касфневихть эрь кодама пчкафты тишет. Эздост монахинятне аноклакшнихть масть, крепт и настойкат. Монастыри сидеста сашендыхть благодарностень вал мархта сёрмат ся ломаттнень эзда, конат пчкясть лекарстватнень вельде.
Свято-Варсонофиевскяй авань монастырьса ули церковно-историческяй музей. Экспозициясь аф пяк оцю, но мялень салай. Тяза пуроптфт ташта фотографият, конат пачфнихть монастырть историянц колга, документт и кудъётконь эрь кодама паршихть.
Аф ичкозе Свято-Варсонофиевскяй авань монастырть эзда, пцтай велеть песа, ули «Ноев ковчег». Тяфта лемневи зоопарксь, кона панжевсь обительть духовниконц и строяенц, архимандритть Алексиень мяленц коряс. Ичкозде ускф животнайхне тяса эряйхть аф тесна клеткаса, а якайхть теест тиф оцю паркова. Зоопарксь аф фкя киза ни салсесы инжихнень мяльснон, сувамась тоза питнефтома. Эрь кизоня шачендыхть животнаень од семьят. Оцю вольерса тяса эряйхть якт, лость, понит, верблютт, сяртт, шабракс теест арасть фазаттне и павлиттне. Кой-мзярда синь ёфси нолясазь клеткаста. Нармоттне аф пелезь якайхть ломаттнень малава. Эсь кядьса тиф аф оцю эрьхконяса уендихть акша и равжа локстихть, фкя-фкянь мельге якайхть мацихть, яксяркт. Зоопаркть территорияса ладяфт нюряпт, сяс кизоньберьф шабатне тоста афи лисендихть. А эше сёксеня, кда эендат, ули кода сявомс монастырьса пси чайня пяряка мархта.
Кафтошка кизода инголе Веляземи кизоть ётафнема ушедсть сашендома сенькст (аист). Фкя тунданя архимандритсь Алексий няезе, кода зоопаркть вельфке лиендсть кафта тяфтама нармотть. Сон мярьгсь тиемс пизонди шары лаца потмакс, и повфтамс сонь столбать пряс. Эряма вастсь тусь нармоттнень мяльс. Сеньксне тисть тяса пиза и лихтсть кафта лефкскат. Веляземонь од эряйхнень мельге ванць марнек велесь. Мзярда сенькс лефкскятне кассть, вастсь лоткась сатнемда. Сяс оцю сеньксне кадозь эряма вастснон и тисть пиза аф ичкозе кить эзда, святой лихтибрять малас. Конашкава мазыхть ня нармоттне! Кафта метрань кувалмоса акша пацясна няевихть ичкозе, синь лиендихть и лиендихть мокшень велеть вельхксса. Сентябрьста сеньксне тушендыхть меки лямбе шири. Тусть тянивок. А тунда мрдайхть меки, кода сашендсть и тяда ингольдень кизотнень.
Веляземи ламотне сашендыхть лихтибряти чёпафтома. Сон ащи 3 вайгяльбень вастса монастырть эзда. Азонкшневи, што вастть, коса ащи лихтибрясь, няезе онцтонза фкя сокор стирня. Мзярда сон штазе шаманц тя лихтибрянь ведьса, ушедсь няема. Источниксь петьфоль, мазоптфоль. Тиф часовня. Тяза сашендыхть лихтибрянь ведьса ронгонь-ваймонь аруяфтома кода Зубово-Полянскяй райононь эряйхне, стане и паломникне. А кафтошка кизода инголе архимандритсь Алексий няйсь велеть песа нинге фкя лихтибря. Сонь стане жа эстокиге петезь-тиезь.
Обительсь мазы сембе пинкнень. И кизонда, мзярда перьфоц вайси мазы панчфнень потмос, и сёксенда, мзярда шуфттнень тарадсна сюконякшнихть марьхнень сталмоснон ала, и тялонда, мзярда кузнятнень лангса эвондакшнихть Роштувань мазоптомбяльхне, и тунда, мзярда шуфттне щашендсазь сянгяря щамснон. Тя мазышись няфнесы ваймонь пефтома сетьмошить, конань марясы эрь ломанць, мзярда сашенды тя святой вастти. Кие сашендсь тяза хуш весть, сянь ули мялец мрдамс монастыри тага и тага.
О.Белкина.

Последние новости

В Мордовии открылись новые благоустроенные зоны отдыха

В Мордовии в этом году открылось сразу 7 новых...

Благодаря нацпроекту малый и средний бизнес Мордовии получает господдержку

Министерство экономики, торговли и предпринимательства РМ совместно с Центром...

В Ичалковском районе приводят в порядок 14 км дорог

В Ичалковском районе Мордовии по национальному проекту «Безопасные качественные...

Нацпроект помогает бизнесу Мордовии стать узнаваемым и привлекать новых клиентов

Министерство экономики, торговли и предпринимательства РМ совместно с Центром...

Дан старт приемной кампании по программам «Профессионалитета»

В Мордовии начинается приемная кампания в колледжи и техникумы...

Нацпроект помогает семейному бизнесу Турбиных из Мордовии 

Министерство экономики, торговли и предпринимательства РМ совместно с Центром...

В Мордовии модернизируют службу занятости

Мордовия вошла в число пилотных регионов комплексной модернизации службы...

В Мордовии открылись новые благоустроенные зоны отдыха

В Мордовии в этом году открылось сразу 7 новых пляжей. Средства на их благоустройство были предоставлены предпринимателям республики в качестве грантовой поддержки. Работы велись...

Благодаря нацпроекту малый и средний бизнес Мордовии получает господдержку

Министерство экономики, торговли и предпринимательства РМ совместно с Центром «Мой бизнес» оказывает поддержку предпринимателям Мордовии. Так, благодаря реализации национального проекта «Малое и среднее предпринимательство...

В Ичалковском районе приводят в порядок 14 км дорог

В Ичалковском районе Мордовии по национальному проекту «Безопасные качественные дороги» в 2024 году будет капитально отремонтировано порядка 14 км дорог. В мае начались работы на...