Россиянь УМВД-ть Саранск ошень округть эзга 4№ отделозонза пшкядсь 39 кизоса аля. Сон повсь мошенникнень килькшс—тянь колга пачфтсь сонць.
Валонзон коряс, аф кунара интернетса мусь питне лангс интимнай услугатнень макссемаснон коряс объявления.
Аф содафсь азсь пря администраторкс и мярьгсь, што стирть мархта васедеманкса молема тя-тона адресс коре.
Самок азф вастти, алясь тага ладясь соткст администраторть мархта. Ся азозень реквизиттнень, конатнень коряс эрявсь ётафтомс услугатнень и залог стирть безопасностенц и аппартаменттнень паршиснон ванфтомаснон инкса предоплата. Алясь ётафтсь 14 тёжянь цалковай азф счёттненди.
Тяда меле администраторсь мярьгсь, што алять муворшинц инкса счётсь повсь блокировка алу, сяс теенза пандома тиф ущербонкса. Сяда тов корхнематнень пингста мошенникнень ширде кулевсть гразямат.
Эводемок, алясь нинге несколькаксть ётафтсь ярмакт. Целайнек 167 тёжянь цалковай.
Тиф мошенничествать коряс внутренняй тевонь органонь сотрудникне ётафтыхть проверка.
Полафнесть парольхнень!
Кода пачфневи «Стопмошенник13» телеграм-каналса парольхнень эрявихть полафнемс. Тя или тона сервиснень эса улема аф фкя лацонь парольхненди. Кда аф мяляфтовихть, тевс нолясть парольхнень проверяф мессенджерснон—тя учётнай даннаентень ванфтомаснонды программась.
Парольть эса улеза аф 8-да кржа символ, тяконь лувксса полафневи регистрань букват, цифрат и специальнай символхт.
Тясть ноля тевс лепнень—тинценнеть, мала ломанентень и кудонь животнаентень. Аф нолямат тевс и сидеста васьфневи валхне и фкя-фкянь мельге моли символхне (кепотьксонди, gwerty или 123).
Парольть полафтомста полафнесть сембе знакнень, а аф фкя-кафта символхнень. Тиендесть тянь пяле кизоти весть.