Кода пачфни «Стопмошенник13» телеграм-каналсь, мошенникне васькафтозь Адыгея Республикаста 38 кизоса авать, надияфтомок теенза пачфтемс мебель Саранскяйста.
Полицияв поступась Адыгея Республикаста фкя авать эзда заявления. Эсонза сон пачфтезе, што мошенникне салазь 40-да лама тёжянь цалковаенц.
Авать валонзон коряс, социальнай сетьса мебелень вешендемста сон шарфтсь мяль мебелень мишенди группать лангс. Онлайн-лавкать страницац, кода азозе авась, активнаель, рамайхнень отзывсна верондафтсть. Организациясь ульсь Саранскяйса.
Авась тяштсь мишендити, пачфтемок, кодама мебель ёрай рамамс, кизефтезе питненц, мзярда и кода товарть пачфтьсазь теенза. Тяда меле мишендись аназе инголенди пандома лаца мебельть марнек питненц. Авась ётафтозе сонь азф счётти.
Несколька ши учсь, но мишендись теенза стаки ашезь отвеча, а товарсь ашезь са. Авась ёрась гайфтемс мишендити, но тевоц ашезь лисе. Меле талакодсь, што сонь васькафтозь и пшкядсь лезксонкса полицияв.
Внутренняй тевонь органонь сотрудникне тянь коряс ётафтыхть проверка, ванондови уголовнай тевть панжеманц квалма кизефкссь.
Мордовия Республикать эзга МВД-сь лятфни: «кирдесть пилентень стяда» питнефтома объявлениянь сервиснень вельде рамамста. Кда мишендись веши инголенди пандома, ули пелькс, што сон мошенник. Товарть инкса пандода получамдонза и проверямдонза меле.
Кода араламс пря мошенникнень эзда? Тянь колга пачфневи «Вестник Киберполиции России» и «Стопмошенник13» телеграм-каналхнень эса.