Ётай веконь кафксогемонце, вейхксогемонце кизотнень Атюрьевскяй райононь Каргоньжяй велень поселенияса эрясь Великай Отечественнай войнань лама ветеран. Гордостекс и прянь шнафтома вастокс ульсь И.И.Кичкаев. Сон сидеста васьфнесь школаса тонафнихнень мархта, азонкшнесь войнань аф тёждя кизотнень квалма, сянь колга, кода Каргоньжяень эряйхне тюрсть фашисттнень каршес. Иван Иванович лац содазень мокшень содаф поэттнень Р.Р.Федькинонь, В.А.Волковонь, П.К.Торопкинонь. Синь фкя пингоня тонафнесть Каргоньжяень средняй общеобразовательнай школаса. Мзярда педагогическяй трудонь ветеранць Е.Ф.Маланкина ётафнесь «Вирь мацихне мяляфтсазь куду кить» лем ала литературнай ила, кона лемтьфоль В.А.Волковонди, сашендсь и И.И.Кичкаев. Войнань ветеранць лятфнесь сянь квалма, кода Василий Афанасьевич покотькшнесь Каргоньжяень школаса мокшень кялень и мокшэрзянь литературань учителькс, кода повсь Сталинскяй лагерьхненди, кода сашендсь шачема-касома велезонза Сочиса эрямстонза.
Иван Иванович цебярь ялгаль М.В.Кондрашкинонди, войнань и педагогическяй трудонь ветеранти, Мордовинь Заслуженнай учительти, школьнай учебниконь авторти. Мзярда синь васьфнесть, лама корхнесть войнать колга. Михаил Васильевич—связистоль, лац содазе штабонь работать. А Иван Иванович—артиллериянь разведчиколь, Курскяй битвань участниколь. Тюрсь фашисттнень каршес Украинать, Молдавиять, Польшать, Чехословакиять инкса.
И.И.Кичкаев шачсь Каргоньжяй велеса 1924 кизонь 19 февральста. Меля теенза топодель 100 киза. Семьясна оцюволь. Иванда башка семьясост ульсть колма братт: Александр, Василий, Андрей, сазорсна Анна. Мзярда ушедсь Великай Отечественнай войнась, Иван Кичкаевонди кемзисемге кизоль. Васенда сонь кучезь тонафнема Атерень МТС-у. 1942 кизонь тундати получась механизаторонь профессия. Сокась и видесь паксят, урядась сёра. Эста велеса ашесть сатне механизаторхне. 1942 кизонь 8 октябрьста сявозь войнав. Васенда тонафнезе 76 миллиметрань орудиять, наводчиконь тевть, ляцендсь орудиять эзда шуфтонь макеттнень лангс. Тонафнесть шобдаста шобдас, вете частста сявомок кемонти молемс. 1943 кизонь 31 январьста курсанттнень кеподезь боевой тревогас коре и прважазь фронту. Васенце боенц Кичкаев васьфтезе Великие Луки ошть маласа. Тоста прважазь Брянскяй фронтти. 1943 кизонь 5 июльста ушедсь Курскяй дугаса тюремась, кона мольсь ведьгемонь ши и ве. Тя битвась пяк стакаль, ламоль шавфта и ранендафта. Аф ваномок сембе прябалатнень лангс, Иван Иванович вятсь дневник, коза сёрматкшнезень тюрематнень, фронтовик ялганзон колга эсь мялензон-арьсеманзон.
Вов мезе сёрмадсь эсь дневниксонза: «1943 кизонь 5 июльста командироньконь приказонц коряс стяфтомазь шобдава ниле частста колмогемонь минутаста. Частшка мольсь анокламась. Канонадать полафтозь «Катюшань» залпне. Меле менельса эвондасть немецкяй самолёттне. Синь эздост пяк ламоль. Ушедсть ёряма бомбат эшелононьконь лангс. Самолётта меле эвондась фашистонь артиллериясь. Тоса няеськ врагонь танкатнень, пехотать. Бойть пингста шавовсь лама ломань. Немецкяй снарядть эзда шавовсь орудиянь командирсь Арнольд Рорбах. Снарядонь сязевомась монь ёрдамань шири пушкать эзда. Кда аф касказе, шиса афолень ляда. Ушесь опаналь. Псить и ляцендемать эзда орудиятне сяшкава пситольхть, мярьгат, ушедсть солама, кядьце аф токафтови. Вдь фкя орудиянь расчётсь ётафнесь кафтонь боекомплект, а тя 160 снаряд. Шиньберьф противниксь тиендсь кемонень и сяда ламонь атака. Но минь кирдеме».
Тяда меле Иван Кичкаев тюрсь фашисттнень каршес Белгородть и сонь перьфканза ащи ошнень, велетнень инкса. 1943 кизонь 23 августста Курскяй битвась аделавсь. Верховнай Главнокомандующайть И.В.Сталинонь приказонц коряс младшай сержантти Кичкаевонди азфоль Благодарность.
Тяда меле Каргоньжяень цёрась ульсь Харьковса, Полтаваса. Тюрсь фашисттнень каршес и Украинаса. 204-це полкть составса тапась бандеровецнень эса.
1944 кизонь апрельста полксна прважафоль Молдавияв, Фалешты ошть малас. 13 июльста ушедсь Львовско-Сандомирскяй наступательнай операциясь. Пингстонза лац прянь няфтеманкса старшай разведчиксь Иван Кичаев казьфоль Великай Отечественнай войнань омбоце степенень орденца.
1944 кизонь ноябрьста Иван Кичкаев ранендафоль. Ранениясь ульсь аф оцю. Ащесь мзяра-бди ши медсанбатса и мрдась меки полкозонза, сяда тов кармась фашисттнень эса тапама.
1945 кизонь январьста Советскяй войскатне ётасть решительнай наступленияс. Ушедсь Висло-Одерскяй операциясь, кона аделавсь 1945 кизонь 3 февральста. Аньцек фкя шиста Якстерь Армиянь войскатне ётасть шинь озама шири нильгемонь вайгяльбе. Ся пингти Иван Кичкаев ульсь связистокс. Тапась врагть эса Катовице, Оппельн, Бреслау ошнень эса. Тястонь бойхнень инкса Иван Ивановичень Верховнай Главнокомандующайсь тага казезе Благодарностьса. Пингонь ётазь мужестванкса и отваганкса Кичкаев казьфоль «За отвагу» кафта медальса. А 1944 кизонь 9 апрельста младшай сержантсь Иван Кичкаев казьфль Якстерь Тяштень орденца.
Берлину лядондсь сизьгемоньшка вайгяльбе. Полкснон прважазь Чехияв. 1945 кизонь 5 майста Чехиянь ошнень эса ушедсть народнай восстаният. Мокшалять 204 полкоц кучфоль лездома восстаниянь кеподихнень шири. Тяса и васьфтезе 9 майть. 10 майста самоходнай орудияснон мархта прважазь Прагав, но тястонь бойхне аделавсть пяк вишкста. Немецкяй солдаттнень, конат ульсть Западнай Чехияса, сявозь пленц. Тяфта шумордавсь войнась И.И.Кичкаевонди.
Сон куду мрдась аньцек 1947 кизоня. Тяста васьфтезе сай пингонь рьванц Александра Павлушкинать, кона мрдась Блокаднай Ленинградста. Марса эрясть 62 киза. Касфтсть вете итть. Кулось Иван Иванович 2016 кизонь 30 июньцта. Теенза ульсь 92 киза.
И.И.Кичкаев куломозонза ванфнезе фронтста кучф алянц сёрманц. Сон тяштьфоль 1944 кизонь 20 июльста: «Шумбрат, цёрай. Мон кучан тейть красноармейскяй «пси» привет и люпштаса тонь види кядцень. Мон фронтсан. Простямак, мес шуроста тяшнян. Вастоньконь фалу полафнесаськ, аш адресозе. Тянивок сёрмадан эряскодозь. Аф содаса, няйхтяма нинге или аф. Тячи шисан, сяда тов аф содаса мезе кармай. Учан эздот ответ. Простямак. Тонь аляце».
Тя сёрмать тяни ванфтсы Кичкаевонь стирец, Анна Ивановна Кшнякина, кона эряй Темников ошса. Алянц мархта Иван Иванович ашезь васьфте. Сон шавовсь 1944 кизоня Латвиять сявомста. Калмаф Кактиеши велеть маласа.
Мзярда шисоль мокшалясь, тя сёрмать фалу каннезе мархтонза, няфнезе велеряензонды. Марясь оцю гордость алянц инкса. Васедематнень пингста сяда сидеста азонкшнесь аф эсь, а алянц колга. Тяни тянь пара мяльса тиендьсазь Иван Ивановичень уноконза и уноконь иденза.
Илья Вешкин.