Республикаса мольфтеви армияв тердемась

3 октябрьста Саранскяйса, Мордовия Республикань Пресс-центраса ётафтовсь республикань военнай комиссарть, полковникть Игорь Тихомировонь брифингоц. Сон лемтьфоль армияв тундань призывть итогонзонды и Мордовия Республикаса «Осень-2024» призывной кампаниять ётафтоманцты.
Корхтамок армияв тундань призывть итогонзон колга, военнай комиссарсь макссь теест цебярь оценка. Российскяй Федерациянь Вооружённай Вийхнень пяшкодемаснон коряс заданиясь, конань макссезе республикати Центральнай военнай округонь штабсь, пяшкотьф педа-пес. Округонь войскань командующайть приказса тундань призывть итогонзон коряс Мордовиясь путф кепотьксокс странань лия субъекттненди.
Корхтамок армияв сёксень призывть колга, полковниксь Игорь Тихомиров шарфтсь мяль сянь лангс, што срочнай службас тертьфне аф кармайхть кучфт специальнай военнай операцияв. Тоса служайхть аньцек офицерхне и контрактникне.
Республикань призывникнень армияв прважамасна ушедовсь 15 октябрьста сявомок. Синь кармайхть служама сухопутнай, стратегическяй назначениянь ракетнай, воздушно-космическяй, воздушно-десантнай и Национальнай гвардиянь войскатнень эса.
Республикань военнай комиссариатса панчф «пси линия». Призывной кампаниянь сембе кизефкснень коряс максовихть ответт (8342) 38-55-14 телефонть коряс. Тяфта жа ули кода максомс кизефкс «Госуслуги» порталть вельде и е-mordovia сайтса «Военный комиссариат» разделса.
Владимир Нестеров.