22 августста Саранскяйса ётафтовсть Российскяй Федерациянь Государственнай флагть шинцты лемтьф пуромкст.
1941-1945 кизотнень Военнай и трудовой подвигонь Мемориальнай музейса ламотне ванозь Российскяй Федерациянь и Мордовия Республикань символхненди лемтьф выставкать, Советскяй площадьса «Единай Россиять Молодой Гвардиянц» активистонза и «Единая Россия» политическяй партиять волонтёронза явондсть Саранск ошень эряйхненди триколор мархта лентанят.
Сяськомань площадьса ульсь Россиянь Государственнай флагть шинцты лемтьф мероприятия, конань эса примасть участия Мордовия Республикань Оцюнясь А.А.Здунов, Мордовия Республикань Государственнай Собраниять Председателец В.В.Чибиркин, Саранск ошень мэрсь И.Ю.Асабин, Саранскяй и Мордовскяй Митрополитсь Зиновий.
Торжественнай тя пуромкссь каннесь «Монь Государствазень флагоц» лем.
«Тячи пяк символичнай шись. Государстваньконь колма главнай неженза и символонза—гербоньке, гимнаньке и, конешна, государственнай флагоньке. Сонь оцю историяц—теенза савсь няемс и пичефкст-ризфт, и сяськомат. Но инь главнайсь—мархтонза мольсть тюремас атяньконь атясна, сон ульсь странаньконди гордостекс инь стака задачатнень решандамста! Тячи пяк эряви няфтемс кельгоманьконь и почётонь максоманьконь тя символти. Эрьда кородозь ванфтсаськ Российскяй Федерациянь Государственнай флагть!»,—мярьгсь Мордовия Республикань Оцюнясь А.А.Здунов.
Вечнай толть ваксса А.А.Здуновонь мархта Государственнай флагть кеподезь «Оцю перемена» Всероссийскяй конкурсть полуфиналистонза П.Красичкова, А.Коннова, В.Надькина и «Здоровое питание школьников» Международнай акцияса сяськихне Г.Исаков, А.Шукаева.
Кайгсь Российскяй Федерациянь Гимнась. Сяськомань площадьса Саранск ошень школань юнармеецне келептезь 14 метрань кувалмоса российскяй флагть.
Тяка шиня республикать столицаса ётафтовсь флагонь шити лемтьф автопробег. Саранскяйть инь сери вастсонза—Н.П.Огарёвонь лемса Мордовскяй государственнай университетть смотровой площадкасонза келептьфоль Российскяй Федерациянь флагсь.