Российскяй Федерациянь сенаторсь П.Н.Тултаев: «Кодама вастса афолеть работа, тевце тиендема виень аф ужяльдезь, ваймонь путозь»

Минь справканьке:
Мокшалясь Пётр Николаевич Тултаев шачсь 1961 кизонь 1 январьста Мордовскяй АССР-нь Краснослободскяй райононь Сире Сендру велеса. 1983 кизоня шумордазе Н.П.Огарёвонь лемса Мордовскяй государственнай университетть филологическяй факультетонц. Тяка кизоня ушедсь работама «Знамя труда» Краснослободскяй районнай газетать редакциясонза, сяда тов покодсь районнай радиовещаниянь корреспондентокс-организаторкс. 1985-1991 кизотнень трудендась комсомольскяй и партийнай оргаттнень эса. Аделазе Высшай комсомольскяй школать журналистскяй отделениянц. 1990 кизотнень ушетксста работась «Саранский курьер» газетаса.
1993 кизоста сявомок П.Н.Тултаевонь трудовой киц кемоста сотовсь культурать мархта. Саранск ошень Пролетарскяй райононь администрациянь культурань отделонь начальниколь, Саранск ошень администрациянь культурань отделонь начальникти заместителель. 2001 кизоня путфоль Мордовия Республикань культурань министркс, 2010 кизонь 11 мартста—Мордовия Республикань Правительствань Председательти заместителькс—Мордовия Республикань культурань министркс.
2012 кизоста сявомок Пётр Николаевич Тултаев Саранск ошень округонь администрациянь оцюняль.
2021 кизонь сентябрьста Мордовия Республикань Государственнай Собраниянь депутаттне максозь вайгяльснон П.Н.Тултаевонди Российскяй Федерациянь сенаторонь, региононь государственнай властень законодательнай органонь представителень, полномочиятнень максомаснон инкса.
П.Н.Тултаев—Российскяй Федерациянь Финно-угорскяй нароттнень Ассоциацияснон председателец. Кочкафоль тя вастти общероссийскяй общественнай движениять IV съездсонза 2009 кизоня.

Цебярь инжити кудботмось фалу кенярди. Тяфта корхтави пяк кунардонь фкя валмуворксса. Ашезе юмафта сон смузенц и тячиень шиня. «Мокшень правда» газетать редакциянц «кудботмоц» и минь, тя коллективса работайхне, аш ни кода кенярдеме инжити, кона ульсь редакцияса 17 июньцта—ширезонк сашендсь «Мокшень правдать» кунардонь ялгац, пара вайме ломанць, кона тяни работай Москуса Федерациянь Советса—Российскяй Федерациянь сенаторсь, региононьконь государственнай властень законодательнай органонц представителец Пётр Николаевич Тултаев.
«Мокшень правдань» коллективть мархта васедемась ётась лямбоста и, арьсян, ламос мяляфтови эрти эздонк. Мелянь сентябрьста газетаньке васьфтезе 100 кизонь юбилеенц. Сенаторсь, мокшалясь П.Н.Тултаев региональнай недялять пингста сась мяльс эсь сельмосонза няемс, кода эряй-ащи марнек масторлангса мокшень кяльса лисенди фкя-тяка газетась.
Пётр Николаевич коллективть мархта корхнемста шарфтсь мяль тячиень шинь условиятнень пингста национальнай массовай информациянь средстватнень работаснон эсь лацонь ширеснон и васьфневи прябалатнень лангс. Кода родной кяльть инкса пичеди афкуксонь патриот, крхкаста кизефнесь тяддень кизоть омбоце пяленцты подписной кампаниять молеманц, социальнай сетьтнень эса «Мокшень правдать» сяда келиста няфнеманц, предприятиятнень и властень оргаттнень мархта сотксонь кирдемать колга.
Сенаторть мялецоль кулемс и эрь шинь работаса васьфневи афсатыкснень и прябалатнень колга: корхтафоль аф оцю зарплататнень, кадратнень аф сатнемаснон квалма.
Азфтольхть мяльхть-арьсемат национальнай газетатнень, кода уникальнай изданиятнень, дополнительнай финансовай ширень кирдемаснон колга. Пара улель, кда мувольхть лисема вастт и тя кизефкссь решандаволь.
П.Н.Тултаев азозе, што редакциянь сотрудникне—патриотт, конат ащихть аф озадонь седихть и пяк пичедихть «Мокшень правдать», тядянь-алянь родной кяльть и лама тиендихть синь ванфтомаснон инкса.
Пара инжись шавонь кятть аф сашенды мзярдовок. Тяфта тись и Пётр Николаевич. Сон тись оцю казне аф аньцек газетать редакциянцты, но и республикань мокшень кой-кона велетненди—сёрматфтсь несколька кемотть экземпляр газета кота ковонди—тяддеть омбоце пяленцты.
Мялень салай васедемада меле сенаторсь П.Н.Тултаев отвечась кизефксоньконь лангс.
—Пётр Николаевич, Российскяй Федерациянь сенаторкс кочкамдот меле тя интервьюце «Мокшень правдати» васенцесь. Сяс кизефксоньке тяфтама: коса сяда стака работамась: тяса—регионца или Москуса Федерациянь Советса?
—Азса тяфта: кда ломанць покоди седикс-ваймокс, виень аф ужяльдезь, эрь вастса тёждя аф эрси. Ингольдень и тяниень пингонь работама вастоне аф фкат. Тяни стама вастсан, коса эряви аф эряскодома, сотф сон каготтнень мархта—тянь вешсы законотворческяй тевсь. Эрь документть анокламанц инкса аф кржа морафтома, содама, васьфнема ломаттнень мархта. Азса нинге весть: сенаторонь вастсь—тя ёфси лия уровенць, лия работась, сяс вешфксневок и тефневок лият. Покодян Наукать, образованиять и культурать коряс комитетса.
Работас коре лия ялгане инголи работасть региоттнень эса тя или тона должностьса. Но ингольдень мэрхнень эзда ётксост ськамонан. Фалу корхнян, што эрь од вастса эряви лама тонафнемс и тянь ули кода тиемс.
А кда корхтамс ингольдень работазень колга, пцтай кемонь кизот улень Саранск ошень оцюнякс. Тя пингсь тейне ульсь кода фкя кувака рабочай ши. Тялось, сёксесь, кизонь лия пинкне—ашине шарьхкотькшне молемаснон и ётамаснон. Кепотьксонди, тялонда ашель мзярда кеняртькшнемс васенце ловняти—китне эрявсть урядамс, кизонда тевда тага крга видева. Сашендовсь стяшендомс пяк и пяк рана, мртцемс куду поздна. Юкснине, што ули ёткши—тейне сон фалу ульсь рабочай шикс. И, азса, недляшиське. Пара, кда недляшиста удалсесь мрдамс куду кафтошка частта сяда рана лия шитнень коряс.
—Недляшистовок, лисенди, работать?
—Тя тяфта. Эрь недляшиня работасолень. Аф фалу тиендине тянь кабинетса, сяс мес тоса аф сяшкава лац няевихть прябалатне. Тянкса ётафнень «мэронь ёткшит». Пингстост марс кочксине тя или тона тевть мархта сотф сембе оцюнятнень, ётафнеме васедемат ломаттнень мархта. И ламоц кизефксне тяда меле курокста решандакшневсть.
—Пётр Николаевич, мрдатама сенаторонь тевценди. Кодама тефт сувсихть эрь шинь работазт?
—Кода ни азыне, основной работась—законотворческяй. Вяре азф комитетонь тевда башка, эрь сенаторти содама мезе тиендеви регионцонза, кода тоса ащихть тефне. Уликс прябалатне пачфнемат оцюняньконди и лезнема синь решандамаснонды.

Сидеста ётафневихть Комитетть заседанияц, «круглай шрат». Тейне пяк мала местнай самоуправлениянь темась, сон салсесы мялезень.
Кода сенаторонь, эрь ковня улендихть региональнай недяляне. Вов ня шитнень самай моли тяфтама недялязе. Сашендан Мордовияв и улендян райоттнень, велетнень, тонафнемань заведениятнень, организациятнень эса. Ули кода ваномс кода ащихть тефне вастова, кулхцондомс ломаттнень, конат крхкаста содасазь тя или тона прябалать, мезе, кодама Закотт эрявольхть синь машфтомаснон инкса. Меле ня мяльхнень-арьсематнень пачфтьсайть эсь оцюнятненди.
—Крхкаста азондоть и Саранскяйса, и Москуса работамацень колга. Аш кода аф лятфтамс и ёмла родинацень—Краснослободскяй райононь Сире Сендру мокшень велеть. Сидеста-аф удалси улендемс тоса?
—Ужяль, аф пяк сидеста, но седись фалу уски вели. Меля эряфста тусь тядязе. Но тядянь-алянь кудть аф юкснесаськ. Идень келеса ваксозонза путоме кудня. Оцю праздникнень пингста пуромкшнетяма тоза. Пяк кельгса озсемс кудть ваксс, сявомс кядезон гармошкать и лочазь-лочамс.
—Пётр Николаевич, тячи лама корхтаме национальнайть квалма. Но нинге мяленьке кулемс ответцень тяфтама кизефксть лангс: кодапт инь оцю прябалатне национальнай ширеть эса?
—Васенцесь, койсон, кяльть мархта сотфсь: кода сонь ванфтомс и виияфтомс. Сяда оцю мяль кяльть тонафнемста шарфтома од учебникнень нолдамаснон лангс. Тя, кда велетнень колга. А ошнень эса, кепотьксонди, Саранскяйса, мокшень и эрзянь кяльхнень тонафнемста эрявихть лия учебникт и программат.
Кда корхтамс фольклорть колга, то сон эряй-ащи велетнень эса. Тя тяфта. Тяфта тевсь моли снярс, мзярс шисот ванфтыенза—эряфкшу ломаттне. Тейне-арам, минцень национальнай театраньконди, эстраднай моронь морсиеньконди тиема тяфта, штоба творчествасна салселезе и од ломаттнень мяльснон. И национальнайть ванфтоманц и виияфтоманц мархта сотф тефненди водендакшнемат стирьхне и цёратне.
Тяниень пингть родной кяльть сяда крхкаста няфнема интернетса. Тянь ширде лац тевснон тиендьсазь мариецне и комитне. Арьсян, тееньковок улема сяда эрьгавкс. Штоба интернетса улельхть яндекс-переводчикт, электроннай валкст. Тянь лангса лама и аф кржа работама, эста и сатови арьсефсь.
—Пётр Николаевич, пингсь, ужяль, тяни аф сетьме. Россиять лангс водендаф ламоц странатнень кяжсна. Тейть, кода Россиянь Финно-угорскяй нароттнень Ассоциацияснон председателенцты, кизефкссь тяфтама: кода тяни латцевихть и кирдевихть сотксне Эстониять, Финляндиять, Венгриять мархта?
—Ужяль, тяниень пингть сотксне аф кодамот. Ули кода азомс, Финляндиясь, Эстониясь и Венгриясь—моногосударстват. А минь государстваньке—лама нациянь. И странатне, конатнень лятфнеськ, фалу ёрасть тянь нолдамс тевс политикать мяльса кирдезь. Коль «тонафтсть» эсонк. Мекольдень пингть, сялдомада башка, ширдест куленттяма лама мезе аф цебярь. Но минь кирдьсаськ странань Президентоньконь ширенц. И Оцюняньке—тя Россиянь Президентсь В.В.Путин! Аф ащетяма подданнайкс аф Финляндияти, аф Венгрияти, аф Эстонияти. Лятфтасть, што мзярда ушедсь Украинаса специальнай военнай операциясь, Финляндиясь, санкциятнень апак учсек, пцтай васенцекс нолдазень каршезонк эсь санкциянзон—лоткафтозе пассажирскяй машина кинь сообщениять. Тячиень шити сотксне сембе «эендафтфт».
—Кода ётафнесы ётка пингонц Российскяй Федерациянь сенаторсь П.Н.Тултаев?
—Кда эвондакшни ётка пингозе, ёран кой-мзярс ськамон сетьмошиса ащемс. Ули аф оцю перенязе, кельгса модать мархта работамазень. Тя мялезон. Кельгса театратнень, выставкатнень эса улендемазень. Аф сидеста, но удалси тянь тиендемс. Морафнян книгат. Аф электроннайхть, а кагодонь. Кельгома авторне А.П.Чехов, М.А.Булгаков, А.И.Куприн, Ф.М.Достоевский, С.Д.Довлатов и лиятне. Синь произведенияснон морафнине аф весть. И, конешна, аф явондан гармошкать мархта.
—Тон, Пётр Николаевич, эряфоньберьф кирдят кеме соткст «Мокшень правдать» мархта, фалу морафнесак сонь. Азыть колганза мяльхнень-арьсематнень кода мокшаля-патриот, сенатор и ломань, кона сонць аф фкя киза работась журналистокс.
—Няеви, што газетась мекольдень пингть одкстомсь, «эреклась» и арась сяда мазыкс и мялень салайкс. Кяльсь «Мокшень правдаса» афкуксонь мокшень. Конешна, улихть производственнай материалхт, коса васьфневихть рузонь валхт, но синь аш кода ётафтомс или полафтомс лияса. Кельгса «Минь семьяньке» рубрикать. Арьсян, кой-коста макссема литературать мархта сотф страницат: аф оцю азкст, стихт. И аф юкснема минцень мокшень мороньконь колга. Пара улель, кда газетаста синь кулхцондомс улель кода QR-кодть лангс телефонть водендаманц вельде. Пара, што азонттада труженикнень, виень аф ужяльдезь покоди ломаттнень колга. И тясть юксне пидемань-панемань национальнай кунардонь рецепттнень. Суронь пачатнень, афкуксонь бозать рецептснон кой-кит пцтай аф содасазь. И моньге тячиень эряфсон сидеста аф сатнихть афкуксонь суронь пачатне, бозась, калацясь… Тройцянь цюкорсь сельминголен тянемс!
—Спасиба!
Т.Альшина.

Последние новости

Нацпроект и снижение смертности при ДТП

В рамках национального проект «Безопасные качественные дороги» в Мордовии...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта,...

Саранск встретил март «Весенней ярмаркой подарков» 

1 марта в столице региона, при поддержке Министерства экономики,...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение»...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29...

Благоустройство Дубенского района Мордовии

Центральная площадь вс. Дубенки, 2 общественные территории в с....

Нацпроект и снижение смертности при ДТП

В рамках национального проект «Безопасные качественные дороги» в Мордовии реализуется региональный проект «Безопасность дорожного движения». Одна из его задач – сокращение смертности в результате...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание построено в 1974 году и давно требовало ремонта. В 2023 году по национальному проекту «Культура»...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта, прошла дискуссия «БРИКС: новые вызовы в эпоху глобального развития». На мероприятии также прошли дебаты «Приоритеты и...