12 июньцта республиканьконь столицаса келиста и весяласта васьфтьфоль-ётафтфоль Россиянь Шись и Саранск ошть шиц—тядде теенза топодсь 381 киза. Выставкат, концертт, театрализованнай представленият ульсть ошень сембе райоттнень эса. Илась пуропнесь тёжятть ломань.
Кода фалу, Россиянь Шити и Ошть шинцты лемтьф мероприятият ётафтовсть Советскяй площадьса, А.С.Пушкинонь лемса культурань и ваймамань паркса, Тысячелетиянь площадьса, Саранка ляйть набережнайса. Кафтонь-крдань илась ушедовсь кабаконашка Российскяй флаг мархта шествияста. Акцияса примасть участия школань тонафнихне, средне-специальнай тонафнемань заведениянь и вузонь студенттне. Сембоц 500 лама ломань. Тёжятть ошеряйсь васьфтезь колоннать Советскяй площадьса. Тяса жа ётафтфоль асфальт лангса идень рисункань конкурссь—площадсь шарфтсь оцю картина лангс. А фонтаннай спусксь и А.С.Пушкинонь лемса парксь тя шиня арсесть афкуксонь мастеронь ошекс. Тяса пуроптф декоративно-прикладной творчествань выставкаса эсь тифксснон няфтезь Саранскяень и муниципальнай райононь машты кядь ломаттне. Шуфтста керсеф налхкшт, вяшкомат, мокшень щамса-карямса щаф някат, мазоптомбяльхть, сёвоньцта тиф кукшеннят-месть—сембось мушендсь тяса васта.
Мялень салайста ётась мокшэрзянь национальнай культурань «Шумбрат!» ошень фестивалень театрализованнай парадсь-шествиясь. Национальнай щамса щаф-каряф ломаттне кштизь-моразь аськолясть ошть центральнай ульцянзон эзга. Обедта меле Советскяй площадьса весяласта ётась «Россия многонациональная!» национально-культурнай автономиятнень и объединениятнень концертсна. Руст, татархт, мокшэрзят, украинецт и лия национальностень ломаттне пуромкшнесть фкя сцена лангс и няфтезь эсь народснон культуранц, морасть родной кяльсост морот. Лама ваны сашендсь «Играй, гармонь!» народнай творчествань ошень праздникс. Гармониять седиень токай морамац нинге ичкозде тердсь ошеряйхнень и инжихнень эса. Ламотне кштисть коряванза виень аф ужяльдезь.
Тяда башка, ётафтфтольхть аф фкя лацонь викторинат, конатнень пингста пуромфне содасть лама одня эсь кельгома ошснон колга. Оцю концерт ульсь «Мордовия Арена» стадионца. Эсь выступленияснон мархта ошеряйхнень и инжихнень кеняртьфтезь российскяй содаф коллектифне и артисттне. Шумордавсь илась мазы салютса.