Россиянь военно-историческяй обществать Мордовскяй региональнай отделениянц председателец, историческяй наукань докторсь, профессорсь Галина Куршева:«Работатама Отечествать историянц видешинц ванфтоманкса и сяда содафокс тиеманкса!»

—Галина Александровна, кодама работа тячи вяти историческяй видешить ванфтоманкса Россиянь военно-историческяй обществать Мордовскяй региональнай отделенияц?
—Тейнек эряви ванфтомс и пачфтемс од поколенияти Отечестваньконь историянц стамкс, кодамкс сон ульсь афкукс.

Кода содаф, Советскяй Союзть срадомдонза меле Россияса и ингольдень советскяй республикатнень эса ушедсть активнайста работама омба масторонь идеолокне, политолокне, историкне, общественнай деятельхне. Синь Соросонь и омба масторонь лия фондонь средстватнень лангс ушедсть тапама нароттнень, конат эрясть фкя странаса, национальнай и историческяй самосознанияснон эса.
Тевсь пачкотькшнесь сянди, што Россиянь школатнень эса ученикне эсь Отечестваснон историянц тонафнезь ся учебникнень коряс, конат печатлафтольхть Соросонь ярмаконзон лангс. Историянь тя учебникса, мярьктяма, Курскяй тюремать колга азондови фкя абзацса. Тяка пингть келиста азондови американецнень и англичаттнень Нормандияв валгомаснон квалма. А синь тянь тиезь аньцек 1944 кизоня, мзярда ни няезь, што Советскяй Союзсь сяськсы фашистскяй Германиять.
Тячи ня учебникне Россиянь школаста сявфт. Иттне тяни Отечествань историять тонафнесазь од учебникнень коряс, конат аноклафт и нолдафт Россиянь военно-историческяй обществать председателенц Владимир Мединскяень руководстванц ала.
Историческяй видешить ванфтоманц эрявиксшинц колга лама азондонь сяс, мес лувихненди эряви шарьхкодемс, кодама оцю работа ётафтыхть тячи Россиянь военно-историческяй обществась и сонь региональнай отделениянза историяньконь видешинц ванфтоманкса и од поколенияти пачфтеманкса.
Кда корхтамс Мордовиянь региональнай отделениять тевонзон колга, эряви азомс: лама ширень работаньконь вельде минь касфттама иттнень и од ломаттнень эзда эсь странань патриотт!
Тя тиендеви странань и республикань историянь инь няевикс сатфкснень-сяськоматнень иттнень и од ломаттнень ваймос-ёньц сувафтомаснон вельде. Кепотьксонди, тяддень 10 октябрьста Саранск ошень округонь Николаевка посёлкаса минь путоме Мялямонь доска Советскяй Союзонь Геройти Константин Алексеевич Карачковонди. Сон тяса шачсь-кассь и тяста тусь фашисттнень эзда Родинать аралама.
Маластонь пингть республикаса путтама Мялямонь нинге кемонь доскат Советскяй Союзонь Геройхненди—минь земляконьконди.

Вяттяма школатнень, колледшнень и вуснень эса тонафнихнень ёткса историческяй мялямть ванфтоманкса просветительскяй оцю работа. Няфнетяма теест кинофильмат, конатнень тиендьсаськ минць, Советскяй Союзонь Геройхнень, Сурскяй рубежень строительхнень, фронтонь и тылонь лия геройхнень боевой и трудонь подвигснон колга.
Тяфта жа келиста ноляви тевс историческяй видешить ванфтоманкса Мордовиянь региональнай отделениянь члеттнень научно-публистическяй потенциалсна.
—Кодама форматса тя тиендеви?
—Мордовиянь региональнай отделениянь ламоц члеттне работайхть республикань Правительствать видеса гуманитарнай наукань НИИ-са. Институтсь ноляй «Центр и периферия» научно-историческяй журнал, научно-историческяй сборникт, коса теест ули кода азомс-пачфтемс лувихненди эсь профессиональнай мяльснон Отечестваньконь историянц тя или тона тевонзон-событиянзон квалма.
Тяда башка, Отечестваньконь историянц кяльготнемада ванфтоманкса келиста нолясаськ тевс интернетть. Азондсаськ эсь мяленьконь историческяй наукати лемтьф сайтса и ётафнетяма онлайн-форматса научнай конференцият, диспутт и лия мероприятият, конат лемтьфт историяньконь видешинц ванфтоманцты.
Мекольцесь эздост всероссийскяй научно-практическяй конференциянь форматса ётафтфоль тя кизонь 27 сентябрьста. Конференциять теманц коряс—«Россиянь историять фальсификацияда ванфтомац: теоретическяй и тевс ноляви аспекттне»—эсь мяльснон азозь Мордовиянь и Россиянь лия региононь военно-историческяй обществань члеттне, республикань и странань лия субъектонь общественнай организациянь представительхне, Санкт-Петербургонь, Ижевскяень, Пензань, Чебоксарынь, Саранскяень содаф историкне.
Эряви азомс, Всероссийскяй тя конференцияса мон кочкань од содамошит. И сембе синь, конешна, нолдавихть тевс Мордовиянь региональнай отделениять работаса.
—Галина Александровна, соотечественниконьконь араламанкса специальнай военнай операциять ушедовомда меле, койсон, кизефкснень лувкссна, конат ащихть Россиянь военно-историческяй обществать инголе, ламода кассь.
—Афкукс, тя тяфта. Од кизефкснень-вешфкснень колга, конат тячи ащихть минь инголенк, корхтамась мольфтевсь III Всероссийскяй семинарса, кона тяддень 6-8 октябрьста Сочи ошса ётафтовсь РВИО-нь региональнай отделениянь руководительхненди.
Семинарса минь кулхцондоськ Россиянь Президентть помощниконц, Россиянь военно-историческяй обществать председателенц Владимир Мединскяень видеообращениянц. Сон мярьгсь: «Странань эрь регионца, конатнень ётксот од региоттневок, тячи работайхть Россиянь военно-историческяй обществать отделениянза. Аньцек мекольдень колма кизотнень Россиянь военно-историческяй обществась тись-панчсь кемотть музей, мемориал. И курок од монументальнай проектт ётафтовихть эряфс странань од региоттнень эса».
Сяльде семинарса минь корхтафтоськ од ломаттнень патриотокс касфтомаснон, историческяй и культурнай наследияньконь и уликсоньконь ванфтомаснон-виияфтомаснон, Отечестваньконь военнай историянц сяда содафокс тиеманц, военно-историческяй проекттнень эряфс ётафтомаснон коряс рабочай опытть фкя-фкянди пачфтеманц и эрявикс лия тематнень.
III Всероссийскяй семинарса тиень доклад Мордовиянь региональнай отделениять сатфксонзон, тячиень и сай пингонди арьсеф тевонзон колга.
—Удалаза арьсефонте, Галина Александровна.
—Сюкпря!
Владимир Нестеров.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии внедрен безбумажный электронный документооборот

В рамках регионального проекта «Цифровое государственное управление» национального проекта...

Предпринимателей Мордовии научат создавать короткие видео-«REELS»

Министерство экономики, торговли и предпринимательства РМ совместно с Центром...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...