Ельниковскяй району якамстонк улеме Каньфкуж мокшень велеса, мезть колга пачфнеме ни газетасонк. Но аф фкя материал тоста ускоме, сяс ся командировканьконь ули кода лемдемс «урожайнайкс». Сятнень ёткса, кинь мархта удалась васьфтемс и седикс-ваймокс корхнемс, ульсь и Каньфкужса шачф-касф мокшалясь, Россиянь Заслуженнай художниксь Иван Черапкин.
Мзярда саме Иван Ивановичень кудонц малас, сон, кода корхнихть мокшетне, крга видева заняфоль тевса. Якстерь кирпицьста строяф тядянь-алянь кудти Иван Иванович тись пристрой, сяс тянь мархта сотф тефне лаказь лакасть. Эстокиге мяль шарфтоме вов мезть лангс: кудть каршеса, кить туркс, сёксень шить сюролданзон ала эжнезь кенерьф бокснон оцю тиклатне, вакссост нинге аф кунара кассь модамарьсь, конань мокшалясь таргазе ни. Урожайсь, тянь содаськ меле, аф кальдяволь. Цебярь азоронь кядсь няевсь сембоса. Тевсь сянь эса, што мекольдень пингть Иван Иванович пцтай фалу эряй ёмла родинасонза—Ельниковскяй райононь Каньфкуж велеса.
Корхнеманьконь ушедомста эняльдеме Иван Черапкинонди азондомс эсь колганза. Сон—Россиянь Заслуженнай художник, содаф скульптор, а вдь лама кизода инголе сембось ушедсь тяса—мокшень велеса.
Шачсь Иван Иванович Каньфкужса мокшень семьяса, коса ульсть ниле итть. Тядяц, Пелагея Константиновна, зрнянь кядь мокшаваль, афкуксонь мастерицаль: маштсь мокшень щамонь стама, сюреса сёрмадома, кружевань кодама. Цёранц лятфнеманзон коряс, шачфтыец сонць котцесь котфт, кройсезень синь, сташендсь панархт, конатнень меле сёрматкшнезень сюреса. Пелагея Константиновнань кядензон алда лисьф панархне содафтольхть аф аньцек Каньфкужса, но и райононь ламоц лия велетнень эса, сяс мес мастерицати заказонь тиема сашендсть ламотне.
Семьянь азорсь, Иван Осипович, Великай Отечественнай войнань ветеран.
Цёрасна Иван кельгозе шачема велеть перьфпяленц, коса кожфське аруволь, нармонень моротневок кайгсть сяда сидеста. Тя сембе пингс сувась ваймозонза, а ёмла родинать колга лятфнематне эжнезь седиенц Москуса эрямстонза.
Мархтонк корхнемста Иван Черапкин шназе школать и учительхнень, конат эста ульсть велеса. Учительхне марясть гордость, сяс мес работасть Каньфкужень школаса. Синь макссесть тонафнихненди кеме содамошит, эрь уроксь педа-пес арьсефоль.
Учениксь Ваня Черапкин пяк кельгозе рисовандаманц: Каньфкужень перьфпяльть, животнайхнень, ламоть лиять.
Сисемце классть шумордамдонза меле Иван тусь Саранскяи и поступась идень художественнай школав. Мордовиянь содаф педагогсь и художниксь Пётр Рябов няезе мокшень цёранять эса уликс асушить, шарьхкодсь, што эздонза лиси цебярь скульптор, сяс сембоса кирдезе ширенц и лездсь мезьса маштсь.
Пингонь ётазь Иван Черапкин поступась Саратовскяй художественнай училищав. Ся пингс мокшень цёрась кенерсь служамс армияса, покодемс заводса, колхозса.
Саратовса скульптурнай отделенияса Иван Иванович тонафнесь оцю мяльса. Сонь шумордамдонза меле кучфоль работама Саранскяи художественнай школав, лепамань и рисованиянь учителькс. Ингольдень тонафтыец, школать директороц Пётр Рябов сидеста корхнесь Иван Черапкинонди, што теенза эряви тонафнемс сяда тов. Мокшалясь тяфта и тись. Максозень документонзон Москувонь высшай художественно-промышленнай училищав. «Строгановкав» мархтонза сявозень работанзон: рисунканзон, гипсста, сёвоньцта скульптуранзон. Конкурссь пяк оцюволь, а тонафнема сявсть, скульпторть лятфнеманзон коряс, аньцек кота ломатть. Ётксост ульсь и мокшалясь.
Москуса тонафнесь вете кизот. Тияк улендсь выставкатнень эса. Дипломть получамдонза меле Иван Иванович лядсь эряма столицав. Аф ваномок тянь лангс, Мордовиять ашезе юксне. Сашендсь Каньфкуж вели, улендсь Мокша ляйть трвасонза, ётафнезе ёмла родинати лажатфонц и тушендсь меки Москуву.
Эста сон лама работась монументальнай и станковай скульптуратнень мархта.
Мзяра пингонь ётазь, Иван Иванович тертьфоль В.И.Суриковонь лемса Москувонь государственнай академическяй художественнай институту, коса работась несколька кемотть киза—ульсь скульптурань кафедрань профессоркс и колма кизот тиендезень институтонь скульптурнай факультетонь деканть тевонзон.
Тонафнихненди мокшалясь фалу корхнесь, што аф эряви панцемс оценкатнень мельге, а эряви венемомс содамошитненди, сяда лама тонафнемс.
Сонць скульпторсь работанзон тиендезень бронзаса, мраморса, тонадозе и шуфтть мархта работамать. Улихть ётксост и Мордовияти лемтьфт: «С.Д.Эрьзя», «Мордовская легенда» и стак тов. Мордовияса ётафтфоль персональнай выставкац, конань пингста няфтьфтольхть 50-ть малава скульптурнай произведенияц. Тяда башка, тоса ульсть и пейзажнай этюдонза. Эста «Патриарх Никон» гипсста работанц Иван Иванович казезе С.Д.Эрьзянь лемса изобразительнай искусствань музейти.
Мокшалять работанза коса аньцек ашет! Удмуртияса сон тись несколька метрань серьса «Укрощение огня» композиция, 1990 кизоня Казахстанца Сокологоровка велеса ладяфоль мемориальнай комплексоц, Победать 50 кизонцты лемтьф Мемориальнай комплексть автороц (Тюменскяй областсь), Москуса ащи уголовнай розысконь сотрудникненди лемтьф Михаил Архангелонь меч и щит мархта скульптурац…
Иван Черапкин кой-мзярс работась Китайса—профессорсь Восточнай международнай художественнай институтса преподавателель.
Мзяра скульптура мастерсь тись тняра кизоста? Пяк и пяк лама! «Мокшень правдать» фкя номероц аф саты, штоба азомс синь. Аф явонды скульптурать мархта мокшалясь тянивок—Каньфкужса эрямстонза. И, валонзон коряс, тя веледа цебярь васта теенза аш!
Татьяна АЛЬШИНА.
Фототне Николай Карановонь.