Сабантуйсь—Мордовияса

Тундань мекольце шиня Лямбирьса ётафтовсь Сабантуй национально-фольклорнай ила—тя мялень салай события, кона пуропни региононь тёжятть эряй и инжи.
Мордовиянь Оцюнять Артём Здуновонь лемста илань инжихненди и участникненди пшкядсь МР-нь Государственнай Собраниять Председателец Владимир Чибиркин. Сон шарфтсь мяль, што Сабантуйть козят коенза-обуцянза и сон фалу ётни нароттнень ёткса ялгаксшисна.
Башка мяль шарфтфоль сятненди, кие тячи тюри Сяськомать и Родинаньконь инкса. «Сюконятама соотечественниконьконди, конат аралайхть Отчизнать эса. Эсь ширденк минь макссетяма благотворительнай лезкс специальнай военнай операциянь участникненди и синь семьяснонды. Арьсян теенть шумбраши, мир, цебярь эряф. Ила мархта, кельгома ялгат!»—мярьгсь Владимир Чибиркин.
Татарстанонь Оцюнять Рустам Миннихановонь лемста Сабантуень инжихнень приветствовандазень Татарстан Республикань экологиянь и природнай ресурсонь министрть заместителец Ильнур Насретдинов: «Сабантуйсь няфнесы татаронь культурать козяшинц и сонь сабобытностенц. Пуромкшнемок марс, минь няфнесаськ атянь атяньконь наследникснонды койхненди-обуцятненди кельгоманьконь, шарфнесаськ лангозост од поколениять мяленц»,—мярьгсь сон.
Главнай сценать лангса илать торжественнай пяльксоц панжевсь «Мы—единое целое» театрализованнай прологса. Чествовандафтольхть велень труженикне.
Сяда тов праздниксь поладовсь мялень салай конкурснень и спортивнай пялькстоматнень мархта. «Подворья Сабантуя» площадкаса няфтьфтольхть Мордовия Республикань и Татарстан Республикань Нурлатскяй райононь национальнай подворьятне. Тяса инжихненди ульсь кода содафтомс традиционнай ремеслатнень мархта, варжамс национальнай кухнянь ярхцамбяльхнень.