Садовкась, веленязе монь

Тя мезть Николай Васильевичень ашель мялец самс эсь легковой машинанц мархта. Ковылкинаста сон озась маршрутнай автобусти. Ёрась корхнемс земляконзон мархта, конатнень няендезень аф сидеста. Автобуссь аф эряскодозь ардсь ся васттнень эзга, коса теенза сембось содафоль: вирьхне, паксятне, Мокша ляйть пойманза. А вов и автобусонь лотксема вастсь. Тястонь эряйхне лемдезь сонь Садовайкс.
Шоссейнай кись тя остановкаста мзярда-бди вятсь Садовка, Ежовка и лия велетненди. Синь ащихть мазы вастса. Да и целайнек Ковылкинскяй районть перьфпялец мазыдонга мазы.
Остановкать ваксса улихть сери и ровнай вастт, конат малаткшнихть Троицк кунардонь велети.
Сембе тя мазышить ланга шуди Мокша ляйсь. Шадоть пингста сон лисенди трванзон эзда, вельхнемок ведьса лугатнень, паксятнень, эрьхкнень.
Автобусонь лотксема вастста Николай Кудашов тусь Садовкать ширес, ся веленяти, коса ётась идькспингоц. Пилькне синць кандозь сонь содаф васттненди.
Пачкодсь Садовкати. Сон вайси саттнень потмос. Моли Николай Васильевич и ваймоц морай, сяшкава пара мялезонза. Нльне ашезь талакода, кода пачкодсь шуфтонь кудонц ваксс. Кеме «пятистенкать» строязе аляц Василий Кудашов. Садовкаса сон содафоль кода семьянь цебярь азор и хозяйственник. Лама киза мельцек вятезе полеводческяй бригадать, тевонц тиендезе лац.
Кудонь кенкшть кунара ни аф панчсесазь Николай Кудашовонь тядяц, аляц, бабац. Родной тядяц, Елена Петровна, кунара ни аш шиса. Дуся, Анна, Николай пяк рана лядсть тядяфтома. Синь касфтозь пяк цебярь авась, Мария Фёдоровна, алясна, Василий Иванович, бабасна, Аграфена. Пингонь ётазь Мария Фёдоровнань семьяц кассь: авась шачфтсь нинге кафта дуганнят—Василиень и Иванонь. Оцю семьясь фалу марязе тядянь кельгомать.
Николай Кудашов панжезе кенкшса нюрьги замокть, сувась тядянь-алянь куду. Кафта комнататнень эса сетьмоши. Алясь ёрась, штоба кулеволь тядянц вайгялец: «Вай-вай, цёранязе сась». Срмаф шамасонза эвондаль пеедема, кона эжделезе Николай Васильевичень ваймонц. Но аш ни шиса родной инь мала ломанец. Аньцек мялямсь ванфтсы сонь.
—Кода аф лятфтамс кельгома тядязень,—весть виденцясь Николай Васильевич.—Сестранень Дусянь, Аннань и монь кадомазь рана.—Но минь оцю спасиба азонттама омбоце тядяньконди Мария Фёдоровнанди, кона касфтомазь.
Алясь озась шуфтонь ташта скомнять лангс. Варжакстсь стенаса нюрьги тюжяза фотографиятнень лангс. Фкять лангса аляц, Василий Иванович, омбоцеть—дуганонза, Иван и Василий. А вов и сестратне Анна и Дуся. Конашкава пара улемс кудса, коса ётафтыть идькспингцень. Сетьмоши. И тага сельминголет фотографиятне. Мала сембе ломаттне щафт-каряфт мокшень щамса.
Николай Васильевич лиссь кудста. Аф эряскодозь тусь саду. Яннятнень лангса тяни касы тише.
Лятфтазе, кода инголи велень ульцятненди кочксевсть стирьхне и цёратне. Кизонда илять тернезень синь гармониять вайгялец. Кочксевсть группань, конатнень эса ульсть эсь гармонистсна. Содафтольхть велеса гармонисттне Яков Анашкин, Степан Аношкин, Егор Парамонов, Иван Карпунин. Пётр Якушкин аш ни кода лац кштись сиде моронянь морамста.
Николай Васильевич лиссь оцю садста и варжакстсть куттнень фтала перетнень лангс. Ламотне эздост кассть сор тишеса, кунара ашезь работа мархтост азоронь кядсь. И самай ня сор тишетне кяшезь сембе перьфпяльть.
Алясь крхкаста таргазе ваймонц. «Кельгома веленязень судьбац аф ломанень кядьса ни»,—сетьмоста мярьгсь сон. Мяленза-арьсеманза тага мрдафнезь ся пяк цебярь пингти, мзярда эрясь сон шачема-касома уженясонза.
Трудонь ветеранть лятфнеманза сембе пингс лядсть мялямозонза.
Владимир КОРЧЕГАНОВ,
СССР-нь Писателень
союзонь член.