Елизавета Ивановна Надина аф кунара отмечазе эсь 65 кизонь юбилеенц. Ванат мокшавать лангс и аф верондат, што теенза тняра киза. Няеви одста, отькорьста. Кона тевти аф кярьмоди, кядьсонза лаказь-лакай. Да и кяльцевок аф шарфтови лемдемс сонь сире ломанькс.
Колма семьят, колма поколеният эряйхть Надиттнень кудса. Инь сиресь Елизавета Ивановнань авозец, Матрёна Петровна. Сон передовой дояркаль Атерень «Память Ильича» колхозса. Мирдец, Михаил Васильевич, кулось пяк рана. Кафта цёранзон, Кузьмань и Иванонь, касфтозень ськамонза. Ёфси одняста тусь эряфста и Елизавета Ивановнань мирдец, Иван Михайлович. Покодсь Атерень внутренняй тевонь отделса оперативнай дежурнайкс. И вов кемонь кизот ни мокшавась удава. Мирдьфтома кеняртькшни идензон, уноконзон сатфксснонды.
Оцю кельгомаса шачфтозь и касфтозь кафта идьснон. Михаил Иванович эряй родителень кудса. Трудендай Торбеевань полициянь отделса, майор. Оцю стирец, Ангелина, Н.П.Огарёвонь лемса Мордовскяй госуниверситетонь студентка. Екатерина тонафни Атерь велень 1№ средняй общеобразовательнай школаса.
Елена Ивановна заняф мишендемань тевса. Мирденц, Пётр Васильевичень мархта касфтыхть кафта цёрат. Оцюсь, Максим, служай армияса. Сергей тонафни райцентрань 1№ школаса. Е.И.Надинати мзярдовок инксост аф ули визькс. Касфтозень синь трудонь кельгикс, кулхцондыкс. Мокшававсь ульсь и ляткшни теест цебярь примеркс.
Елизавета Надина шачсь и кассь Атерь велеса Пятакофнень семьяса. Арьсекшнемс вузонь колга ашель мзярда. Сась покодема районнай потребительскяй обществав. И марнек эряфонц лемдезе мишендемань тевти. Лац покодеманкса казьф лама оцю казнеса.
8 Мартста, Авань шиня, Е.И.Надинать кудоц фалу пяшксе инжида. Сон аф аньцек кельгома тядя, ава, баба, но и ака. Елизавета Ивановна фалу лезнесь теест стака пингста, макссесь советт, ульсь пшкядема, нежедема вастокс. Тянемс тяфтамкс и ляткшни.
Илья Вешкин.