Специальнай военнай операциянь участникненди лезнихть ламотне. Кинь мезьса ули виец тянь тиемс, сят и примсихть участия эрявикс марстонь тя тевса. Аф вихца, аф кошардозь, а сяс, мес тянь вешсы ваймось. Школатнень эса тонафнихне боецоньконди тяшнихть сёрмат и рисовандакшнихть рисункат, оцю и эряфкшу ломаттне кочксихть гуманитарнай груст и прважсесазь синь специальнай военнай операциянь ётафтома васттненди. Мезе сувси эзост? Сембось, мезсь эряви аляньконди и цёраньконди. Лезкс мархта аф фкя машина прважафоль Саранск ошень Иоанн Кронштадскяень храмста, конань настоятеленц протоиерейть отец Владимир Кугушевонь, прихожаттнень и благотворительхнень пара тевснон колга «Мокшень правдаса» пачфнеме ни. И тячи сяда тов азонттама, кода тяса стаки мольфтеви боецоньконди лезксть максоманц коряс ладяф работась.
Республикать столицанц Солнечнай ульцясонза ащи храмти эсь мяльс коре лездыхть сашендыхть пцтай эрь шиня. Маскировочнай сетень кодамась, окопонь штатолонь тиемась, ярхцамбялень кочкамась—тя пяк лама тефнень эзда аньцек кой-конатне. И, башка китькстаса, синь мольфтевихть фалу. Тяда башка, лезкс мархта машинат прважсевихть Ромоданова посёлкаста Божией Матерть Казанскяй шкаень ликонц церькавста, коса настоятельсь стане жа отец Владимир.
Мекольцеда прважаф машинаса ульсть лямбе носокт, перчаткат, окопонь штатолхт, коське борщ, шурьхкат, «Неравнодушные» группать эзда медикаментт.
Тя машинать прважамдонза меле аф озадонь седихть ащихне эстокиге кандсть несколька кяскав парши мархта, конат эрявихть специальнай военнай операцияса.
Ламотне кочксихть ярмак, конань лангс рамсеви сембе эрявикссь.
Аф кунара Отрадное велень эряйхне кочкасть модамарьхть, капстат, шурьхкат и кандозь церькаву. Сембось туй коське шонгарямонди. Аноклакшнесазь сонь аф озадонь седихть ащи ломаттне. Ётка пингста сашендыхть храму, ватксесазь, керсесазь перень сёротнень, а меле ни косьфнесазь специальнай сушилкаса. Косьфтафста перень сёротне и сивольсь аф ламонь марсевихть специальнай кяскавнява. Вов и анок коське шонгарямсь, конань лангс боецсь каяй лакай ведь и ярхцай псиняда.
Лездыень кятть эрявихть фалу, сяс мес коське шонгарямти вешфкссь оцю. Сяс, кинь ули мялец примамс участия тя тевса, сада Иоанн Кронштадскяень храму или лия вастс, коса стане жа сембось тиендеви боецоньконь ширеснон кирдеманкса.
И нинге. Тяниень пингть храмса мольфтеви «Поделимся теплом» сборсь. Сась запрос СВО-нь зонаста. Эряви кочкамс марстонь вийса алгань лямбе щапт, подшлемникт, стелькат, тялонь спальникт, шарфт, лекарстват, буржуйкат, медь, тувонь куя, чай и лама мезе лия.
Татьяна Альшина.