Саранскяень общественнай транспортонь парксь козякофтовсь автобусса

Средняй классонь 35 од ПАЗ-сь козякофтсазь Саранскяень «Горэлектротранс» предприятиянь паркть. 12 январьста Победань площадьса од автобуснень эзда панжематне максфтольхть Мордовиять столицанц руководстванцты.
«Общественнай транспортонь паркть удалась одкстоптомс Россиянь Президентть решениянц вельде. 35 автобуссь лездыхть цебярьгофтомс Саранскяень 13 автобуснай маршрутть работаснон»,—мярьгсь Артём Здунов.
Российскяй Федерациянь Президентть ширень кирдеманц вельде примаф республикать социально-экономическяй виияфнеманц коряс программа, Правительствать резервнай фондстонза нолдаф 335 миллион цалковай подвижной составть одкстоптоманкса. Од автобусненди тяльги 60 ломанень. Техникась отвечай тяниень пингонь сембе вешфксненди. Эсонза ули эрявикс сембе оборудованиясь, ладяф видеонаблюдениянь система, «ГЛОНАСС».
Автобусне работайхть метанца, мезсь тиендьсыне синь экологическяй ширде сяда арукс и сяда ёмла карьхцень вешикс.
Артём Здунов максозень од автобуснень эзда панжематнень Саранскяень мэрти Игорь Асабинонди, кона спасибась республикань Оцюняти ошть ширенц кирдеманкса. «Автобуснай парксь Саранскяйса ашезь одкстопнев 2016 кизоста сявомок»,—китькстазе ошень округонь оцюнясь.
Од техникась прважави «Горэлектротрансонь» сембе 13 маршруттненди.
Панжематнень максомдост меле Мордовиянь Оцюнясь Артём Здунов ванозе од техникать. 20 январть самс автобусне официальнайста улихть регистрировандафт, мезьда меле лисихть ошень маршруттненди.