Саранскяи кочксевсть странань и миронь од профессионалхне

8 сентябрьста сявомок 12 сентябрти молемс Саранскяйсь арсесь странаса профессиональнай мастерствань инь оцю пялькстомань центракс. Мордовиять столицац примась фкя пингста «Россиясь—возможностень страна» президентскяй платформань кафта оцю мероприятият—тя «Од профессионалхт» Х Национальнай чемпионатть финалоц и рабочай профессиянь Евразийскяй чемпионатсь. Пялькстоматне торжественнайста панжевсть 8 сентябрьста Советскяй площадьса. Церемониясь ушедовсь РФ-нь 69 субъектонь командатнень парадснон эзда. Сяльде няфтьфоль театрализованнай представления.
Торжественнай мероприятияса примасть участия ПФО-са Россиянь Президентть полномочнай представителец Игорь Комаров, Мордовиянь Оцюнясь Артём Здунов, Федерациянь Советонь Наукать, образованиять и культурать коряс комитетть председателец Лилия Гумерова, Маштомошинь и профессиянь виияфнемань агентствать генеральнай директороц Роберт Уразов и официальнай лия ломатть.

Участникнень приветствовандазень ПФО-са Россиянь Президентть полномочнай представителец Игорь Комаров. «Рабочай профессиятнень престижснон касфтомац—государственнай кадровай политикать главнай ширензон эзда фкясь. Тя ащи ушетксокс Россиянь Президентть мархта путневи задачать пяшкодеманцты—странать технологическяй суверенитетонц и экономическяйста виияфтоманц обеспечендамац. Тяниень условияса тейнек, кода аш мзярдовок, эрявихть конкурентнай технологият и ломатть, конат анокт тонаткшнемс синь, тиендемс товархт и сервист, конатненди ули кода арамс од мировой стандартокс!»
Игорь Комаров стане жа азозе, што Приволжскяй федеральнай округса профессиональнай образовательнай учреждениянь студентта арась ни сяда лама вузонь студенттнень коряс. Фалу касонды конкурссь профессиональнай образовательнай учреждениятненди.
Приветствият участникненди стане жа кучсть Россиянь Федерациянь Советть Председателец Валентина Матвиенко, РФ-нь Правительствать Председателец Михаил Мишустин и Россиянь просвещениянь министрсь Сергей Кравцов.
«Ётамок чемпионаттнень пачк эсь регионцнон эса, од специалисттне састь Мордовиять столицас «Од профессионалхт» Национальнай чемпионатть финалозонза,—мярьгсь Мордовиянь Оцюнясь Артём Здунов.—Тейнек тя оцю события, конанди анокламста савсь полафтомс работаньконь форматонц. Тиеськ тянь, и тячи марса участникнень и Агентствань эксперттнень, марнек странать мархта мольхтяма странаньконь технологическяй суверенитетонц кемокснеманцты, пяшкотькшнемок Президентоньконь Владимир Владимирович Путинонь поручениянц». Республикань руководительсь стане жа башка лоткась сянь лангс, што чемпионатсь важнай наследиянь ширде: «Минь эняльттяма организаторхненди, штоба пачфтьф оборудованиять пяльксоц лядоль минь тонафнемань заведенияньконь эса, сяс мес сон тяниень пингонне, мялень салай. Тя лезды СПО-нь организациятнень профессиональнай мастерстваснон касфнемаса».
9 сентябрьста сявомок 11 сентябрти молемс «Саранск Арена» спортивнай комплексса профессиональнай образовательнай учреждениянь 280 лама студентсь няфтезь маштомошиснон 25 компетенцияса. Синь работаснон очнайста ванозь пцтай 200 эксперт.
Кода ни азфоль, тя кизоня Национальнай финалть мархта ряцок ётафтовсь нинге рабочай профессиянь Евразийскяй чемпионатсь. Эзонза сувасть 27 основной и 1 презентационнай компетенцият. Международнай чемпионатть анокламаса примась участия 14 страна-участник.
Россиянь конкурсантта и экспертта башка Саранскяи сашендсть од профессионалхт Арменияста, Белоруссияста, Казахстанцта и Узбекистанцта. Очнай форматса синь пялькстсть 12 компетенцияса, конатнень ёткса «Кузовной ремонт», «Хлебопечение», «Мобильная робототехника», «Технологии моды», «Электроника», «Сварочные технологии» и лиятне. Азербайджанонь, Индиянь, Индонезиянь, Иранонь, Казахстанонь, Киргизиянь, Китаень и Малайзиянь представительхне няфтезь маштомошиснон дистанционнай форматса.
Саранскяйса ётафтф пялькстомада меле Евразийскяй чемпионатонь сембе участникне получасть сертификатт, а стане жа скиллс-паспортт—тяфтама документ, конань эса сёрматф практическяй маштомошинь уровенць.
Соревновательнай пялькста башка эксперттнень, мастерхнень и преподавательхнень, конат аноклайхть профессиональнай подготовкань программат, учезень тонафнемань оцю блок. Дистанционнай форматса синь касфтозь содамошиснон международнай и индустриальнай стандарттнень коряс пялькстомань анокламаса и ётафтомаса.
«Од профессионалхт» Х Национальнай чемпионатть финалонц пингста Мордовиянь общеобразовательнай организациянь 5-11 классонь тонафнихненди аноклафоль профориентационнай зона. Стирьхне и цёратне содафтовсть специальносттнень мархта, конатненди тяниень пингть сядонга оцю вешфкссь. Школаса тонафнихненди пуроптовсть чемпионатонь ётафтома васттнень эзга экскурсия.
Национальнай чемпионатса лац няфтезе прянц Мордовиянь командась. «Малярные и декоративные работы» компетенцияса примасть участия 5 ломатть. Фкясь эздост—Саранскяень строительнай техникумонь выпускниксь Станислав Фомиченко. «Од профессионалхт» чемпионатса сон васенцеда пялькстсь 2019 кизоня, няфтсь цебярь результат. Сяс тяддевок кочказь марнек Россиянь финалти.
Колма шиста участникненди эрявсь няфтемс эксперттненди кочкаф профессияса маштомошиснон. «Пара, мес сембе тя пингть мархтон ульсь наставникозе, преподавателезе Ирина Юрьевна Самошкина. Пялькстомать пингста теенза, конешна, ашезь мярьгондев лезнемс тейне. Но конкурснай шида меле минь корхнеме, мезе мон тиень аф стане и кода эряви вятемс тевть сяда тов»,—азозе Станислав.
«Парикмахерскяй искусства» компетенцияса Мордовиянь командать лувксса примась участия Саранскяй политехническяй техникумонь студенткась Дарья Дирвялите. Стирсь тонафни 4 курсса. Арамс парикмахеркс мялецоль нинге шабакс.
—Мяляфтса, ёмласта озафнелине перьфкан няканень и коль тиендень теест причёскат, тя ульсь инь кельгови налхксемазе,—азозе Дарья.—Тяни касфнесайне тя тевть коряс маштомошинень техникумса и тяка пингть работан. Пяк мялезон тиендемс ломаттнень мазыкс.
Тялонда Дарья примась участия рабочай профессиянь республиканскяй пялькстомаса и занязе васенце вастть. Сяс сон и кочкафоль Национальнай чемпионатонь участникокс.
—Тяфтама пялькстоматне пяк эрявихть. Пингстост сотцетяма лама одня кочкаф профессияньконь колга, полафнетяма опытса лия региононь участникнень мархта,—азозе стирсь.—Сембе пялькстыхне пяк виихть, но мон сембе сяка надиян сяськомс.
«Эксплуатация и обслуживание многоквартирного дома» компетенцияса примась участия Ковылкина аймакста од цёрась Максим Тасайкин. Сон тонафни Ковылкинскяй аграрно-строительнай колледжса 4 курсса.
Максимонь валонзон коряс, «Зданиятнень и сооружениятнень строямасна и тевс нолямасна» специальностть сон кочказе аф стак. Тянди тонафнесь сонь брадоц, кона студентокс улемстонза стане жа няфнезе прянц рабочай профессиянь пялькстоматнень эса.
Сонць Максим Национальнай чемпионатса примась участия васенцеда, а вов региональнай уровеньца пялькснесь ни. Кепотьксонди, меля занязе омбоце вастть. Улема, сяс и кочкафоль колледжснон эзда.
12 сентябрьста Саранскяйса Культурань республиканскяй Дворецса казезь Национальнай финалонь и Евразийскяй чемпионатонь сяськихнень и призёрхнень. Онлайн режимса поздравляндазь и ся од мастерхнень, конат примасть участия дистанционнайста.
1, 2 и 3 вастонь пьедесталса получазь эсь медальснон инь цебярь малярхне, парикмахерхне, слесарьхне, кшинь панихне, сантехникне, сварщикне и рабочай лия профессиянь од ломаттне.
Инь цебярькс медалень марстонь зачётса арасть Москусь, Татарстанць и Санкт-Петербургсь.
Торжественнай пуромксса примасть участия Мордовия Республикань Оцюнясь А.А.Здунов, Маштомошинь и профессиянь виияфнемань агентствать генеральнай директороц Р.Н.Уразов и Беларусь Республикань профессиональнай образованиянь Республиканскяй институтть ректороц В.Н.Голубовский.
А.А.Здунов мярьгсь: «Шумордавсть оцю пялькстоматне, конатненди Мордовиясь ламос аноклась. Чемпионатса улихть сяськихть, но аш сяськфт, сяс мес сембе участникне и эксперттне козякофтсть фкя-фкянь профессиональнай опытса, арасть ялгакс. Тя опытсь ляды мархтонк эряфоньберьф. Тяфтама мероприятиятне лездыхть касфтомс од ломаттнень профессиональнай и личностнай ширде. Сюконятама Маштомошинь и профессиянь виияфнемань агентствати, мес тядде чемпионатть ётафтоманкса кочкаф Мордовиясь».
«Эрь пялькстомать шумордамац—тя ушеткс од историяти, эрь конкурсантть, экспертть и регионть-участникть касоманцты куцеманя. Кенярттяма, мес тядде Россияса оцю серьса ётафтовсь Евразийскяй чемпионатсь»,—мярьгсь Роберт Уразов.
«Од профессионалхт» Национальнай чемпионатть финалоц шумордавсь праздничнай концертса, коса примасть участия Мордовскяй филармониянь артисттне, хореографическяй коллектифне, «Торама» фольклорнай ансамбльсь и AprilShow кавер-группась.
16 кизосотнень эзда сявомок 25 кизосотненди молемс студенттнень ёткса профессиональнай маштомошинь инь оцю пялькстоматне сай кизоть ётафтовихть Башкортостан Республикаса.
О.БЕЛКИНА.

Последние новости

Тядянь-алянь седиень и ваймонь лямбосна сатни лама иденди!

2024 кизось странасонк Россиянь Президентть Владимир Путинонь Указонц мархта...

Пееди—и ломанть ваймос арай сяда пара

Тячи азонттама Моску ошень «Азорава» ансамблень участницать Елена Куфтиновать...

Ётафтови «Акша Келу» Республиканскяй национально-фольклорнай ила

23 июньцта Зубово-Полянскяй райононь Вадовские Селищи велеса ётафтови «Акша...

Спортсменоньке сатсть «зрня» и «сия»

Казаньца ётафтовсть БРИКС странатнень Налхкомасна. Сяськомаса пялькстсь 5000-тнень малава...

Петевихть-мазоптовихть куд пирьфне

«Жильё и городская среда» национальнай проектть «Формирование комфортной городской...

Занятостень службась одкстоптови

Мордовиясь сувась занятостень службань комплекснай модернизациянь пилотнай региоттнень лувксс....

«Торама» ансамбльсь няфтезе прянц оцю фестивальса

«Торама» фольклорнай ансамбльсь примась участия «Лето в Москве. Все...

Тядянь-алянь седиень и ваймонь лямбосна сатни лама иденди!

2024 кизось странасонк Россиянь Президентть Владимир Путинонь Указонц мархта азф Семьянь кизокс. Но аф аньцек тядде миньцонк семьятненди шарфневсь и шарфневи башка мяль. Коль...

Пееди—и ломанть ваймос арай сяда пара

Тячи азонттама Моску ошень «Азорава» ансамблень участницать Елена Куфтиновать колга, кона нинге шабакс кельгозе мораманц и фалу примсесь участия художественнай самодеятельностьса.Вов кода мокшавась азонды...

Ётафтови «Акша Келу» Республиканскяй национально-фольклорнай ила

23 июньцта Зубово-Полянскяй райононь Вадовские Селищи велеса ётафтови «Акша келу» (Белая берёза) Республиканскяй национально-фольклорнай ила. Койс коре сон уленди Тройцянь шиня.Инжихнень учсазь концертнай козя...