Саранскяйсь аноклай Од кизоти

Моли декабрть омбоце пялец. Мезе тят корхта, а тя ковть сембе кизоса ломаттне лувсазь мялень-арьсемань пяшкодикс, нльне «ёфксоннекс». И тя шарьхкотьф: тялоть васенце ковонц песта васьфнесаськ инь мазы и кельгови илатнень эзда фкять—Од кизоть, кона ушеткшнесы мельганза моли январть праздниконь кярьксонц.
Тонадоме ни сянди, што Од кизоти анокламась мольфтеви инголенди. Тяфта тевсь ащи кода эрь кудса, стане и населённай пункттнень эса целайнек.
Эрь кизоня нинге ноябрьста ушеткшневи Саранскяйть Од кизоти наряжамац. Башка мяль шарфневи республикать столицанц Советскяй площадть лангс. Мазы шар мархта сери кузда башка, кона нинге ичкозде кеняртьфнесыне ётайхнень-потайхнень, мезе аньцек аф тиендеви: праздниконь декорацият, иттненди курькснемс пандонят, пиндолды-вандолды иллюминацият… Площадсь ковда лама пингс арси ваймамань и кенярдемань канды уженякс.
Тядде Советскяй площадть и Саранскяень ульцятнень Од кизоти анокламасна ушетфоль ноябрть песта. Эста ульцятнень и проспекттнень эса эвондасть васенце мазоптоматне, иллюминациятне, гирляндатне.
Советскяй площадьса стяфтфоль 22 метрань сереса куз, меле сон мазоптфоль. Кода целайнек няфти площадсь тяни, ваность фотокорреспондентоньконь Олег Красильниковонь фотографиянзон вельде.
Декабрть кучкас Саранскяйсь педа-пес аноклафоль малаткшни Од кизоти.
Нинге весть лятфтасаськ сянь, што ошень руководствась инголенди сась мяльс тядде атказамс илати лемтьф салютть эзда—сон аф ули. Саранск ошень мэрть И.Ю.Асабинонь валонзон коряс, странаньконди аф тёждя пингть тиема семботь лишнай карьхцнень аф нолдамаснон инкса. Да и целайнек тяниень пингть салютсь аф пяк ладяй.
Мордовиять столицанц мазоптоманкса тевс нолдафтольхть мелянь-манань иллюминациятне и декорациятне. Аф лядыхть праздникфтома иттневок. Утренникне молихть ни. Башка мяль шарфтф специальнай военнай операцияса участиянь примайхнень шабаснонды.
Тянь колга республикань эряйхнень кизефксснон лангс отвечамста прямой эфирса корхтась и Мордовия Республикань Оцюнясь А.А.Здунов.
Валонзон коряс, тяни сембе вийхне водендамат военнайхнень семьяснон ширеснон кирдеманкса. Содаф туфталхнень сюнеда тядде Од кизонь пяк оцю пуромкст—театрализованнай представленият и пиротехническяй шоут аф кармайхть. Аф рамави дополнительнай оборудования и атрибутика. Но сембось ся, мезсь сотф идень мероприятиятнень и шабатненди од кизонь казнетнень мархта—тиеви.
Кода няйсаськ, Од кизоти анокламась сембе сяка мольфтеви. Тянь ули кода азомс аф аньцек Саранскяйть, но и республикань лия ошнень, а стане жа райоттнень колга.
Т.АЛЬШИНА.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...