Саранскяйса эвондай СВО-нь участникненди памятник

Сембе пингс ванфтомс Великай Отечественнай войнань участникнень и тылонь труженикнень, а стане жа тячиень Геройхнень—специальнай военнай операциянь боецнень колга мялямть—тяфтама задача путсь Государственнай Собранияти Посланиянц эса Мордовиянь Оцюнясь Артём Здунов.
Сяськомань шити Мордовиянь сембе райоттнень эса петевихть-тиевихть Великай Отечественнай войнать пингста шавф воиттненди мемориалхне и памятникне. Петемать-мазоптомать коряс оцю покодема мольфтеви Саранскяйса—Советскяй площадьса Вечнай толть маласа.
Ня шитнень работатнень мольфтемаснон ванозень МР-нь Правительствать Председателенц тевонзон тиендисна Галина Лотванова.
Строительнай сембе тефнень тяса арьсекшневи шумордамс апрельть аделавомс. Мемориальнай комплексть ваксса ладяви СВО-нь геройхненди памятник.
«Работатне мольфтевихть графикс коре и строительнай вешфкснень пяшкотькшнезь. Тя территориять петемац-мазоптомац шумордави апрель ковть аделавомс, а 9 майть самс Сяськомань площадьса ладяви специальнай военнай операциянь геройхненди памятник. Эрь-кодама поколениянь Отечествань аралайхнень подвигснон колга мялямть ванфтомац—минь святой обязанностеньке»,—мярьгсь Галина Лотванова.
СВО-нь геройхненди памятникть эскизоц ванфоль-корхтафтфоль Архитектурнай советть заседаниясонза, коса примасть участия Мордовиянь Оцюнясь, специальнай военнай операциянь ветераттне и участникне. Скульптурнай композициять автороц—Александр Филатов.