4 ноябрьста Саранскяйса торжественнайста панчфоль Донбассонь аралайхнень скверсна. Марса специальнай военнай операциянь геройхнень, Донбассонь эряйхнень, ветеранскяй, од ломанень и общественнай организациятнень, правоохранительнай блокть мархта общественнай од вастть ванозе республикань Оцюнясь Артём Здунов. Участия скверть панжемаса примась РФ-нь Федеральнай собраниянь Государственнай Думань депутатсь, Аграрнай кизефкснень коряс Госдумань комитетть председателенц заместителец Юлия Оглоблина.
Од скверсь ащи Б.Хмельницкяень ульцяса—Ботевградскяй и С.Разинонь лемса ульцятнень ёткса кварталса. Тяда инголе тяса ульсь шава васта. Меля ошть тя пялькссонза эряйхне пшкядсть республикань Оцюняти эняльдема мархта—тиемс ваймосеманди тяниень пингонь общественнай васта и нльне няфтезь инициативнай группать мархта аноклаф проектть.
Региононь руководительсь надияфтсь лездомс. Ошень территориять петемац-мазоптомац мольфтевсь «Формирование комфортной городской среды» федеральнай проектть мяльса кирдезь, Мордовиять эзда Госдумань депутатть, Безопасностть и коррупцияти каршек ащемать коряс ГД-нь комитетть председателенц Василий Пискарёвонь ширенц кирдеманц пингста.
Республикань Оцюнясь сембе пуромфнень поздравляндазень Народнай единствань шить мархта, арьсесь кирдемс марса сембе тефнень вятемста. «Минь виихтяма сянь мархта, мес аф явонттама фкя-фкянь национальностьс, верас коре. Сембе пинкнень маштоме пуромомс марс и тиемс сянь, мезе эрявсь Россияти. Эняльдян сембонди кородозь малаткшнемс од объектти, мяляфтомс, што тя скверсь Донбассонь аралайхнень»,—мярьгсь Артём Здунов.
Скверть панжемста земляконьконди, младшай сержантти Дмитрий Аверкинонди Президентть указонц мархта мужестванкса и эсь прянь аф ужяльдеманкса, конат няфтьфтольхть воинскяй долгть пяшкодемста, максфоль оцю казне—«За отвагу» медальсь. Лятфтасаськ, што тяда инголе тяфтама жа казне максфоль рядовойти Андрей Клемашовонди.
Воиттнень лятфнеманкса, конат шавовсть специальнай военнай операциять пингста, скверса строяви Божий Матерть «Державная» шкаень ликонянц часовняц.
«Тя ули аф аньцек ваймосемань, но и мяляфтомань васта!»—китькстазе Артём Здунов.
Региононь руководительсь марса ошень оцюнять и почётнай инжихнень мархта ванозь од скверть, корхнесть эряйхнень мархта—синь спасибасть скверть курокста тиеманкса. «Сюкпря седи ваксста и кеме шумбраши теенть!»—мярьгсть маластонь куттнень эса эряйхне.