Саранскяйса сяда тов мольфтеви общественнай территориять, кона 2025 кизоня ули петьф-мазоптф «Жильё и городская среда» нацпроектонь «Формирование комфортной городской среды» проектть вельде, Всероссийскяй рейтинговай вайгялень максомась. Кочкамаса участвовандайхть колма территорият: Московскяй ульцять эзга Фонтаннай спусксь, Мордовскяй ульцяста скверсь и Советскяй плащадть маласта общественнай вастсь.
Тячиень шити вайгяльснон максозь ни пцтай ведьгемонь тёжянь ломанць. Мордовиянь эряйхненди тя тевса лезнихть волонтёрхне. Синь ули кода васьфтемс, кепотьксонди, Тысячелетиянь площадьса, МФЦ-ть зданияса и маласонза, Советскяй площадьса, «Макс» торговай центрать ваксса, Подольскяй курсанттнень скверсост и Саранскяень лия васттнень эса. Синь щафт акша футболкаса или желетса, кядьсост -планшетт. Вайгялень максомась ётни курокста и тёждяста. Ломанти аньцек эряви азомс волонтерти лемонц, алянь лемонц, фамилиянц и телефононь номеронц, а меле — общественнай территориять, конань мялец кочкамс петеманди-мазоптоманди.
Российскяй правовой академиянь студенттне, сай пингонь юристтне Виктория Фролова и Александр Елистратов волонтёркс покодихть вайгялень максомать ушедомста, 15 мартста. Васенда лезнесть ломаттненди школатнень эса, а ня шитнень тиендьсазь тянь Тысячелетиянь площадьса.
-Монь мялезон ся тевсь, конань мархта заняфан, — азозе студенткась Виктория Фролова. — Кельгса республиканьконь столицанц, Саранскяйть, сяс ёран няемс сонь сядонга мазыкс. Монць максыне вайгялезень Советскяй площадть маласта территориять инкса. Сидеста улендян тяса ялганень мархта.
А вов ошеряйсь Екатерина Коверзина максозе вайгяленц Мордовскяй ульцяста скверть инкса:
— Мон эрян тя аймакса, эрь илядня лисендян скверть эзга якама-шяяма. Мялезе, штоба тяса улель сяда лама сянгяря касыкста, панчфта, шять, тиемсоль тяса кодамовок арт-объект или мезевок лия мялень шарфты.
Ашезь ёта волонтёрхнень вакска и васенце курсонь студенткась Дарья Митина. Сон максозе эсь вайгяленц Фонтаннай спускть инкса. Тя вастсь тянивок, кле, пара ваймосеманди, а петемда-мазоптомда меле кармай пуропнема сядонга лама ломань.
Лятфтасаськ, вайгялень максомась кармай мольфтевома 30 апрельть самс. Тиемс тянь ули кода 13.gorodsreda.ru сайтса или волонтёрхнень вельде.
Эряскодода! Пингта лядонды аф лама.