Саранскяйста учительницась ётафтсь мошенникненди пцтай миллион пяле мархта цалковай

Кода пачфни «Стопмошенник13» телеграм-каналсь, аф кунара Саранскяень 1№ полициянь отделонь дежурнай части сашендсь 25 кизоса стирь, кона пачфтсь 1 миллион 420 тёжянь цалковаенц саламаснон колга.
Сонь валонзон коряс, 20 мартста шобдава теенза гайфтсь обязательнай медицинскяй страхованиянь фондонь сотрудниксь, кона мярьгсь, што эряви полафтомс полисть. Тянкса, кле, азк СНИЛС-ть номеронц. Мезть учительницась и тиезе.
Пингонь ётазь теенза сась сообщения. Информациять лац-ряц содаманкса эрявсь гайфтемс азф номерхнень коряс. Меле стирсь корхнесь порталонь, Роскомнадзоронь и банконь представительхнень мархта.
Корхни ялгатне азозь, што мошенникне получасть личнай кабинетозонза доступ, сяс эстокиге «араламат» счётонзон эса ванфтови ярмакне, а стане жа тиема несколька процедура, штоба сонь лемстонза кивок афоль сявов кредит. Тянкса эрявсь касфтомс финансовай нагрузкать.
Тиемок семботь, мезе мярьгсть аферисттне, кафта шиста Саранск ошень эряйсь ётафтсь аф пелькс счёттненди ярмакт эсь кредитнай картастонза, а нинге сявсь кафта кредитт миллионда лама цалковайс, конатнень стане жа ётафтозень мошенникненди. Меле, шарьхкодемок, што повсь синь килькшезост, пшкядсь полицияв.
Мордовия Республикать эзга МВД-сь лятфни: финансовай аф шарьхкотьф операциятнень колга информациятнень получамаснон пингста эстокиге лоткафтомс корхтамать и гайфтемс телефононь номерть коряс, кона сёрматф банковскяй картать омбоце ширесонза. Мзярдовок тясть макссе колмоце лицатненди салавань информациять, кона ули картантень омбоце ширесонза, а стане жа тясть азонда коттнень, конат сашендыхть телефонозонт СМС-са, интернет-банкса личнай кабинетонтень эзда логинть и парольть.
Кода араламс пря мошенникнень эзда? Тянь колга ули кода содамс «Вестник Киберполиции России» и «Стопмошенник13» телеграм-каналхненди сёрматфтомста.