Тядянь шись—международнай праздник Тядятнень лемс. Тя шиня седиста моли поздравляндамань валхт кулендихть тядятне и пеки аватне. Эрь странаса тя праздникть сонцень шиц.
Российскяй Федерацияса васенце субъектокс, кона ушедсь васьфнемонза Тядянь шить, ульсь Саха Республикась (Якутиясь). Тоса праздниксь сашендовсь октябрь ковть колмоце недляшинцты. Целайнек странасонк Тядянь шись ладяфоль Россиянь Президентть Б.Н.Ельцинонь Указонц мархта 1998 кизоня. Отмечсеви сон эрь кизоня ноябрть мекольце недляшистонза, тядде кармай 27 ноябрьста.
Россияса Тядянь шинь символкс лувондови иляназ тише панчфсь (незабудка): ёмла тя панчфкясь няфнесы виде ваймокс улемать и сембе пингонь кельгомать. Сембонь сянь, мезе ули тядянь седить эса.
Тячи азонттама Рузаевскяй райононь Сузгярьге велень мокшавать Ирина Александровна Фадеевать колга. Мирденц, Владимир Владимировичень мархта касфтыхть колма итть.
Аф ваномок сянь лангс, што од ломаттне тяни аф пяк кирдевихть велеса, тушендыхть ошу, Фадеефнень колга тянь азомс аш кода. Ирина Александровна и Владимир Владимирович рьвяямдост меле ётнесть эряма Рузаевкав, но ёмла родинаснонды—Сузгярьге велети кельгомась мрдафтозень синь меки.
«2013 кизоня шачсь цёраньке Александр, ниле кизода меле—стиреньке Виктория, 2019 кизоня—нинге фкя стиреньке Анастасия»,—мярьгсь мокшавась.
И.А.Фадеева тядякс арамда инголе работась Сузгярьге велень почтовай отделенияса. Меле тага поладозе почтальононь тевонц.
Мзярда кизефтине, мес ашесть ляда эряма Рузаевкав, Ирина Александровна отвечась: «Арьсян, велеса иденьконди ули сяда пара—тяса ару перьфпяльсь, ульцятневок бта сяда келихть. Виде, велетнень эса аш кинотеатрат и музейхть, но и оцю ошнень эса эряй ломаттне аф сидеста тоса улендихть. Ну, а кда эвондай мяленьке молемс, кепотьксонди, оцю экранца кинофильмань ванома—тя тиевомшка. Ваймама шитнень ули кода срхкамс семьянь келеса и молемс ошу. Рузаевкась Сузгярьгть эзда аф ичкозе, аньцек 7 вайгяльбет».
Ошень аватне кунара ни тонадсть ся условиятненди, конат ламода тёждялгофнесазь эряфснон. Кепотьксонди, кудса пси ведть улеманцты, муськомань машинатненди, пидемань-панемань пянакуттненди-месненди.
И.А.Фадеевать валонзон коряс, тя сембось и ламось лиясь кунара ни ули велетнень эса, конатнень лувксс сувси и Сузгярьгсь. Кудга нолдаф газ, ули кельме и пси ведь, тифт канализацият. Интернетть вельде ули кода тиемс ламоц тефнень.
Кода ни азфоль, Ирина Александровна Фадеева—лама идень тядя. Оцю цёрац, Александр, тонафни Сузгярьге велень школаса 4 класса. Стиренза, Виктория и Анастасия, якайхть Рузаевка ошень 14№ идень саду, коза стирнятнень усксесазь эрь шиня.
Тядясна, Ирина Александровна, и алясна, Владимир Владимирович, тиендьсазь семботь, штоба касфтомс идьснон афкуксонь ломанькс.
И.А.Фадеева надияй, мзярда шабасна касыхть, мяляфтомок тядяснон-аляснон кепотьксснон, синьге пуроптыхть семьянь тяфтама «пизонят».
Кода и велеса сембе эряйхне, тундаста сявомок и васенце кельмотнень самс, Ирина Александровна заняф перень тефнень мархта. Эздонза ширеса аф ащи и мирдец, кона работай Рузаевкаса.
Ирина Александровна, кода афкуксонь мокшава, пяк кельгсы сембе минценнеть. Теенза пяк малат национальнай щапне-каряпне, мокшень моротне. Сон, кода и Сузгярьгонь ламоц мокшаватне, вов ни аф васенце кизось морси «Мокшаванят» ансамбльса, кона пуроптф велень клубть видеса. Тиендьсы тянь оцю мяль вельде, сяс мес мокшэрзянь кунардонь моротне лездыхть ванфтомс и содамс историяньконь, культураньконь, коеньконь-обуцяньконь.
Фадеефне кельгсазь праздникнень. Ширесост сидеста улендихть инжихть, синценьге фалу тернесазь раднясна и ялгасна. Кода колма идень тядянди, Ирина Александровнанди пяк мала Тядянь шись. Миньге поздравляндасаськ сонь малаткшни илать мархта! Сембе цебярть тейть и кеме шумбраши, Тядя!
Т.Альшина.