«Сембось Сяськомать инкса!»
проектсь мольфтеви сяда тов

«Мокшень правда» газетаса пачфнеме ДНР-нь и ЛНР-нь воинскяй подразделениятнень ширень кирдемаснон коряс Народнай фронтть «Сембось Сяськомать инкса!» проектонц колга. pobeda.onf.ru сайтса тянь квалма ули кода морафтомс эрти, и, кда кинь эвондай мялец, лездомс тя тевса.
Мордовиянь эряйхневок аф ляткшнихть ширеса тянь эзда. Газетаньконь тячиень номеронц эса пачфттяма тянь колга. Кода удалась содамс Мордовия Республикаса Общероссийскяй народнай фронтть региональнай Исполкомсонза, «Сембось Сяськомать инкса!» проектть мяльса кирдезь, ломаттне каннихть региональнай отделенияв щапт, карьсембяльхть, медикаментт, идень налхкшт и ярхцамбяль, гигиенань средстват, специальнай оборудования.
Мордовия Республикаса художественнай гимнастикать коряс Ирина Виннеронь академияц казсь шабрань государствань од спортсметтненди тренировканди щапт, плманжатненди сотневи средстват, топт, комотнемат.
Егорофнень семьясна макссь кафта квадрокоптерхт, бинокль, идень налхкшт.
Ромодановскяй райононь Свято-Троицкяй Чуфаровскяй алянь монастырсь макссь Донбассти 40 литра медь, кона кочкаф эсь пасекастонза.
Эрявикс и цебярь казне Донбассонь эряйхненди тись Саранск ошень эряйсь Вадим Рузавин. Сон содась «Сембось Сяськомать инкса!» Народнай фронтть проектонц колга социальнай сетьтнень эзда. Арьсесть-тисть семьянц мархта и састь мяльс рамамс Донбассонь эряйхненди кафта од мультиваркат, конат эрявкстыхть кудъётконь тевса.
«Няень объявления соцсетьтнень эса, што эряви лезкс Донбассонь эряйхненди. Лездонь мезьса маштонь—казян мультиваркат»,—мярьгсь сон.
Аф кунара региональнай Исполкому инвалиднай коляскаса сашендсь Саранск ошень эряйсь, авась-инвалидсь Нина Николаевна Р. Инвалиднай колясканц «копорьсонза» тифоль георгиевскяй лентанятнень эзда Z буквась. Нина Николаевна ашезе аза фамилиянц. Авась-инвалидсь сась мяльс лездомс мезьса машты и, кулемок «Сембось Сяськомать инкса!» проектть колга, кандсь региональнай Исполкому кафта плетт и махровай нардама.
Саранск ошень эряйти, тылонь труженицати Анна Юрьевнанди 92 киза! Сонга ульсь ОНФ-ть региональнай Исполкомсонза. И сась тоза эняльдема мархта: мялецоль кучемс ярмак ДНР-нь и ЛНР-нь воинскяй подразделениятненди, Донбассонь эряйхненди. Но ашезе сода кода тянь тиемс, сяс мес аф пяк шарьхкоди тя тевса. Анна Юрьевнанди азозь семботь, максозь эрявикс реквизиттнень. Эряфкшу ломанць мольсь банку и ётафтсь эрявикс счётти 20 тёжянь цалковай.
Азсаськ, тяни Донбассонь аралайхнень ширеснон кирдемс сяда тёждя. Россиянь эряйхнень, васендакиге, эряфкшу ломаттнень эняльдемаснон коряс, «Сембось Сяськомать инкса!» Народнай фронтть проектть организаторонза тисть pobeda.onf.ru сайтса ярмакть курокста ётафтоманкса кнопка. И тяни эрти ули кода ётафтомс личнай банковскяй картаста ярмак. Тянкса азф сайтса люпштама «Как помочь?» кнопкать, сяда тов ётама «Банковской картой» кнопкати.
Лятфтасаськ, Мордовияса гуманитарнай лезксть кочкамац вятеви Народнай фронтть региональнай Исполкомонц видеса тяфтама адресс коре: Саранск ошсь, Ленинонь проспектоц, 12№ кудсь, 114 кабинетсь. Телефоттне: 24-15-50, 24-08-69.
Материалть аноклазе
Т.Альшина.