СЕМБОТЬ СЯСЬКОМАТЬ ИНКСА!

«Семботь Сяськомать инкса!»—тяфтама лем ала Народнай фронтть проектоц июньцта ушедозе работанц интернетса pobeda.onf.ru порталса. Вельденза ули кода кирдемс ДНР-нь и ЛНР-нь воинскяй подразделениятнень ширеснон. Тя порталса лац-ряц азондови, коза и кода можна тя тевонди ётафтомс ярмак, коса примави эрявикссь, мезьса ули кода лездомс боецненди, а стане жа содамс кода тя сембось пачфневи получайснонды.
Народнай фронтсь—общественнай движения, конань лидероц Россиянь Президентсь В.В.Путин. Народнай фронтсь пуропнесыне марс странаньконь ломанензон эрти эрявикс кизефкснень решандамаснон инкса. Тяддень февральста сявомок сон кочкси и пачфни гуманитарнай лезкс ДНР-нь и ЛНР-нь эряйхненди и кирнесыне сятнень ширеснон, конат аф эсь воля кадозь кудснон и тяни аф содаф мзярс эряйхть ширеса.
ЛНР-нь и ДНР-нь силовой подразделениятне примайхть участия боевой тефнень эса вов ни 8 кизот. Республикатне фалу мобилизациясот, Донбассть виенза лафчемсть. Ся, мезть теест кочксесы Народнай фронтсь,—расходнай материал. Сон эряви боецненди эрь шиня. Эсь пингстонза максф лезкссь тисыне сяда ёмлакс личнай составть юмафксонзон.
Порталть вельде ули кода лездомс ярмакса, инь эря-
виксса (мезе тяза сувси), тявок азф, кандомс эрявиксть Народнай фронтть отделениянзонды, конат работайхть Россиянь 85 регионца.
Кода лездомс мирнай ломаттненди? Тянь колга азондови «Лезкссь мирнай населенияти» разделса.
Мезе тиенди Народнай фронтсь? Военкорхне и блогерхне кочксесазь ся ярмакнень, конатнень тя тевонди макссесазь ломаттне. Народнай фронтсь рамси дефицитнай товархт, максси помещеният-склатт, лезни информационнай ширеть мяльса кирдезь, тиендьсы логистическяй «кинять-яннять».
Военкорхне тиендихть эрявикс заявкат. Синь лац содасазь военнай эрь подразделениять вешфксонзон.
Но pobeda.onf.ru порталса пачфневсь ни, што тиемдонза меле социальнай сетьтнень эса ярмаконь кочксема ушедсть мошенникне. Тиендьсазь синь тянь проектть кураторонзон—военнай корреспонденттнень лемста. Шарфтода мяль: средстватне и сембось лиясь кочксевихть аньцек проектть официальнай страницанц вельде—pobeda.onf.ru сайтсь. Тяда пова васькафнихнень килькшс!
Тя материалть анокламста (19 июльста) порталса мольсть тяфтама сборхт: «Мрдафтомок идькс пингть»—лезкс донбасскяй школьникненди—шавф ополченецнень идьснонды и инвалиттненди, Илья Ушенинонь сбороц—лезкс Народнай милициять 7-це башка мотострелковай бригаданцты, ЛНР, Эдгар Запашнаень сбороц, конань вельде лезкс максови Народнай милициянь кинологическяй службати, ЛНР и стак тов. Кой-кона лия сборхнень коряс средстватне кочкафтольхть и мольфтевсь инь эрявиксть рамамац.
Июльть кучканцты «Семботь Сяськомать инкса!» благотворительнай фонду сась 477 миллион цалковай. Народнай фронтть 76 региональнай отделенияц получась ломаттнень эзда 62 тёжяньда лама предмет.
Мордовияса инь эрявиксть ули кода кандомс Народнай фронтть отделениязонза. Адрессь: Саранск ошсь, Ленинонь проспектоц, 12№ кудсь. Кизефкснень максомат 8(8342)24-15-50, 24-08-69, 24-24-47 телефоттнень коряс.
«Семботь Сяськомать инкса!» проектть колга мяльснон-арьсемаснон «Мокшень правдаса» азсазь сят, кит ащихть аф озадонь седихть тянди.
Философскяй наукань кандидатсь, РФ-нь Президентть видеса РАНХиГС-нь культурологиянь и социальнай коммуникациянь кафедрань доцентсь, Россиянь Журналистонь союзонь членць, МР-нь ОНФ-нь региональнай штабонь членць Алексей Алексеевич Индриков:
—Стаки моли Украинаса спецоперацияньке. Народнай фронтсь тись-пуроптсь «Семботь Сяськомать инкса!» фонд, коза эрти эздонк ули кода сувафтомс вийс коре путксонц марстонь сяськомать инкса, лездомс Донбассонь эряйхненди, конат Россиять лезксонц вельде тюрихть эсь—Луганскяй и Донецкяй Народнай Республикаснон воляшиснон инкса. Тиема тянь народть и армиять единстваснон инкса. Аралаеньке кемоста и тевонь содазь ащихть толса юрнай рубеженьконь лангса. Аралакшнесазь ломаттнень, кшить, сай пингть, аралакшнесамазь минь. Кие кда аф минь, кие кда аф Россиясь мрдафтсы мирнай эряфть моданьконь лангс? Тя историческяй эрявикс тевоньке. Марнек планетась ваны солдатоньконь лангс стане, кода 80 кизода инголе ванць Великай Отечественнай войнань советскяй воинть лангс, кемамок араламати, сонь виенцты, ваймонь кемошинцты. Солдатоньконди, армияньконди тячи азонттама сюкпря. И минь благодарностеньке—аф шава валхт, минь таколттама, лезттама. pobeda.onf.ru сайтса ули кода мумс эрявикс сембе информациять: кода лездомс, мезе тиемс, штоба армияньке сяськоль сяда курокста. Сяськомада меле сай мирнай эряф, а тя корхтай сянь колга, што куду мрдайхть рубеженьконь аф пели аралайсна. Тячи теест пяк эряви ширденк лезкс, и тейнек тянь ули кода тиемс и валса, и тевса.

Т.ВЛАДИМИРОВА.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии внедрен безбумажный электронный документооборот

В рамках регионального проекта «Цифровое государственное управление» национального проекта...

Предпринимателей Мордовии научат создавать короткие видео-«REELS»

Министерство экономики, торговли и предпринимательства РМ совместно с Центром...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...