СЕМЬЯНЬ ПАВАЗСЬ—ИНЬ ПИТНИСЬ!

Студенческяй кизотне лятфневихть аф аньцек сессиятнень, получаф дипломть вельде, а нинге сянь мархта, што вузть шумордамдонза меле, получаф специальностть коряс работамста, сяка тев васьфнесайть сятнень, кинь мархта вете кизот кочксеть содамошит университетса.
Н.П.Огарёвонь лемса Мордовскяй государственнай университетонь филологическяй факультетонь «журналистика» отделениять аделайне 2003 кизоня. Группаньке оцюволь—колмогемонть малава ломанель. И, эряви азомс, сембонди тейнек васенце вастса ащесь ялгаксшись—самай ся, конанди мярьгихть афкуксонь: кемось, виись, фкя-фкянди лездысь, «пяндраса»-мезьса апак пяцкафсь. Марса тонафнеме и велетнень эзда сафне, и ошеннетне. Васенце занятиятнень—паратнень пингста кулине: группасонк ули землячказе—Рузаевка ошста отькорь стирсь Людмила Ельмеева. Землячка. Тя валсь сембе пингс лядсь кафцьконь мялямс и тянемс сонь нолясаськ тевс фкя-фкянь васьфтемста: «Шумбрат, землячка! Кода тефне?» или соцсетьса-коса тяштемста: «Тя мон, землячка!» Ламотне эздонк лядсть кочкаф профессияса—сотозь эряфснон журналистикать мархта. Или вельденза, аськолксонь аськолкс, куцсть сядовок вяри. Сяс и няенттяма фкя-фкянь сидеста ётафневи пуромкснень-меснень пингста. Стаки кирдян соткст кельгома землячказень Людмила Ельмеевать мархта. Ламотне группастонк Людать содасазь лия фамилия ала. Вов ни куватьс сон—республикаса асу содаф журналисттнень эзда фкясь—Людмила Чекал. А нинге—цебярь рьвя, колма цёрань-богатырень тядя, машты кядь азорава, кона надияй и верондай аньцек цебярьс. Самай тяфтапнень колга корхнихть: пеедезеви—и тейтьке, маласонза ащити, арай сяда валда. Тячи азонттама лама идень семьянц колга.
Людмила шачсь республикань машина кинь столицаса. Нинге шабакс ульсь бта «эрексия»—аф аньцек лац тонафнесь, но и фалу вятезень школьнай пуромкснень, примсесь эсост участия. Школать шумордазе зрнянь медальса. Сась мяльс сотомс эряфонц журналистикать мархта, сяс и поступась филологическяй факультетонь «журналистикань» отделенияв. Васень пингть эрь шиня сашендсь Рузаевкаста, меле теенза макссть васта студенческяй общежитияса. Ётка пингста заняфоль Студентонь тундатнень эса, налхксь КВН-ца и якась театральнай студияв.
Рьвакс лиссь Руслан Чекалонди, конань мархта содафтсь фкя иласа. Людмилать цёрась тердезе танецс. Пингонь ётазь од ломаттне рьвяясть. И вов ни 23 киза Руслан и Людмила марсот.
Семьясост шачсть колма шабат—цёрат. Тяда меле тядясна мрдась работама—телекомпаниянь информационнай вещаниянь отделу. Поладозе кельгома тевонц «МХАТик» театраса-студияса, коза сась нинге студенческяй кизотнень. Нинге работай региональнай информационнай агентстваса.
Мирденц Русланонь мархта—лама идень тядят-алят. И тя тиендьсыне Чекалхнень павазукс. Мирдсь и рьвясь, аф ваномок работаса заняфшиснон лангс, мзярдовок аф ащихть фкя вастса. Кельгсазь путешествовандамаснон и оцю мяль шарфнихть спортти, эряфонь шумбра койхненди. Примсихть участия конкурснень и фестивальхнень эса, марса тиендьсазь кудонь тефнень, якайхть кинос, театрав, музеи… Сидеста семьянь келеса ули кода няемс выставкатнень эса. Семьясь эряй Рузаевкаса, но тя аф шоряй кочкаф пингть марса самс Саранскяи или молемс лия региону.
Меля Чекалхне примасть участия «Это у нас семейное» конкурсса и тиезь дистанционнай этапть сембе заданиянзон. Снимандафоль аф фкя кемотть видеоролик семьянь койснон-обуцяснон, пара тевснон, ялгаснон мархта васетькшнематнень колга. Тянкса синь сатсть путёвка Приволжскяй федеральнай округонь финалу.
Тяддевок Чекалхне ётасть регистрация Всероссийскяй тя конкурсть омбоце сезонозонза. Инголе тага учсазь од заданиятне. Арьсетяма семьяти сатфкст!
Семьянь азорсь, Руслан Чекал, заняф строямань тевса—сон 5 разрядонь каменщик. Строясь лама куд, школа, идень сад, церькав Мордовиянь тя или тона райоттнень эса. Бригадась, коса работай Руслан, строязе и Атяшево посёлкаса Андрей Первозваннаень церькавонц. Сон тиф Кронштадтса Морской соборть образонц мяльс сявозь. Руслан и Людмила якасть тя святынять ванома, мзярда ульсть Санкт-Петербургса.
Мирдсь и рьвясь мелянь ноябрьста Кисловодскяйса ваймосемста куцендсть Эльбрусть пряс. 2023 кизоня ульсть Санкт-Петербургса и Железноводск ошса. Якасть калонь кунцема Астраханскяй области. Идьснон мархта кафксть ульсть Крымса, а нинге—Абхазияса, Ульяновскяйса, Пензаса, Башкирияса, Самарскяй областьса, Болдинаса, Тарханыса.
Кафта кемотть кизоста тя семьять эвондасть и кемокстасть эсь коенза: марса васьфнемс илатнень, якамс бабатнень-щаватнень ширес, тернемс инжикс ялгатнень, кирдемс соткст эсь лацост активнай семьятнень мархта.
Оцю цёрась семьяса, Илья, эряй Саранскяйса, тонафни Н.П.Огарёвонь лемса Мордовскяй государственнай университетса лингвистокс. Меля ётась практика: вятезень английскяй и французскяй кяльхнень Саранск ошень 19№ гимназияса. Шумордазе бакалавриатть. Мзярда аноклавсь тя материалсь, Илья Чекал аноклась дипломть араламанцты. А кафта дуганонза 20 июнти ваймосихть Ичалковскяй районца «Алатырь» санаторийса, коса примсихть участия ётафневи сембе конкурснень и концерттнень эса.
Илья сяда тов ёрай самс работама Рузаевкань 8№ средняй общеобразовательнай школав, конань эсь пингстонза шумордазе сонць.
Олег Чекал, кода и аляц, кельгсы мастярламанц. Мезсь синневи, кудонь эряйхне каннесазь теенза, сяс мес содасазь: Олег семботь тисы и петьсы. Тонафни 12№ средняй общеобразовательнай школаса—Образованиянь центраса, шумордазе 10-це классть. Ёрай кочкамс техническяй ширеть. Кунара якай «Кванториуму», мяленц салсесы 3D-моделированиясь. Нинге Олег шумордась музыкальнай школа гитарань классть коряс и пяк кельгсы музыкальнай тя инструментса мораманц, якась театральнай студияв занятияс.
Чекалхнень сембода ёмла цёрасна—Андрей тонафни 12№ средняй школаса. Шумордазе 7-це классть. Меля сон и мархтонза тонафни ялганза арасть Россиянь МЧС-ть «Доминанта» профильнай отрядонц кадеткс. Андрей якась театральнай студияв, лисенди морама сценать лангс. «Тяштеня» Идень эстетическяй воспитаниянь (национальнай культурань) центрать народнай ансамбленц участникоц. Нинге примсесь участия «Пек вадря!» идень киножурналть съёмкасонза. Фалу заняф школьнай мероприятиятнень эса.
Колма идень тядясь Людмила Чекал вятьсы «Просто обо всём» эсь телеграм-каналонц, коса пачфни работать, ваймамать, путешествовандаматнень, кельгомать, семьянь тефнень, спортть колга.
Вов тяфтама сон, Рузаевкаста Чекалхнень лама идень семьясна!
Татьяна АЛЬШИНА.