Ётай веконь сизьгемонце кизотнень Порапань стирьхнень и цёратнень ёткса келиста содафоль Ковылкинскяй строительнай техникумсь. Тяза поступама сашендсть аф аньцек республикань велетнень эзда, но и шабра регионцта. Повомс абитуриенттнень лувксс аф тёждяль. Эрявикс баллсь эста ульсь оцю.
Тяза поступаманкса аф кржа вий савсь путомс Василий Ломакинонди, кона шумордась Парапинскяй средняй школань кафкса класст. И тя аф ваномок сянь лангс, што тонафнесь сон аф кальдявста. Шарфтомс мяль тонафнемань тя заведениять лангс цёрать кошардозе техникумонь шинь отделениять заведующаец, Порапаса шачфсь-касфсь Владимир Фёдорович Чукаров. Сонь кулхцондозь Порапань ламоц эряйхне и кочказь эста строителень профессиять. Ётксост акатне-сазорхне Раиса, Валентина и синь дуганцна Иван Ломакиттне, Аня Чекашкинась, Маша и Александр Купряшкиттне и лиятне. Хуш покодемс специальностьс коре меле савсь аф сембонди.
Сонць В.Ф.Чукаров тяниень пингть эряй и трудендай Смоленск ошса. Владимир Фёдорович—Россиянь почётнай строитель.
Героеньке сотнезе кочкаф профессиять мархта марнек эряфонц. Шумордамок техникумть и получамок техниконь-строителень специальность, тусь служама Советскяй Армияв. Мрдась кафксогемонце кизоня и эстокиге лиссь покодема «Саранскжилстрой» трестонь 10-це строительнай управленияв мастеркс. Тяса сон содазень строительнай тевонь васенце маштомошитнень, кемокснемок получаф содамошинзон тевса. Мезе тят корхта, цебярь школа ётнесть эста вузонь и техникумонь выпускникне. Главнайсь—ся пингть ломаттнень ульсь оцю мяльсна содамс мастерствань секреттнень, сатомс цебярь результатт. Строительнай тевса содамошинь аф сатнема марясь и Василий Ломакин. Аф стак сон примась решения поступамс Н.П.Огарёвонь лемса МГУ-нь промышленно-гражданскяй строительствань факультетонь шинь отделенияв.
Согласиндада: фкя пингста покодемс и тонафнемс, а тяса нинге рьвяясь, шачсть шабанза, ульсь аф тёждя. Сембось тя вешсь лама вий, кирдемшка и оцю мяль полафтомс эряфцень цебярь шири. Василий Фёдоровичень ули тяфтама эсь лацонь ширец, кона васьфневи аф сембонь эса—сон фалу пачфнесы пети ушетф тевть мезеньге лангс апак ватт.
1984 кизоня В.Ф.Ломакин мрдась шачема-касома аймакозонза. Лиссь покодема мастеркс «Ковылкинскяй ПМК-86» организацияв, а кемонь ковда меле путфоль участкань старшай прорабкс. Университетса получаф теоретическяй содамошитне и Саранскяйса ётаф практическяй школась ашесть ляда шавос. Василий Фёдоровичень эса эвондась кемама эсь виензонды, сон смелста кярьмотькшнесь стака и ответственнай задачатнень пяшкодемаснонды, ашезь пеле примсемс эсь лацонь решеният, конатнень эзда ащесь государственнай платтнень и закаснень пяшкодемасна.
Тя ламода лездсь Ломакин ялгати курокста куцемс карьерань куцеманява. Эста ни опытнай хозяйственникть и руководительть В.Д.Евтеевонь инициативанц коряс Василий Фёдорович арась дорожно-строительнай передвижной механизированнай колоннань начальникокс. Эряви азомс, сонць Евтеев КЭМЗ-нь генеральнай директоркс путомдонза инголе работась тяса главнай инженеркс и предприятиянь начальникокс.
Васенце пингть Василий Фёдоровиченди аф тёждяль. Од тевса фалу тяфта. Но Ломакинонь ульсь аф кальдяв командац. Цебярь лездыкс од руководительти ащесть мастерсь В.В.Макеев, производствань заведующайсь С.Я.Ваннер, главнай бухгалтерсь Т.М.Волкова, КАМАЗ-нь водительхне А.Дмитриченко и А.Кузнецов, грейдеристсь В.Благушин и лиятне.
Коллективса лувондовсь пцтай 100 ломань. Сембе эрявикс техникась ульсь. Предприятияти фкя инь васенце задачакс ащесь райононь башка велетненди—Якстерь Шадыму, Сире Аллагуловав и Сире Дракав кинь строямась. Пингсь стакаль—ковонь ков ашезь паннев заработнай платась, сембе вастова няевсь кадратнень сашендомасна-тушендомасна. Павазонди, Ломакинонь коллективонцты ашезь сав кирдемс тянь. Зарплатась, ся пингть сон аф ёмлаль, макссевсь эсь пингстонза. Ломаттне кирдсть эсь вастснонды. Эряви азомс, водительхнень и грейдеристтнень ламошкасна ульсть козя опыт и оцю стаж мархтот. Предприятиянь руководствась тиендезе семботь, штоба ванфтомс коллективть. Тяфта, лезнесь рабочайхненди сявомс процентфтома кредит эряма вастонь строяманкса.
Василий Фёдорович кадсь эсь колганза пара лятфнемат аф аньцек Ковылкинскяй районца, но и эздонза ширеса. Эсь пингстонза примась участия Уренгой-Помары-Ужгород газопроводонь работникнеди эрямань комплексть строямаса. Кепотьксонди, Краснослободскяй районца пцтай кемонь кизот федеральнай программать коряс савсь строямс эряма вастт, школат, идень сатт и соцкультбытонь лия объектт.
Лама аф фкя лацонь работа полафтсь Ломакин. И нльне пенсияс лисемдонза меле тевфтома аф ащекшни. Тяниень пингть сон «Универсам» ООО-ть директороц. Коллективсь, конань вятьсы, мольфти ремонтнай работат МР-нь «Ковылкинскяй межрайоннай больниця» ГБУЗ-са.
Строямань тевти кельгомась Василий Фёдоровичень эзда ётась и сонь цёранцты Алексеенди. Сон тряенц-касфтыенц кошардоманц коряс 2010 кизоня шумордазе Ковылкинскяй строительнай колледжть, а меле—Н.П.Огарёвонь лемса МГУ-нь юридическяй факультетть. Работась специальностьс коре Ковылкинскяй муниципальнай райононь администрацияса, тяниень пингть Алексей Васильевич—Мордовэнергонь «Россети» ПАО-са зданиятнень и сооружениятнень коряс специалист.
Строителень профессиясь Ломакиттнень—семейнай. Кепотьксонди, Василий Фёдоровичень аляц, Фёдор Васильевич, лемдезе тя ремеслати марнек эряфонц. Ульсь пяк цебярь плотникокс, столяркс. Примсесь активнай участия Ковылкинань военнай ошкаса эряма вастонь строямать эса.
Василий ИЛЬКАЕВ.