ШАБАТНЕ—ВОЙНАТЬ КОЛГА

Сяськомань Шинь каршеня Атюрьевскяй райононь Идень библиотекаса ётафтовсь мялень салай лама ила. Аноклафоль военно-патриотическяй темас выставка, коса главнай геройхне—войнать пингста тылса трудендай шабатне. Выставкать мархта иттнень содафтозень Идень библиотекать заведующаец Л.К.Вешкина. Сон лама азондсь писательхнень-фронтовикнень и синь произведенияснон колга. Ванцть Михаил Шолоховонь «Судьба человека» повестенц коряс путф фильмаста пакш, а меле азозь эсь мяльснон-арьсемаснон.
Ётафтфоль «Доблестень част», коса корхтамась мольфтевсь советскяй народть Великай Отечественнай войнать пингста подвигонц колга. Геройхнень лемсна апак юкстакт, синь эряйхть ломаттнень мялямса. Тянь квалма азондыхть памятникне, обелискне, лятфнемань плитатне.
«Машты кядень» кружоконь вятихне няфтсть «Сяськомань вальмат» лем ала мастер-класс. Иттне эсь тифснон мархта наряжазь библиотекань фкя вальмять.
Мялень салаель и «Войнать колга корхтатама стихса» лем ала музыкально-поэтическяй частсь. Иттне лувозь Сергей Васильевонь, Виктор Викторовонь, Ольга Масловать и лиятнень войнати лемтьф стихснон, морасть военнай темас морот. А меколи сембе марса ванозь «Войнась иттнень сельмованфса» идень рисункань выставкать.
Вяре лятфтаф мероприятиятнень эса активнай участия примасть Атерь велень 1№ средняй общеобразовательнай школань 3«Б» класса тонафнихне эсь учительснон Т.А.Сыркинать, А.К.Мозгуновать мархта. Мероприятиятнень аноклазь Идень библиотекаса покодихне Л.К.Вешкина, Н.И.Чудаева, З.П.Чевтайкина.
Илья ПЕТРОВ.
Снимкаса: мероприятиянь
участникне.