7 январсь Россиять военнай историяса мяляфтови дата. Тя шиня 1878 кизоня ушедсь Шейново велеть ала тюремась, конань эса рузонь войскатне кирдезь сяськомать турецкяй армиять лангса.
Турецкяй армиясь главнай виензон мархта ащесь Шейново велеть маласа Шипкинскяй перевалть каршеса кемокстаф лагерьса, пякснемок противникти кить Южнай Болгарияв. Командиркс ульсь Вессель-паша, кона сувсесь султанть инь тевонь содай и асу военачальниконзон ёткс. Но теенза ашезь сявов Шипка перевалсь.
Рузонь командованиять планоц ащесь Вессель-пашань армиянц генералхнень-лейтенанттнень М.Д.Скобелевонь и Н.И.Святополконь-Мирскоень колоннаснон мархта кафтонь-крдань фатяманц эса. Теест эрявсь ётамс Балканскяй перевалхнень (Имитлийскяйть и Травненскяйть), а меле, лисемок Шейново велеть малас, тиемс фланговай эрьхтемат лагерьса ащи турецкяй армиять ланга. Скобелевонь колоннанц ламошкац ащесь 16-це пехотнай дивизияста, кона кемокстафоль болгарскяй сисем добровольческяй дружинатнень мархта.
Шипкинскяй перевалть лангса Южнай отрядть командироц Ф.Ф.Радецкий (ударнай колмоце колоннась) лядыкс вийхнень мархта ащесь анокста, штоба аф максомс Вессель-пашанди ускомс кемокстаф лагерти эсь армиянц.
Войсканьке тюрсть апак пельхть. Туркатне панчсть тол 20-да лама орудияста. Ранендафоль командирсь графсь Толстой. Скобелев эстокиге кучезе лезксонди владимироцнень батальонцнон. Туркатнень мяльсна шарфтфоль види флангть лангс, сяс 9-це стрелковай батальонць, кона кемокстафоль дружинать и угличаттнень мархта, фатязе фкя инь эрявикс редутть. Тяфта укреплениянь васенце линиясь ётась кядезонк.
Шить омбоце пялестонза машфтфоль шинь мадома ширеса туркатнень оборонаснон мекольце линиясна, и синь ворьгодсть вирть пачк шинь стяма шири, лагерти и главнай курганти. Войсканьконди ляткшнесь аньцек молемс мельгаст, мезть синь и тиезь. Аш кода аф лятфтамс сянь, конашкава маштозь тюремать вятезе Скобелев.
Минь юмафксоньке: Мирскоень отрядса—2100 ломань, Скобелевонь отрядса—1700 ломань.