Колма ужеса солдатонь сёрманят. Синь арасть Великай Отечественнай войнань символкс. 1941 кизоня армияв эрь ковня пачфневсь 70 миллионшка сёрма. Конвертт ашесть сатне, да и коста синь сявомс пакся или вирь кучкаса. Кагод лопанявок аф най мушендовсь сёрмань тяштеманди. Эста и эвондась «фронтовой треугольниксь». Тюжалготф каготкятне тячемс ванфтовихть музейхнень эса, ветераттнень семьясост. Солдаттне сёрматкшнесть мала ломаньцнонды фронтовой эряфснон колга, лажатфснон и надиямаснон квалма. Каршезост «лийсть» кулят кудста. Боецне каннезь ня сёрманятнень седи вакссост. Синь макссесть теест вийхть стака тюрематнень пингста. Великай Отечественнай войнань кизотнень эвондась койсь кучсемс фронту сёрмат аф содаф ломаттненди, Родинань аралайхненди. Сидеста синь сёрматкшнезь шабатне. Школаса тонафнихне седиста моли лямбе валса арьсесть солдаттненди сяда курок машфтомс врагть и сяськома мархта мрдамс куду. Синць эсь ширдест надияфнесть лац тонафнемс и покодемс тылса.
Тячи, мзярда цёраньконди и аляньконди тага савсь стямс шачема мастороньконь аралама-идема, тя цебярь койсь вельмофтевсь. Россияса Оборонань и Просвещениянь министерстватнень мархта арьсефоль «Сёрма солдатти» акциясь. Тя пингти тяштьф и кучф специальнай военнай операциянь ётафтома васттненди идень 240 000 лама сёрма и рисунка. Кие-бди, шять, мярьги: «Шавос кагодть ётафнесазь». Аньцек мзярда няйсак солдатть летькомф сельмонзон, кона окопса ащемста луви шабань тя сёрманять эса и седисонза марясы идень ваймоста моли лембонять, эста шарьхкодьсак, кодама вий макссихть Родинань аралайхненди ня тяштьфне.
«Солдатонь сёрма» акцияса примайхть участия Мордовиянь шабатневок. Кие-бди тяштсь кудса, тядянц-алянц мархта, кие-бди школаса, ялга ёткса. Саранскяень 24№ школань 7-це классонь тонафнихне тиезь тянь Мужествань урокть пингста. Учительсна, Марина Николаевна Миронова, азондсь теест ётай и тяниень пингонь геройхнень колга, кошардозень эсь кядьсост тяштемс сёрмат Родинань аралайхненди. Синь ётксост и тонафни ялгаснон Егор Краковонь аляц. Шабатне марса тяштсть сёрмат теенза.
—Тяни монга шарьхкодьса, кодама питни солдатонь сёрмась. Аф кунара, 3 октябрьста, алязе, Евгений Николаевич Краков, тусь мастороньконь аралама. Сембе содасаськ кодама стака Украинаса, мзяра вий путнихть аляньке нацисттнень каршес тюремста. И вов мон сёрмадан: «Шумбрат, аляй! Шумбрат, Солдат!» и мяштьсон палы гордостень толня, вдь монь алязе—Родинань аралай. Сюконян мархтон фкя класса тонафнихненди, конат кирдезь Марина Николаевнань мяленц сёрмадомс алязти. Марса минь тяштеме 26 сёрма и рузонь, и мокшень кяльса. Алязе, улема, кенярди пефтома. А мон оцю мяльса карман учема эздонза ответ,—азозе солдатонь цёрась Егор Краков.
—Шабатне оцю мяльса тяшнесть сёрмат. Синь старандасть кочкамс тяфтама валхт, конат лездольхть аляньконди, цёраньконди мастороньконь араламста. Койсон, тяфтама акциятне пяк эрявихть. Синь макссихть воиттненди ваймонь вийхть кирдемс пси тюрематнень пингста. А нинге лездыхть сетьмофтемс куду лажадомаснон. Тяфтама урокнень пингста шабатне шарьхкотькшнесазь: питнесь и питнишись тя аф сембе сяка. Тяфтама кагодкять питнец мезьге аш, несколька цалковай. А вов питнишиц аф ункставомшка. Синь казихть солдаттненди надияма, кемама сяськомати. Военнай репорташнень эзда минь няйсаськ, кода ня кагод пакшкятнень воиноньке каннесазь седи вакссост, ванфнесазь питнидонга питни парши лаца,—азозе М.Н.Миронова.
Кда тинь нинге ашеде тяште сёрма солдатти, муда ётконя. Озада идентень, уноконтень мархта. Тяштеда содаф ломанентенди или сянди, кинь мархта вестевок ашеде васетькшне.
«Шумбрат, Российскяй Армиянь Солдат! Кода эрят-ащат? Минь эрь илядня ваттама кулятнень эса, пичеттяма инксот. Содасаськ, кодама стака тейть, кодама кяжи войнась, мзяра ломанень эряф сон сязсь-тапась. Но тон киртть!!! Кудса эсот учихть рьвяце и цёраце».
Валерия Манаева, 7-це класса
тонафни.
«Шумбрат, Солдат! Минь тонь мархтот аф содатама фкя-фкянь, но, арьсян, пяк кенярдят монь сёрмазти. Арьсян тейть кеме шумбраши, вийхть. Тят лажна минь инксонк: тяса сембось лац. Сяда куроконяста араласть мастороньконь и мрдак куду. Минь эсот пяк учтама!»
Дарья Павлова, школаса тонафни.