Ётай недялять, 2 ноябрьста, «Мордовия Республика» пабликса прямой эфирса Мордовия Республикань Военнай комиссарсь, полковниксь Игорь Валерьевич Тихомиров отвечась кизефкснень лангс.
Частичнай мобилизациясь—тя темась аф тёждя ламотненди. Тяддень 21 сентябрьста сявомок мархтонза сотф кизефкста пяк и пяк ламоль. Кой-конатнень лангс Игорь Валерьевич Тихомиров отвечась ётафтф прямой эфирса.
Газетаньконь тячиень номерсонза макссаськ кой-кона кизефкснень и лангозост ответтнень.
—29 октябрьста Российскяй Федерациянь оборонань министрсь С.К.Шойгу эсь докладсонза Российскяй Федерациянь Президентти В.В.Путинонди пачфтсь сянь колга, што Вооружённай Вийхнень рядозост поступась 300000 мобилизованнай. Ётксост улихть и Мордовиянь эряйхть. Социальнай сетьтнень подписчикснон и региононьконь эряензон эвондась тяфтама кизефкссна: ули-аш кода ломанти максомс повестка сяда меле, кода азфоль мобилизованнай мероприятиятнень шумордамаснон колга?
—29 октябрьста сявомок запасста граждаттнень частичнай мобилизациять коряс серьгядемаснон мархта сотф мероприятиятне шумордафт военнай комиссариаттнень марса республикань исполнительнай и местнай самоуправлениянь оргаттнень мархта. Лиякс азомс, повесткатнень макссемасна 29 октябрьста лоткафтф. Тя шиста сявомок повесткат аф военнай комиссариатонь сотрудникне, аф техническяй работникне, аф посыльнайхне аф каннихть. Сяда тов Российскяй Федерациянь Вооружённай Вийхнень пуроптомасна кармай мольфтевома аньцек доброволецнень, а стане жа контрактс коре военнай службань ётайхнень кандидатснон вельде.
—Подписчиксь кизефни: военкоматса кучемазь дополнительнай обследованияс. Тяни мобилизациясь регионца лоткафтф. Эряви-аф тейне ётамс обследования и кандомс результаттнень военкомату?
—Запасса гражданинть тяфтама обязанностец—кондястикс улемань категориять полафтомдонза меле теенза кафта недяляста пачфтема тянь колга военнай комиссариату. Сяс обследованиять ётамдонза меле, медицинскяй уликс заключениять мархта гражданинти молема военнай комиссариату сянкса, штоба тиевольхть полафткст учётнай даннаензонды.
—Ломаттнень кядьса повесткат, но мобилизационнай мероприятиятне шумордафт. Кепотьксонди, гражданинць сась октябрьста сборнай пункту, но кодама-бди туфталонкса получась отсрочка недяляс, кафта недяляс, колма недяляс и сонь повесткац, мярьктяма, ноябренди или декабрь ковонди, а мобилизациясь шумордаф. Молема-аф теенза военнай комиссариату?
—Кда повесткась максфоль мобилизациянь ётафтома пингть, гражданинти сама военнай комиссариату. Васендакиге тя тиема даннаензон проверямаснон инкса и штоба сяда тов тоса улель колганза сяда видексонь информациясь.
—Лама кизефкс эвондась мобилизованнайхнень кизоснон (возрастснон) колга. Мяленьке содамс, мзяра кизоса алятнень ули кода мобилизовандамс?
—Мобилизационнай мероприятиятне республикасонк шумордафт. Сась пяк лама кизефкс сашенды и «пси» линияв, и сёрмаса кода военнай комиссариату, стане и государственнай властень, местнай самоуправлениянь оргаттненди. Сембе ня кизефкснень лангс максфтольхть разъясненият. Ламоль кизефкста и кизотнень (возрастть) колга. Запасса граждаттне, конатнень прапорщиконь, солдатонь, сержантонь воинскяй званиясна мобилизацияс коре сявондевсть 45 кизоснон молемс.
—Ётатама сёксень призывти. Кода сон мольфтеви Мордовияса?
—Сёксень призывть пингста республикаста тердеви 600-ть малава ломань. Призывс коре серьгятьф военнослужащайхне аф кармайхть кучсевома службань ётама Донецкяй и Луганскяй Народнай Республикатнень, а стане жа Запорожскяй и Херсонскяй областтнень эса воинскяй частьтненди. Призывс коре сембе военнослужащайхне аф примайхть участия специальнай военнай операциять ётафтомаса.
—Улихть-аш тядде уклонистт? Кода ащихть тянь мархта тефне?
—Уклонистт, ужяленди, улихть. Но мялезе лятфтамс, што тя категорияти канневихть ся граждаттне, конат ётазь призывть мархта сотф сембе мероприятиятнень и ашесть са призывной пункту. Уклонистта пяк кржа. Мархтост сотф материалхнень кучсесаськ следственнай комитету уголовнай тевть ушедоманкса. Улихть граждатт, эздост сяда лама, конатненди стака максомс повесткаснон. Тя уленди, кда аф содаф коса ломанть тяниень эряма или работама вастоц. Сяс и эвондакшнихть стакат-сталмот повесткать максоманц мархта.
—Мрдатама мобилизацияти. Повесткань кодама максомась лувови аф правомернайкс? Повесткань канникс улема аньцек военкоматонь сотрудникти или ули кода арамс лия кодамовок ломаненди?
—Нинге весть азса: повесткань явондомась 29 октябрьста шумордаф. Тняра повесткать республикаса нюрьхкяня пингста каннемс ашель кода аньцек военнай комиссариатонь должностной лицатнень вельде. Сяс руководящай документтнень мархта (эздост пяк лама) максф предписания, што повесткатнень макссемаснон мархта заняф усилениянь аппаратсь, лиякс азомс, тя тевонди путф специальнай ломаттне, конат аф работайхть военкоматса, а тевонь тиема водендакшневихть мероприятиятнень ётафтомста. Синь лемневихть посыльнайкс.
—Кда ломанць илять сась куду работаста и, мярьктяма, мусь кенкшса повестка, лувови-аф сон получафокс тяфтама случайста?
—Тяса, васендакиге, пшкядема гражданинти, конань лемс тяштьф повесткась—лувсы-аф сон сонь теенза максфокс. Фалу тернян запасса гражданинть гражданскяй ответственностенцты, совестенцты.
—Ульсть медкомиссиять мархта сотф кизефкст. Ётнесть-аш Мордовияста мобилизованнайхне медицинскяй комиссия?
—Запасса гражданинть муниципальнай районть сборонь пунктозонза прважаманди самстонза теенза ётафневи медицинскяй осмотра. Тянь тиендьсы фельдшерсь. Ся случайста, мзярда запасса гражданинць пеняцяй и кемокснесы тянь медицинскяй документтнень мархта, теенза ётафневи медицинскяй освидетельствования.
Прямой эфирса Мордовия Республикань Военнай комиссарсь, полковниксь И.В.Тихомиров корхтась мобилизованнайхненди пандоматнень макссемаснон колга. Аф кржа кизефкс, кле, сашендсь мобилизованнайхнень семьяснон эзда.
Вов мезе тянь колга мярьгсь Игорь Валерьевич:
—Военнослужайхненди ярмаконь довольствиясь панневи ковть 10-це числастонза сявомок 20-це числанцты молемс—ётай ковть инкса. Лиякс азомс, военнослужащайхне, конат, кепотьксонди, сявфтольхть сентябрьста, ярмаконь довольствиять получазь октябрьста. Октябрьста сявф военнослужащайхне пандоматнень получасазь 10-20 ноябрьста. Ярмаконь сембе довольствиятне пандовихть уликс норматнень мяльса кирдезь. Тянкса аф военнослужащайхне, аф синь рьвасна, аф тядясна-алясна катк аф пичедихть.
Прямой эфирти анокламста и пингстонза сась пяк лама частнай кизефкс. Кода азфоль, сембе синь сявовихть мяльс, фкяське эздост аф ляды апак ватт. Кизефксне кучевихть военнай комиссариаттненди, коста и получайхть ответт.
Трансляциять шумордамста Мордовия Республикань Военнай комиссарсь И.В.Тихомиров пшкядсь военнослужащайхнень рьваснонды и тядяснонды:
—Сборнай пункттнень эса фалу корхнень афкуксонь героеньконди сянь колга, што нинге и нинге весть шарьхкодине: российскяй авада цебярьхть аш. Оцю спасиба, ават, мирдентень, цёрантень ратнай трудонди бславаманкса!