Синь служасть эсь народснонды!

19 ноябрьста, Саранскяйса, А.С.Пушкинонь лемса национальнай библиотекаса, ётафтовсь литературнай ила, кона лемтьфоль писательхнень-фронтовикнень Михаил Петровонь и Иван Шумилкинонь шачема шиста 100 кизонь топодемати. Аноклазь и ётафтозь сонь библиотекань национальнай и краеведческяй отделонь сотрудникне. Панжезе илать тя отделонь заведующайсь Надежда Бочканова.
Сяльде Михаил Петровонь эряфонь и творческяй кинзон колга пуромфненди азондсь национальнай и краеведческяй отделонь главнай библиотекарсь Вера Пронина. Мордовия Республикань Народнай писательсь Михаил Трофимович Петров шачсь 1924 кизонь 19 ноябрьста Мордовиянь Инсарскяй райононь Мокшень Паёвка велеса крестьянонь семьяса. 1942 кизоня Пензенскяй лесотехническяй техникумть аделамдонза меле тертьфоль фронту. 1951 кизоня шумордазе Мордовскяй пединститутонь историческяй факультетть.
Сёрмадсь рузонь кяльса лама историческяй повесть и роман. Васенце повестец «А было так…» нолдафоль Саранскяйса 1963 кизоня. Мельганза лиссть «Алёна Арзамасская», «Фёдор Ушаков», «Румянцев-Задунайский», «Красный колосс» и историческяй лия содаф романонза.
Михаил Петров кулось 2013 кизонь 24 июньцта. Калмаф Саранскяйса.
Иван Шумилкинонь эряфонц и творчестванц колга пуромфненди азондсь тяка отделонь главнай библиотекарсь Валентина Бояркина. Иван Егорович Шумилкин шачсь Мордовиянь Ичалковскяй райононь Лобаски велеса крестьянонь семьяса. Средняй школать аделамда меле, 1942 кизоня, тертьфоль фронту. 1950 кизоня шумордазе Мордовскяй пединститутонь филологическяй факультетть. Сёрмадсь эрзянь кяльса стихт и баснят. СССР-нь Писателень союзу примафоль 1968 кизоня.
Иван Шумилкин—СССР-нь Писателень союзонь член, Мордовиянь культурань Заслуженнай работник. Казьф Великай Отечественнай войнань II степенень орденца, лама медальса и МАССР-нь Верховнай Советть Президиумонц Почётнай грамотанц мархта. Кулось поэтсь 2006 кизонь 25 мартста. Калмаф Лобаски велеса.
Сяльде Михаил Петровонь и Иван Шумилкинонь творчестваснон коряс научнай доклад тись Н.П.Огарёвонь лемса МГУ-нь финно-угорскяй филологиянь кафедрань заведующайсь, филологическяй наукань докторсь Юрий Григорьевич Антонов. Писательхнень-фронтовикнень творчестваснонды оцю оценка макссть Мордовиянь Писателень союзть председателец, республикань Заслуженнай поэтсь Татьяна Мокшанова, Мордовиянь Заслуженнай писательсь Николай Голенков и лиятне.
Владимир Нестеров.