Синь тевсна—кирнемс сво-нь участникнень ширеснон

3 июньцта Мордовиянь Оцюнясь Артём Здунов васетькшнесь «Защитники Отечества» госфондть региональнай филиалонц руководстванц и социальнай координаторонзон мархта. Лятфтасаськ, фондсь панчфоль кизода тяда инголе Россиянь Президентть инициативанц коряс.
«Защитники Отечества» фондсь заняф специальнай военнай операциянь участникнень ширеснон кирдемаса. Фондть филиалсонза покоди 38 ломань, 30-ць конатнень ёткста—социальнай координаторхт, синь улихть республикань сембе райоттнень эса.
«Покоттяма кизода ламос ни. Ваныне статистикать—сембода лама пшкядемада пандоматнень, социальнай пособиятнень коряс, но и юридическяй, медицинскяй кизефксне стане жа ащихть васенце вастса. Мялезе кулемс эздонт, кие эрь шиня заняф тя работать мархта, кода эрятада, мезть коряс и коса работатама аф сатомшка лац»,—приветствовандазень васедемань участникнень Артём Здунов.
Филиалть руководителец Алексей Герасименко азозе, што региональнай фондть панжемста тяза пшкядсь ни пцтай 6,5 тёжянь ломань. Ётксост боевой действиянь ветератт, военнослужащайхть, СВО-нь участникт и синь семьянь членцна. Тя пингста максф 11 тёжянь услуга, филиалу поступаф кизефкснень 96 процентсна решандафт.
СВО-нь участникненди и ветераттненди, синь семьянь членцнонды лезксонь максомань инь цебярь практикатнень колга азондсть фондонь социальнай координаторхне. Тяниень пингть синь работайхть 1557 ломань мархта.
Боевой действиянь ветеранць Иван Волков, правоохранительнай органонь ингольдень сотрудниксь, мольфтсь работа пцтай 400 пшкядемань коряс. Сон китькстазе, што республикаса здравоохранениянь, социальнай араламань учреждениятнень эса сембе кизефксне решандакшневихть оцю шарьхкодема мархта.
Алеся Волкова покоди социальнай координаторкс фондть панжемста. Кизоньберьф теенза поступась 300 личнай пшкядема.
Пуромфне корхтафтозь республикаса военнай госпитальть панжеманц. Сон пяк эряви боецнень эсь пингстонза пчкафнеманкса и реабилитациянкса.