«Клуб активного долголетия» Мордовия Республикань эряфкшу ломанень Ассоциациясь пуроптфоль 2008 кизоня. Ассоциацияти сувсихне васенце вастти путнесазь эряфонь шумбра койхнень, культурно-досуговай тефнень, конатнень вельде кемокстави шумбрашись, получавихть од содамошит, ладявихть ялгаксшинь соткст.
«КЛАД» Ассоциацияв пуромсть сят, кинь колга ули кода мярьгомс: синь сирешись кудса аф сатсыне. Тяфта и лиссь ёфси аф кунара. «Клуб активного долголетия» Ассоциациясь арась сяськикс «Молоды душой-2022» конкурсса. «Нас старость дома не застанет» проектть мяльса кирдезь 2023 кизонь февральста сявомок июнти молемс ётафтовихть мастер-класст Мордовиянь 22 муниципальнай районца.
Тяфтама проект «КЛАД» Ассоциациясь ётафнесь эряфс 2017-2018 кизотнень. Эста сон сяськсь Президентскяй гранттнень Фондснон конкурсса.
И вов сай кизоть Ассоциацияти сувсихне тага кармайхть водендамост велень эряфкшу ломаттнень физическяй культурати и спортти. Штоба синь занятиятнень тиенделезь аф кой-коста, шурода весть, а фалу.
Аф кунара марнек странаса ётафтовсь «10 тысяч шагов к жизни» всероссийскяй акциясь. «КЛАД» Ассоциациять членонза ашесть ляда ширеса и оцю мяльса примасть участия эсонза.
Участникненди эрявсь ётамс ялга аськолязь 1,5 вайгяльбе Саранск ошень ульцятнень эзга. Васенда ульсь разминка художественнай гимнастикать коряс Россиянь спортонь мастерть, групповой упражнениятнень эса Россиянь Чемпионатть бронзовай призёронц О.Сюбаевать эзда. Эрти ульсь кода ункстамс шумбрашинь биологическяй параметратнень: ронгть температуранц, пульсть «эрьхнеманц», артериальнай давлениять, верса кислородть.
«10 тысяч шагов к жизни» акциять васенце целец ляткшни сякокс—тиемс якамать стама тевкс, конань вельде фалу лядат эрьгавкс, кемокстасак шумбрашить.
Саранск ошень Спортонь ведень видонь Дворецса ётафтфоль Мордовия Республикань эряфкшу ломаттнень ёткса уендемать коряс личнай первенствась. Спортивнай тя пуромкссь уленди кизоти кафксть, вельденза сотцевихть инь курокста уихне сяда эряфкшуфнень ёткса.
Призовой васттнень инкса пялькстсь 15 ломань, конатнень ёткса ульсть 82 (!) кизоса ветератт!
25 метрань дистанцияса аватнень ёткса васенце вастть сатозе «КЛАД» Ассоциациять инструктороц Вера Саушкина, кона вов ни несколька киза мельцек сяськонди спортонь тя видса.
Тяка жа дистанцияса омбоцекс арась Светлана Мясоутова, колмоцекс—Елена Барсукова.
Алятнень ёткса сяськсь Михаил Кечайкин, омбоцекс дистанциять ётазе 82 кизоса Валентин Лазарев, колмоце вастть сатозе Рашид Мухаметзянов.
Сембе призёрхне казьфтольхть медалса и грамотаса.
«Клуб активного долголетия» Мордовия Республикань эряфкшу ломанень Ассоциацияти сувси 300-ть малава 55-85 кизоса ломань. И синь анокт ёткозост примамс од ялгат. Тяфтама ломаттнень сирешись кудса аф сатсыне!
Т.ВЛАДИМИРОВА.