Атерь велеса лац содаф Сиркиттнень оцю и трудонь кельги семьясна. Василий Сергеевич—Шяйгужень, Марина Петровна—Од Кярьгонь. Од векть ушетксста трудонь кельги ня кафта ломаттне састь мяльс пуроптомс эстеест семья. Эряма вастонди кочказь Атерь велень Восточнай ульцять. Райцентраса эрязьге васенда водендасть оцю подсобнай хозяйства. Тоса эсь хозяйстваснон лемдезь крестьянско-фермерскяйкс. Аф стак корхтайхть, што ломанть павазоц—трудса. Аф содаса, кода лиятнень, но Сиркиттнень павазсна афкукс трудса.
Тяни крестьянско-фермерскяй хозяйствасост лувондови колмогемонь потяма тракс. Ши ётазь лофцть инкса сашенды машина Краснослободскяень маслозаводста. Эрь мезне заводу прважсихть 400-та лама литра лофца. Тяда башка, Сиркиттне эсь продукцияснон мишендьсазь Атерь велень эряйхненди. Тя лофца, вай, мичке. Ломаттне рамсесазь пара мяльса.
—Мон сявондян Сиркиттнень кядьста лофца,—корхтай трудонь ветеранць П.И.Сяткин.— Тяфтама лофца кодамовок лавкаста аф рамат.
И виде, Сиркиттне ванцазь эсь клиентснон мяльснон. Продукциясна най свежай. Усксесазь кудга синць. Вестевок ашесть куленде пеняцямань валхт.
Ульсь пинге, пурхцозафнесть тувотка. Пурхцкятнень мишендезь райононь эряйхненди. Тянивок кирдихть тувот. Касфтыхть вазнят, букат. Сивольть мишендьсазь. Улихть куднармоньцновок. Лиякс азомс, ваймосемс аш мзярда. Стяйхть рана, мадыхть поздна. Кизонда питни эрь минутась. А кда нинге кирдемс мяльса, што «кизонь шись киза анды», корхтай ламонь колга.
Шарьхкотьф, што тняра жуватати кормадовок эряви аф кржа. Сяс кудонь тефне, жувататне Марина Петровнань лафтувонзон лангсот. Нинге сядонга ответственнай тевоц и Василий Сергеевичень. Сон сокай-види, урядай сёра. Улихть тишень паксянза. А тя и техникань петема, и ГСМ, и удобреният, араламат паксятне вредительхнень эзда. Сяс аф кенери шись ушедомс, тевса-заботаса аделави апак приметак. Но мокшалясь най работай кепотьф мяльса. Аноклай корма эсь жуватанзонды. Ули мимска. Ломаттненди аф улендихть кодамовок прябалат. И тишеть, и сёроть усксазь кудозост. Мокшалясь мзярдовок ашезь каендакшне, што кярьмодсь тя аф тёждя тевти.
Алянь, мирдень киге моли и семьяц.
Коста трудонь тя кельгомась? Конешна, семьяста. Кепотьксонди, сявсаськ Марина Петровнань семьяснон. Повеляйкиттне Од Кярьга велеса най шнама ломаттельхть. Анна Кузьминична трудендакшнесь Оцядувонь пекарняса. Пётр Иванович «Красное знамя» совхозса кизонда постуфоль, тялонда фермаса скотниколь.
Мокшавась тусь эряфста пяк рана. Иденза нинге ёмлатольхть.
Кудсост азораванди лятфоль Марина Петровна. Сон ульсь и пидись-панись, и муськись-шовайсь. Тянемс ащи тядя вастс. Ёмла Повеляйкиттненди Марина Петровнань кудоц най панжада. Примасазь сембонь, киндивок аф атказайхть.
Василий Сергеевиченьге тядянза-алянза, Сергей Кузьмич и Матрёна Терентьевна, передовой труженниктольхть совхозса. Кунара ни ашет шиса, но тянемс Шайгужеса лятфнесазь аньцек шнамань валса. Трудонь кельгомаснон максозь цёраснонды. Василий Сергеевич эсь трудовой кинц ушеткшнезе «Красное знамя» совхозса, коса Од Кярьга велень отделенияса ульсь молочнотоварнай фермань заведующайкс. Меле совхозсь срадсь-каладсь, но мокшалясь ашезь ляда тевфтома, водендась эстеенза хозяйства. Крестьянско-фермерскяй хозяйствац аф весть лувондовсь инь цебярькс районца, республикаса, лисендсь сяськикс эрь-кодама пялькстомаса. А мзяра казнедонза!
Семьясь Сиркиттнень эряфса васенце вастса. Марина Петровнань и Василий Сергеевичень ниле идьсна. Аф кунара шачсь уноконясна. Сембе синь, ушедомок идень садста, лезнихть тядяснонды-аляснонды. Сергей эряй Москуса, трудендай энергетикокс. Анна стане жа Москуса, сон полициянь сотрудник. Максим тонафни Торбеевань мясомолочнай промышленностень колледжса. Кирилл якай содамошинь пуропнема Атерь велень 2№ средняй общеобразовательнай школав. Сембе тевсот, вастоват.
—Эряфсь аф ащи фкя вастса, аськоляй инголи,—корхтай Марина Петровна.—Монь тячи аньцек фкясь мяльсон сяда вишконяста аделаволь СВО-сь. Минь цёраньконь касфтсаськ аф войнанди, а сокама-видема, оцю и ёмла тевонь тиема, семьянь пуроптома и идень шачфтома-касфтома.
И тянь мархта аш кода аф согласиндамс.
Илья Вешкин.