Сисем идьсна—сисем павазсна!

Семьясь лувондови павазукс, кда кудботмоса кулевихть идень вайгяльхть. Мзяра шабатне—снярксть павазуват. Семьясь шабафтома аф семья. Лама ёню вал азф семьятнень и эсост идень улемать колга. Аш кода мярьгомс, што тя аф тяфта. И кда инголи лама идень семьясь ульсь тонатф тевкс, то мекольдень колмогемоньшка кизотнень тядятне-алятне шачфнесть тифтень, кафтонь, инь ламось—колмонь шаба. И фкя кядьса сурхне сатольхть лувомс лама идь мархта семьятнень. Павазонди, тя тевсь валомне полафни цебярь шири. Колма и сяда лама идь мархта тядятне-алятне тага арсихть тонатф тевкс. И ваймосот уленди пара мархтост васьфтемда меле.

«Бта вай поколь арась седиезон». Ня валхнень сидеста нолясазь тевс мокшетне цебярь кулянь-латтонь кулемда, пара тевонь тиемда, а нинге—киньге мархта седикс-ваймокс корхнемда меле. Самай тяфтама «вай поколь» эвондась «Мокшень правдань» корреспонденттнень седисост Ковылкинскяй райононь Малав велеста Ермакофнень лама идень семьяснон мархта содафокс арамда меле.
Мокшень ломаттне Елена Петровна и Владимир Михайлович касфтыхть сисем итть.
Инь оцюти, Иванонди, 17 киза. Сон тонафни Н.П.Огарёвонь лемса Мордовскяй государственнай университетть Ковылкинскяй филиалса 3 курсса программистокс. Сон ваймама шитнень тядянцты и алянцты васенце лездысь. Тяда башка, аф кржа пинге ётафни ёмла сазоронц и дуганонзон мархта.
Ермакофнень омбоце идьсна—Глеб. Цёранясь тонафни Малав велень школань 6-це класса. Мельганза моли дуганоц Прохор, сон тонафни 4-це класса.
Нинге фкя дуганцна Дамиан—3-це классонь ученик.
Макаронди кота кизонят, сяс школать порогонц васенцеда аськолдасы сай кизоть.
Ермакофнень фкя стирьсна—Аня. Теенза ниле кизонят.
И сисемце идсь—Стефан, конанди аф кунара топодсь кизоня.
Семьянь азорсь Владимир Михайлович шачсь-кассь Малавса мокшень лама идень семьяса. Елена Петровнань ёмла родинац—Од Лепию шабрань велесь. Малаву эряма ётась Владимир Ермаковонди рьвакс лисемдонза меле.
«Малавонь школаса тонафнеме марса, сяс фкя-фкянь содатама кунара. Тушендоме Москуву, коса и рьвяяме. Столицаса шумордайне Государственнай и корпоративнай управлениянь Московскяй институтть. Профессияс коре экономистан. Мирдезе Краснослободскяйса шумордась профессиональнай училища, покодсь Москуса и башка мяль шарфнесь спортти»,—лятфни Елена Петровна.
Москуса Ермакофне эрясть кемгафтува киза. Тоса шачсь васенце идьсна—цёрасна Иван. Мзярда теенза ульсь кота кизот, мрдасть Малаву.
«Васенда эряме тядязень и алязень кудса, конань синь кадозь тейне. Меле ни строяме эстейнек эряма васта»,—мярьгсь Владимир Михайлович.
Но эстеест куд путсть аф эстокиге.
«Мзярда араме лама идень семьякс, получаме субсидия, ульсь тядянь капиталоньке, минцень кочкаф ярмаконьке, вов и саме мяльс кярьмодемс стройкати»,—сяда тов азондсь мокшавась.
Кафта этажса кудсна пцтай ни анок. Мзярда корхнеме мархтост, Ермакофне самай рамсесть од эряма вастозост мебель, лия эрявиксть. Нинге ёрайхть путомс баня.
Эняльдеме Владимир Михайловиченди азондомс эсь колганза. Мокшалясь вельф скромнай, лама корхтаманц аф кельгсы. Мзярс кизефнень рьванц Елена Петровнань эса, сон заняфоль иттнень мархта. Синь вятезь пряснон аш ни кода сетьмоста, сяс мес няезь: тядясна корхни тев мельге саф ломань мархта. Васедемаса ашель аньцек Иван, сяс мес сон тонафнема вастсоль.
Семьянь азорсь колмоце кизось работай Краснослободскяй лесничестваса вирень инспекторкс. Тяда инголе заняфоль велень хозяйстваса.
Лац содасы, мезе стамсь лама шаба мархта семьясь, сяс мес сонць кассь тяфтамса—Ермакофнень семьяса ульсь вейхкса итть. Владимир Михайлович лувксс коре кафксоцесь. Дуганонза и сазоронза эряйхть Москуса, но сон ашезе полафта Малавть странать столицанц лангс, хуш и эрясь тоса аф фкя киза.
«Мзярда ётатама эряма од кудозонк, тядянь-алянь кудть аф кадсаськ. Меколанкт, сяда тов арьсетяма петемс сонь. Шабадонк сисем, сяс тя «пизось» фалу кирдема анокста»,—пачфтсь эряенди планцнон колга мокшалясь.
Но аф аньцек иттнень касфтомаснон-воспитандамаснон мархта заняф Елена Ермакова. Мирдец пингть ламошканц ётафнесы работама вастса, пирьфсовок тевда уленди сатомшка. Мокшень ломаттне путнихть оцю пере, кирдихть кафта тракст, вазнят, тувот, сараст. Владимир Михайловичень сонцень трактороц. Ули кода азомс, алясь—труженик, кода работаса, стане и кудса.
Мзяра частста Ермакофнень семьяса ушеткшни шись? Тя кизефксть лангс мирдсь и рьвясь отвечасть, што ветешка частста. И мадондыхть пяле веть малава.
Эрь журналистсь, улема, кда аноклай материал тя или тона ломанть квалма, пцтай фалу максси кизефкс ётка пингть колга. Кда сон и уленди, то кода ётафнесы. Арьсень-тиень и сембе сяка кизефтине тянь лама идень тядятнень-алятнень, кргавидева заняф ломаттнень, Малавонь труженикнень Ермакофнень кядьста. И ашень эльбяде! Лиякс синь афолезь аза кельгома тевснон эзда фкять—мешень кирдемать. Владимир Михайлович лемдезе сонь рузкс—«хобби» валса. Ся морафтыеньке, конат васьфнесть тянь мархта, азсазь, кда и сон арси кельгома тевкс, то стамкс, кона веши лама вий и илештень кятть покодема.
Ермакофнень синцень аф аньцек сивольсна, саразонь алсна, перень сёросна, но и медьсна.
Аф ваномок заняфшиснон лангс, семьясост отмечсевихть сембе шачема шитне. Инь кельгома илакс лувондовихть Очижись, Од кизось, Роштувась, Святой Тройцянь шись. Ермакофне сидеста якайхть Малав велень церькаву.
Мархтост корхнемась вай поколькс ульсь седисон ламос. Мзярда цють ушедсь солама, сась пинге тяштемс колгаст тя материалть. Люпштайне диктофонцта «пунянять», кармань кулхцондома и, мярьгат, тага васьфтень Елена Петровнань, Владимир Михайловичень и синь кота идняснон мархта. Кой-мзярс юкставсть монцень пичефксоне, а ламоксть лятфнеф вай покольсь тага калготкстомсь и, надиян, нинге кой-мзярс аф солай.
Татьяна Альшина.
Фотось Николай КАРАНОВОНЬ.

Последние новости

Нацпроект и снижение смертности при ДТП

В рамках национального проект «Безопасные качественные дороги» в Мордовии...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта,...

Саранск встретил март «Весенней ярмаркой подарков» 

1 марта в столице региона, при поддержке Министерства экономики,...

В Региональный сосудистый центр №2 поступает новое современное оборудование

Региональный проект «Борьба с сердечно-сосудистыми заболеваниями» национального проекта «Здравоохранение»...

ПОСЛАНИЕ ПРЕЗИДЕНТА

Инициативы Президента Владимира Путина по итогам послания Федеральному Собранию  29...

Благоустройство Дубенского района Мордовии

Центральная площадь вс. Дубенки, 2 общественные территории в с....

Нацпроект и снижение смертности при ДТП

В рамках национального проект «Безопасные качественные дороги» в Мордовии реализуется региональный проект «Безопасность дорожного движения». Одна из его задач – сокращение смертности в результате...

В Мордовии продолжается реконструкция районных домов культуры

Торбеевский дом культуры – центр притяжения всего района. Здание построено в 1974 году и давно требовало ремонта. В 2023 году по национальному проекту «Культура»...

Дискуссия по развитию БРИКС прошла на Всемирном фестивале молодёжи

В рамках Всемирного фестиваля молодёжи в субботу, 2 марта, прошла дискуссия «БРИКС: новые вызовы в эпоху глобального развития». На мероприятии также прошли дебаты «Приоритеты и...