Эрь кизоня октябрьста марнек Россияса уленди эряфкшу ломанень ковсь. Пингстонза сядовок оцю мяль шарфневи сире ломаттненди, пенсионерхненди. Мордовияса сёксеть омбоце ковстонза ётафневи эряфкшуфненди лемтьф аф кржа пуромкс: васедемат, концертт, акцият, экскурсият, спортивнай пялькстомат… «Сиянь» кизонь ломаттнень мяльс тушенды колгаст заботендамась, но сидеста синь синцьке примсихть участия ламоц пуромкснень эса, няфнемок цебярь пример оттненди.
Рузаевскяй муниципальнай райононь Мокшень Пишля велень «Сиянь волонтёрхт» клубнай формированиянь участникне октябрьста ётафтсть «Озафтт шуфта» экологическяй акция. Синь састь мяльс тиемс родной велеть сяда сянгярякс, мазыкс, арукс. Васенда озафтсть пиченят Культурань кудть видеса. Пичесь—фалу сянгяря, вии, шумбрашинь и виень кемокстай шуфта. Тяда башка, лац аруяфнесы кожфть. Аф лама шуфтонди и касыксонди ули кода шнафтомс пря тняра цебярь ширетнень мархта.
«Шуфтонь озафтомать вельде ули кода кадомс эсь колгаст цебярь лятфнембяль модать-масторть лангс»,—мярьгсть «сиянь» волонтёрхне и оцю мяльса кярьмодсть тевс.
Ёмла шуфтонятнень-саженецнень «добувазь» синць. Ашезь рама базарста или магазинцта, эсь вийса якасть пиченянкса вири. Тоса удалась кафтонь-крда—лама панга кочкасть.
Сёксень ши валдта пяшксе шись макссь акцияса участиянь примайхненди вийхть-эрьгат. Тефне Культурань кудть перьф лаказь лакасть. Несколька частта меле озафтф ёмла пиченятне салсесть сельмованф.
Но тянь лангс «сиянь» волонтёрхне ашесть лотка. Ётась мзярошка ши и синь тага пуромсть Мокшень Пишлянь Культурань кудть малас. Марстонь вийса перязь озафтф пиченятнень—эрти тисть колма ужеса «кудня» штакетникста. Тяни шуфтонятне лац аралафт, сяс юрснон кемокстамда меле кармайхть касома сяда курокста.
«Сиянь волонтёрхт» формированияти сувсихне тернесазь ёткозост сембонь. Марстонь вийса ули кода тиемс лама тев—лездомс шачема-касома велети, ётафнемс пуромкст.
Эряфкшу ломаттненди лемтьф праздничнай пуромкс ульсь 20 октябрьста Мокшень Пишлянь Культурань кудса. Лемоцоль «Ваш возраст бережно храня».
20 октябрьста сявомок 30 октябрти молемс Культурань кудса работай Эряфкшу ломанень ковти лемтьф «Живём и творим» лем ала декоративно-прикладной творчествань выставка.
Мокшень тя велень «сиянь» волонтёрхне тевса заняфт фалу, а аф аньцек теест лемтьф ковть или ётафневи праздникнень и лия пуромкснень пингста. Ётксост улихть кодамань станца кодайхть, сюреса сёрмадыхть, моронь и сиде моронянь морайхть, танцтиста пидихть-панихть. А тяфтама ломаттненди тевфтома ащекшнемс аш мзярда.
Т.АЛЬШИНА.