Россияса населениянь бытовой обслуживаниянь и жилищно-коммунальнай хозяйствань работникнень шисна уленди мартть колмоце недляшистонза. Тядде сон савсь тундать васенце ковонц 16 числанцты.
Кирдемок тянь мяльса, 12 мартста Саранскяйса, Республикань Кудса, ульсь торжественнай пуромкс, конань пингста азфоль лама пара вал населениянь бытовой обслуживаниянь и жилищно-коммунальнай хозяйствань работникнень лемс, оцю казнет сатсть инь достойнайхне.
Тя шиня Мордовия Республикань Оцюнять Артём Здуновонь кядьста жилищно-коммунальнай хозяйстваса сатфксонкса и лама киза седикс-ваймокс покодеманкса Мордовия Республикань Почётнай грамотать получазе Саранск ошень «домоуправление №41» ООО-нь 5 разрядонь слесарсь-сантехниксь Андрей Служаев. Седи ваксста поздравляндасаськ Андрей Геннадьевичень казненц мархта! А газетать тячиень номеронц эса оцю мяльса пачфттяма трудонь кельги алять колга.
Андрей Служаев ся ломаттнень эзда, конатнень колга ули кода содамс тевснон вельде. Сон вельф скромнай, лама корхтаманц аф кельгсы, фалу заняф тевса. Жилищно-коммунальнай хозяйстваса покоди 1993 кизоста сявомок. Эста несколька ков дворниколь Саранск ошень 16№ муниципальнай жилищнай ремонтно-эксплуатационнай предприятияса. 1994 кизонь февральста сявомок 2003 кизонь июнти молемс предприятияса слесарель-сантехниколь. Меле несколька киза тяка тевть тиендезе «ИП Сайгашкин В.Ф.» организацияса. А 2007 кизонь мартста сявомок и тячиень шити Андрей Геннадьевич слесарь-сантехник 41№ домоуправленияса. Машты кядь алясь ётазень разрядонь сембе «куцеманятнень» и пачкодсь эздост инь серити—5 разрядоннети.
41№ домоуправлениянь генеральнай директорть, мокшалять Евгений Шершеновонь валонзон коряс, тяниень пингть коллективса работай слесарьхнень-сантехникнень ёткста колмотне 5 разрядоннет. Тя корхтай маштомошиснон, оцю квалификацияснон колга. Андрей Геннадьевиченди сидеста макссевихть инь стака заявкатне, сяс мес инголенди содаф, што семботь петьсы, тисы совестьс коре. Сонь крхкат содамошинза центральнай отоплениянь, водоснабжениянь, канализациянь и ведень шудема вастонь трубопроводнай систематнень санитарно-техническяй петемаснон и кочкамаснон коряс. Слесарсь-сантехниксь Андрей Служаев коняф сельмот азсы, коса и кода полатфт фкя-фкянди трубатне, водопроводсь. Кядьсонза механизированнай сембе инструменттне моразь морайхть.
«домоуправление №41» ООО-ти, кона республиканьконь столицанц Химмаш районцонза, канневи лама квартирань 58 эряма куд. Арьседа тинць, мзяра ломань пшкятькшни лезксонкса эрь шиня. Квартирань азорхне кадондыхть заявкат, синь пяшкодемат маластонь пингть. Андрей Геннадьевич аф ваны часттнень лангс. И, мзярда рабочай шиц шумордаф, а тефт нинге улихть, куду аф тушенды, а эряскоды работань вешфкснень коряс. Сембода сидеста синь улендихть сотфт отоплениять, водоснабжениять петемаснон и ломаттнень квартираснон эса сантехническяй оборудованиять петемаснон мархта. Андрей Служаевонь лемс эряйхнень эзда сашендыхть благодарностень валхт.
Слесарсь-сантехниксь оцю мяльса работай од кадратнень мархта, тонафтсыне синь, фалу лезды. Козя опыт мархта специалистти работас коре ялганза пшкятькшнихть лезксонкса. И сон мзярдовок аф атказай.
«Фалу ёрай тиемс коль сяда лама цебярь ломаттненди»,—вов мезе корхтайхть Андрей Служаевонь колга 41№ домоуправленияса покодихне. А нинге шарфнихть башка мяль эсь тевонцты оцю ответственность мархта, кельгозь и творческяйста малаткшнеманц лангс. Кда ушедсы тевть—тисы сонь педа-пес.
Машты кядь алясь—Россиянь ЖКХ-нь Почётнай работник, казьф Мордовия Республикань Государственнай Собраниять Почётнай грамотанц мархта, аф весть казендевсь Саранск ошень округонь администрациять и Октябрьскяй райононь администрациять Почётнай грамотаснон мархта. И вов тядде теенза максф Мордовия Республикань Почётнай грамота!
Андрей Геннадьевичень мархта удалась васьфтемс март ковонь лямбе шиня, мзярда эрязста аськолясь получаф заявкатнень коряс. Миньге саме мяльс молемс мархтонза и ваномс, кода сон работай. Андрей Служаев мярьгсь, што покоди цебярь коллективса. Сонць эряй Саранскяйть юго-западнай пялькссонза, а покодема сашенды Химмашу. Инголи, кле, эрянь тяса, сяс районть лац содаса.
Сидеста сашендови кулендемс, што эрь аляти улема и слесарькс, и электрикокс, и сантехникокс. Кизефтине, мезе тянь колга арьси Андрей Геннадьевич. Отвечась, што самай тяфтамкс улема слесарти-сантехникти. Суваме лама квартирань фкя кудть подвалс. Тоса мольсть трубат, конатнень эса ульсть вентильхть, краннят-месть. И нятнень, тндян, сембонь содамат? Сон пеедезь мярьгсь, што аф аньцек подвалонь трубатнень, но и ламоть лиять. Эста и арьсезевонь, мзяра ломанень труд ащи сянь эса, штоба эрь шиня пувордалеськ кельме и пси ведень краттнень, а эздост шудель ведь. Или штоба сёксенда квартиразонк эсь пингстонза пачкодель лямбось. Сяшкава тонадоме тянди, а вдь сембось сатови вов тяфтама ломаттнень трудснон вельде.
Лисеме подвалста, а слесарсь-сантехниксь эряскодсь нинге фкя заявкать коряс, конань кадозе лама квартирань кудста эряйсь.
Мзяра заявка пяшкодема эрь шиня? Коста кода. Уленди, што фкя заявкать лангса работама шиньберьф, а лиясь веши сяда кржа пинге.
Кудса Андрей Геннадьевич—мирде и аля. Рьванц Лариса Александровнань мархта касфтыхть цёра. Кирилл тонафни техникумса программистокс. Ваймама шитнень Служаефне семьянек ётафнесазь велеса—якайхть Нижегородскяй области.
Ванды слесарть-сантехникть учсазь од заявкат. А сон, эрть пяшкодемста, содасы, што тага лездсь ломаттненди. И тянкса марясы прянц павазукс.
Татьяна Альшина.