1811 КИЗОНЬ 14 ОКТЯБРСЬ—1811 КИЗОНЬ 16 ОКТЯБРСЬ
1811 кизонь 14 октябрьста Кутузовонь рузонь войсканза ётасть Дунайть туркс и апак учсек эрьхтемаса тапазь Рущукть (тяни Русе болгарскяй ошсь) ала турецкяй 20 тёжянень армиять.
Рузонь войскатне атакать пингста юмафтсть аньцек 9 ломатть—синь шавфтольхть, 40-ць ранендафтольхть.
РУЩУКСКО-СЛОБОДЗЕЙСКЯЙ ОПЕРАЦИЯСЬ
Кизоть ушедомста Рущукть ширес ушедсь шаштома Ахмет-пашань командованиянц ала армиясь. 1811 кизонь 22 июньцта сон атаковандазе Рущукть маласа Кутузовонь войсканц (15 тёжянь ломань). Рузонь войскатне артиллерийскяй толса и контратакатнень вельде кирдезь врьгятемать. Ахмет-паша потась и ушедсь эсь перьфканза окопонь тиендема, учендомок Кутузовонь врьгятеманц. Но российскяй командующайсь потась аф оцю войсканц мархта Дунайть кержи трвазонза, сяземок рущукскяй укреплениятнень.
Кутузов арьсесь лия план—керомс туркатнень Рущукть мархта сообщениять эзда. Сёксень шобда веня генералть Е.М.Марковонь командованиянц ала отрядсь салава ётась Дунайть види трвазонза и 2 октябрьста апак учсек Рущукть маласа тапазе турецкяй войскать. Рузонь войскатне тапазь 20 тёжянень армиять, конань ламошкац повсь пленц или ворьгодсь. Тяда башка, фатяфоль оцю лагерь, коса ульсь пяк лама продовольствия и вооружения. Тяда меле туркатнень Слободзейскяй лагерьснон кержи трваса блокировандазь Кутузовонь войсканза. Ахмет-паша ворьгодсь Рущуку, кадомок солдатонзон. Кутузов ашезь аще каршек ворьгодеманцты, сяс мес содазе, што турецкяй закоттнень коряс визирти аш кода вятемс мирть колга переговорхт, улемок окруженияса. Дунайть види трвазонза визирть ётамдонза меле, теенза курокста сась Кутузовонь адъютантоц, поздравляндазе и азсь мяль ушедомс мирнай переговорхт. Слободзейскяй лагерть маштсь ширде саф лезксть лангс надиямац и сон марнек кружафоль. Турецкяй войскати ашесть пачфнев боеприпаст и продовольствия. Сон кирдсь лама юмафкс вачашить, урматнень и артиллерийскяй ляцендематнень сюнеда.
1811 кизонь 23 ноябрьста Ахмет-паша путозе кяденц Слободзейскяй лагерьса эсь армиянц лятксонзон капитуляцияснон колга актти. Ся пингти армияц кирсь 12 тёжянь ломанти.