Содавсь ся авась, кона пенсионеркать кядьста сявсь 9 миллиотт цалковай

Газетать мекольдень номеронзон эзда фкаса пачфнеськ, што 10 ноябрьста Саранскяйса полицияв пшкядсь 74 кизоса пенсионеркась и азозе, што салазь 7 миллиотт 650 тёжянь цалковаенц.
«Стопмошенник13» телеграм-каналса аф кунара появась информация сянь колга, што полицейскяйхне, семботь лац-ряц ваномста, лувозь, мзяра афкукс юмафтсь пенсионеркась—9 миллиотт цалковай.
Сиренять валонзон коряс, октябрть песта теенза гайфтсь аф содафсь и азозе прянц сотовай компаниянь сотрудникокс.
Пенсионеркать ширес сашенды авась-курьерсь фалу азонкшнезень «мишенттяда-аф финскяй шарф?» валхнень. Тя ульсь эсь лацонь паролькс 74 кизоса авати, кона няфнезе, што авась-курьерсь сась ярмакнень инкса. Тяфта ульсь кота шит мельцек.
1-8 ноябрьста пенсионеркась юмафтсь 9 миллиотт цалковай. Меле азондсь тянь колга раднянцты, и ся мярьгсь пшкядемс полицияв.
Уголовнай розысконь сотрудникне тиезь семботь, штоба содамс, кие сашендсь пенсионеркать шири курьер лаца. Тя ульсь Саранск ошень 60 кизоса ава. Валонзон коряс, пенсионеркать адресонц, коста эрявсть сявомс ярмакне, теенза кучезе аф содафсь мессенджерть вельде. Телефоннай аферистсь недяля кирдсь мархтонза соткст, макссесь инструкцият и ванць тевонзон мельге. Пенсионеркать шири авась-курьерсь пачкотькшнесь таксиса.
Получамок ярмак мархта пакетть, авась, аферисттнень мярьгомаснон коряс, лия машинаса тушендсь банкомату и азф реквизиттнень коряс ётафнезень ярмакнень.
Ся купюратнень, конатнень ашезень примсе банкоматсь, сон, инголенди корхтамок кураторть мархта, сявондезень эстеенза пандома лаца.
Тяниень пингть Саранск ошень округть эзга Россиянь УМВД-ть следствияц ушедсь уголовнай тев РФ-нь УК-ть 159 статьянц 4 пунктонц—«Мошенничествать» коряс.